Mamembara Ghaphya gha Wupu Wakulongozga

PAKAŴA pa Citatu namulenji, Ogasiti 24, 2005, peneapo mbumba za Beteli ku Canada na ku United States zikawoneleranga pa vidiyo ivyo vikacitikanga ku Brooklyn, ndipo zikapulika cipharazgo cakukondweska comene. Kwambira pa Seputembala 1, 2005, mamembara ghaphya ghaŵiri ghakasazgikirako ku Wupu Wakulongozga wa Ŵakaboni ŵa Yehova. Ŵabali aŵa ni Geoffrey W. Jackson na Anthony Morris III.

Mbali Jackson wakamba kucita upayiniya mu Febuluwale 1971 ku Tasmania, cirwa ca ku Australia. Mu Juni 1974 wakatora mwanakazi zina lake Jeanette. Pakati pajumpha nyengo yicoko waka, ŵakimikika kuŵa ŵapayiniya ŵapadera. Kufuma mu 1979 mpaka mu 2003, ŵakaŵa ŵamishonale ku Tuvalu, Samoa, na Fiji. Virwa ivi vili kumwera kwa nyanja ya Pacific. Peneapo ŵakaŵa ku vyaru ivi, Mbali na Mudumbu Jackson ŵakawovwiraso comene pa nchito ya kung’anamura mabuku agho ghakulongosora Baibolo. Kufuma mu 1992, Mbali Jackson wakaŵa mu Komiti ya Munthavi ku Samoa, ndipo kufuma mu 1996, wakaŵa mu Komiti ya Munthavi ku Fiji. Mu Epulero 2003, Mbali Jackson na muwoli wake Jenny ŵakaŵa ŵamoza ŵa mbumba ya Beteli ya United States ndipo ŵakamba kuteŵetera mu Dipatimenti ya Nchito za Kung’anamura. Kufuma apo, Mbali Jackson wakaŵa movwiri wa mu Komiti Yakusambizga ya Wupu Wakulongozga.

Mbali Morris nayo wakamba upayiniya mu 1971 mu caru ca United States. Mu Disembala cilimika cenecico wakatora mwanakazi zina lake Susan, ndipo wose ŵakalutilira kucita upayiniya pafupifupi vilimika vinayi, mpaka apo mwana wawo wakwamba musepuka wakababika, zina lake Jesse. Pakati pajumpha kanyengo, ŵakaŵaso na mwana musepuka, zina lake Paul. Mu 1979 Mbali Morris wakambiraso upayiniya wa nyengo zose. Ŵana ŵakati ŵamba sukulu, muwoli wake nayo wakambiraso uteŵeti wa nyengo zose. Mbumba iyi yikateŵetera uko kukakhumbikwiranga wovwiri, ku cirwa ca Rhode na ku North Carolina, mu caru ca United States. Ku North Carolina, Mbali Morris wakaŵa mulaŵiliri wa dera wakukolelerapo, ndipo ŵasepuka nawoso ŵakamba upayiniya wa nyengo zose. Ŵakati ŵakwaniska vilimika 19, Jesse na Paul ŵakacemeka kukateŵetera ku munthavi wa ku United States. Ndipo Mbali Morris wakamba uteŵeti wadera. Pa Ogasiti 1, 2002, Mbali na Mudumbu Morris ŵakacemeka ku Beteli kukamba uteŵeti wuphya. Mbali Morris wakaŵa mu Dipatimenti Yakulaŵilira Uteŵeti ku Patterson, ndipo pamanyuma pake wakaŵa movwiri wa komiti ya uteŵeti ya Wupu Wakulongozga.

Padera pa ŵanthu ŵaŵiri aŵa, mu Wupu Wakulongozga sono muli ŵabali aŵa: C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; na D. Sydlik. Mamembara ghose gha Wupu Wakulongozga Mbakhristu ŵakuphakazgika.