Cifukwa Wuli Nchakuzirwa ‘Kuŵa Maso?’

“NCHIVICI cizamuŵa cimanyikwiro ca kuŵapo kwinu na ca umaliro wa mgonezi?” (Mat. 24:3) Pakuzgora fumbo ili, Yesu wakaphalira ŵasambiri ŵake za cimanyikwiro ico cikulongosoreka makora mu Mateyu cipaturo 24, Mariko cipaturo 13, na Luka cipaturo 21. Yesu wakatiso: “Muŵenge maso.”—Mat. 24:42.

Usange cimanyikwiro cikaŵa cambura kusuzga kucimanya, cifukwa wuli Yesu wakayowoyaso cenjezgo ili? Wonani vifukwa viŵiri ivi. Cakwamba, ŵanji ŵangasulako cimanyikwiro ici cifukwa cakutimbanizgika na vinthu vinyake na kuleka kuŵa maso mwauzimu. Caciŵiri, Mkhristu wangamanya vinthu vinyake vyakukhwaskana na cimanyikwiro, kweni para iyo wali pawemiko wangawona kuti wakukhwaskika viŵi yayi. Ntheura, wangamba kughanaghana kuti “suzgo yikuru” iyo Yesu wakayowoya yicali kutali, na kuwona kuti nchakukhumbikwa viŵi yayi ‘kuŵa maso.’—Mat. 24:21.

“Ŵakaŵikako Mahara Cara”

Yesu wakakumbuska ŵalondezgi ŵake za ŵanthu awo ŵakaŵako mu nyengo ya Nowa. Ŵanthu aŵa ŵakwenera kuti ŵakamuwonanga Nowa wakupharazga, kukhoma cingalaŵa, kweniso ŵakawonanga viheni ivyo vikacitikanga. Ndipouli, ŵanandi “ŵakaŵikako mahara cara.” (Mat. 24:37-39) Ndimoso viliri mazuŵa ghano. Mwaciyelezgero, mu misewu mukuŵa vikhwangwani vyakulongora sipidi iyo madilayivara ghangendeskera galimoto, kweni ŵanandi ŵakuŵikako mahara yayi. Kanandi boma likucicizgika kuŵika mahampu mu misewu ya mu matawuni na cilato cakuti madilayivara ghacepeskengeko sipidi. Mwakuyana waka, Mkhristu wangaŵa kuti wakucimanya cimanyikwiro ca mazuŵa ghaumaliro, kweni nipera wangalutilira kutangwanika na caru. Arielle, muwukirano wa ku West Africa wakaŵa na suzgo lakuyana waka.

Arielle wakatemwanga comene kuwonelera bola ya ŵanakazi pa TV. Pa sukulu pawo ŵati ŵamba kuseŵera bola ya mawoko, wakatoleka mtima na kusulako ubwezi wake na Yehova. Iyo ŵakamusora kuti wajandenge pa golo. Kasi vikamwendera wuli? Wakati: “Ŵanyane ŵanji ŵakaŵa na vibwezi ivyo vikamwanga munkhwala wakuzweteska wongo na kukhweŵa hona. Ŵakanisekanga cifukwa cakuti nkhaŵavya cibwezi, kweni nkhaghanaghananga kuti suzgo ili ningamarana nalo. Mwasoka bola ilo lene ndilo likamba kunanga umoyo wane wauzimu. Mu maghanoghano na mu mtima wane mukendanga waka vya bola. Pa nyengo ya maungano, maghanoghano ghane ghakafumanga mu Nyumba ya Ufumu na kuluta ku girawundi. Nkhamba kulopwa mwauzimu. M’malo mwa kutemwa waka maseŵero, nkhamba kuŵa na mzimu wakuti timu yithu ndiyo yiluskenge nyengo zose. Ntheura, nkhafwilirangapo kunozgekera. Nkhamba kuŵa wakwenjerwa comene. Ŵabwezi ŵawemi nkhaŵaleka cifukwa ca bola.

“Suzgo likafika paheni, apo ŵanyithu ŵakasanga mwaŵi wa penote. Nkhaŵa wakunozgeka  kujanda kuti bola yileke kuhora. Mwakuti nkhalomba kwa Yehova kuti wanovwire kujanda bola. Apa nkhawamo kuti umoyo wane wauzimu wanangika comene. Kasi cikanovwira nchivici?

“Nkhawonelera DVD yakuti Young People Ask—What Will I Do With My Life? * Nkhawona kuti nchiwemi kuwoneleraso vidiyo iyi, na kuŵikapo mahara comene. Nakuti nkhaŵa na suzgo la kuyana waka na la André, muwukirano wa mu seŵero ili. Nkhakhozgeka comene na ivyo mulara wakaphalira André kuti wacite: kuŵazga lemba la Ŵafilipi 3:8 na kughanaghanirapo. Ndivyo nane nkhacita. Nkhaleka bola.

“Ici cikanovwira comene. Mzimu wa kuphalizgana pamoza na kwenjerwa vikamara. Nkhamba kukondwa kweniso kutemwana na Ŵakhristu ŵanyane. Nkhamba kuzirwiska comene vinthu vyauzimu. Maghanoghano ghakaleka kwendendeka para ni pa maungano ndipo nkhasangwanga nagho. Nkhamba kucitaso makora mu uteŵeti. Pasono ndine mupayiniya wakanyengo.”

Usange pali cinthu cinyake ico cikucitiska kuti muzerezge cimanyikwiro ico Yesu wakayowoya, citanipo kanthu mwaluŵiro nga ni Arielle. Yezgani kucita vinthu vyakulondezgapo ivi. Wonani Watch Tower Publications Index, iyo yili nga ni mapu ghakulongozgera ku usambazi wakubisika. Yingamovwirani kumanya uko mungasanga ulongozgi wavinjeru na nkhani izo ŵabali ŵakulongosora umo ŵakatondera viyezgo. Kuti musange candulo na maungano, mukwenera kunozgekera makora, kweniso kulemba fundo para nkhani zikudumbika. Pa maungano, ŵanji ŵakuwona kuti nchiwemi comene kukhala kunthazi. Para ni nyengo yakuti ŵategherezgi ŵazgorepo, yambani ndimwe kuzgorapo. Kweniso mukwenera kusanda ivyo vikucitika mu caru na kuyaniska na ivyo Baibolo likuyowoya vya “mazuŵa ghaumaliro.”—2 Tim. 3:1-5; 2 Pet. 3:3, 4; Uvu. 6:1-8.

“Muŵe Ŵakunozgeka”

Cimanyikwiro ca mazuŵa gha umaliro, cikumanyikwa pa “caru cose.” (Mat. 24:7, 14) Ŵanthu ŵanandi ŵakukhala mu malo agho muli nthenda zakwambukira, kusoŵa kwa cakurya, vindindindi, na vinthu vinyake ivyo Baibolo likayowoyerathu. Kweniso ŵanji ŵakukhala mu vyaru ivyo muliko kamtende. Usange imwe mundawonepo vinthu vinyake ivyo vikulongora kuti tili mu mazuŵa ghaumaliro, kasi mukwenera kughanaghana kuti suzgo yikuru yicali kutali? Uku kungaŵa kupusa.

Mwaciyelezgero, wonani ivyo Yesu wakayowoya vyakukhwaskana na “nthenda zakwambukira na njara.” (Luka 21:11) Cakwamba, manyani kuti Yesu wakayowoyapo yayi kuti vinthu ivi vizamucitika mu malo ghose pa nyengo yimoza nesi kuti vizamucitika mwakuyana waka. M’malo mwake, wakati vinthu ivi vizamucitika “mu malo na malo.” Ntheura, tileke kukhazga kuti suzgo lakuyana waka licitikenge pa caru cose pa nyengo yimoza. Caciŵiri, Yesu wakalongora kuti ŵanji mwa ŵalondezgi ŵake ŵakeneranga kuŵa maso kuti ŵaleke kurya mwakujumphizga. Wakati: “Muŵe maso pa mwaŵene kuti mitima yinu yileke kuzotofyeka na kurya mwakujumphizga.” (Luka 21:34) Ntheura, Ŵakhristu wose ŵaleke kukhazga kuti mwakudunjika ŵawonenge vinthu vyose vyakukhwaskana  na cimanyikwiro. Ndipouli, Yesu wakati: “Para mukuwona vinthu ivi vikucitika, manyani kuti ufumu wa Ciuta uli pafupi.” (Luka 21:31) Nangauli vinthu vinyake vyakukhwaskana na cimanyikwiro tingaviwona mwakudunjika yayi, kweni tekinoloje yikutovwira kuwona vigaŵa vyose vya cimanyikwiro.

Kweniso tikwenera kukumbuka kuti Yehova wali kutema kale ‘zuŵa na ora’ apo suzgo yikuru yizamwambira. (Mat. 24:36) Vyakucitika vya pa caru visinthenge yayi zuŵa ili.

Yesu wakuciska Ŵakhristu wose kuti ‘ŵaŵe ŵakunozgeka.’ (Mat. 24:44) Nyengo zose tikwenera kuŵa ŵakunozgeka. Ndipouli, vingacitika yayi kuti zuŵa lililose kwamba mulenji mpaka mise ticitenge waka milimo ya kukhwaskana na kusopa. Nakuti palije uyo wakumanya mulimo uwo tizamuŵa kuti tikucita para suzgo yikuru yikwamba. Ŵanji yizamuŵasanga ku munda apo ŵanji yizamuŵasanga kuti ŵakucita milimo ya pa nyumba. (Mat. 24:40, 41) Ipo kasi tingacitaci kuti tiŵe ŵakunozgeka?

Emmanuel na muwoli wake Victorine, lumoza na ŵana ŵawo ŵankhondi na yumoza ŵakukhala ku Africa, uko ŵakuwona vinandi yayi ivyo vikulongora kuti umaliro uli pafupi. Ntheura, ŵali kusankha kuti zuŵa lililose ŵadumbiskanenge vinthu vyauzimu kuti ŵaŵe ŵakunozgeka. Emmanuel wakati: “Cikaŵa cakusuzga kusanga nyengo yakwenelera kwa tose. M’malo mwake, tikasankha nyengo yapakati pa 6 koloko na hafu 6 mulenji. Para tamara kusanda lemba la zuŵa, tikunozgekerapo ndime zicoko waka mu mabuku agho tamusambira ku mpingo sabata iyo.” Kasi ndondomeko iyi yaŵawovwira kuti ŵaŵe maso? Enya. Pasono Emmanuel ni mulaŵiliri wa milimo ya wupu wa ŵalara. Kanandi Victorine wakucita upayiniya wakanyengo ndipo wawovwirapo ŵanandi kuti ŵamanye unenesko. Ŵana ŵawo wose ŵakucita makora mwauzimu.

Yesu wakacenjezga kuti: “Lutilirani kulaŵiska, muŵenge maso.” (Mrk. 13:33) Lekani kuzomerezga kuti vinthu vinyake vimutimbanizgani kuŵa maso mwauzimu. Nga ni Arielle, londezgani ulongozgi uwo ukuŵa mu mabuku ghithu na uwo tikupulika pa maungano gha mpingo. Nga ni mbumba ya Emmanuel, zuŵa lililose yezgani kucita cinthu cinyake ico cingamovwirani kuŵa ŵakunozgeka na ‘kuŵa maso.’

[Mazgu ghamusi]

[Cithuzithuzi pa peji 4]

Zuŵa lililose Emmanuel pamoza na mbumba yake ŵakudumbiskana vinthu vyauzimu mwakuti ‘ŵaŵe ŵakunozgeka’