Ŵawukirano Awo Ŵakukondweska Mtima wa Yehova

Mitu iyi comene-comene yalembekera ŵawukirano awo Mbakaboni ŵa Yehova. Mwanteura, tikuciska ŵawukirano kuti ŵasambire mitu iyi mwakupwererera na kuzgorapo mwakukwana na mwakufwatuka pa Sambiro la Gongwe la Mlinda.

“Mwana wane, khala wavinjeru na kukondwereska mtima wane, mwakuti ndimuzgore uyu wandicenya.”—Zintharika 27:11.

1, 2. (a) Rongosorani usange kudokera vintu vya mu caru kukung’anamura kuti ndimwe wambura kwenelera kuŵa Mkristu. (Ŵaroma 7:21) (b) Kasi mukusambirapo vici pa ciyerezgero ca Asafu? (Wonani bokosi pa peji 7.)

 GHANAGHANANI kuti mukusanka malaya. Peneapo mukulaŵiska-laŵiska, mwawona laya linyake ilo lamukondweskani. Mtundu wake na sitayelo yake vyamukondweskani comene, ndipo mtengo wake nguwemi. Kweni mukulitandazura na kuliwona makora-makora. Mwasanga kuti ndakutchujuka, ndipo ndambura kusoneka mwaluso. Nangauli laya ili ndakutowa, kweni ndambura kukhora na lambura kupangika makora. Kasi munganangira ndarama yinu pa laya la ntena ili?

² Yaniskani ciyerezgero ici na mukhaliro uwo imwe ŵawukirano Ŵacikristu mungakumana nawo. Para mwalaŵiska kakwamba, vintu vya mu caru ici, ivyo tingayaniska na laya, vingawoneka kuŵa vyakukondweska comene. Mwaciyerezgero, ŵanyinu ku sukulu ŵangarutanga ku viphikiro vyakukondweska, kukhweŵa chamba na kumwa mukhwara wakunanga wongo, kumwa moŵa, kucita vibwezi, na kugonana uku palije nthengwa. Kasi nyengo zinyake namwe mukudokera kucita ivi? Kasi mukudokera kuti muyezgeko pacoko waka umo vikuŵira? Usange ndimo viliri, lekani kughanaghana luŵiro kuti mtima winu nguheni ndipo ndimwe wambura kwenelera kuŵa Mkristu. Manyani kuti nanga liŵe Baibolo likuyowoya kuti caru cinganyenga nanga waŵe muntu uyo wakukhumba kukondweska Ciuta.—2 Timote 4:10.

3. (a) Cifukwa wuli ncambura mahara kutangwanika na vintu vya caru? (b) Ni mwauli umo Mkristu munyake wakarongosolera kuŵavya phindu kwa kucita vintu vya caru?

³ Sono woneseskani comene vintu vya mu caru, nga ni umo mwatenge mucitirenge pa kugura laya. Jifumbani kuti, ‘Kasi kawonekero na kasonekero ka vintu vya mu caru ici kali wuli?’ Baibolo likuti “caru cikuruta.” (1 Yohane 2:17) Cakusekereska cilicose mu caru ici nca kanyengo kacoko waka. Kusazgapo apa, kucita vintu ivyo Ciuta wakutinka kuli na mtengo wake. Mtengo wake nguwemi yayi. Mkristu munyake, uyo wakadandauranga na ivyo mweneko wakuti ni “vyakuŵinya ivyo vikiza cifukwa ca kuleka kugwiriskira ncito makora uwukirano  wake,” wakuti: “Caru cingawoneka kuŵa cakukondweska comene. Ndipo cikukhumba kuti ughanaghanenge kuti ungakondwa umo ukukhumbira, kwambura kukumana na vyakuŵinya. Kweni ici cingacitika yayi. Caru cikukugwiriskira ncito ndipo para camarana nawe, cikukutaya waka uko cii!” a Munangirengeci uwukirano winu na vintu vyawakawaka vya mu caru ici?

Kuvikilirika ku “Muheni”

4, 5. (a) Apo nyifwa yake yikaŵa pafupi, kasi Yesu wakapempa vici kwa Yehova? (b) Cifukwa wuli pempho lake likaŵa lakwenelera?

⁴ Pakuti ŵakumanya kuti palije cintu ciweme ico caru ici cingapereka, ŵawukirano awo Mbakaboni ŵa Yehova ŵakuyezgayezga kuti ŵaleke kupanga ubwezi na caru ici. (Yakobe 4:4) Kasi ndimwe yumoza wa ŵawukirano ŵakugomezgeka aŵa? Usange ndimo viliri, mukuwongeka comene. Kuyowoya unenesko, ncipusu yayi kukana ivyo ŵanyinu wose ŵakucita na kuŵa pamwekha. Kweni pali muntu munyake uyo wangamovwirani.

⁵ Apo nyifwa yake yikaŵa pafupi, Yesu wakapempa Yehova kuti ‘wasungirire’ ŵasambiri ŵake “ku muheni.” (Yohane 17:15) Yesu wakaŵa na cifukwa ciweme ca kuperekera pempho ili. Wakamanya kuti kugomezgeka ciŵenge cintu cipusu yayi kwa ŵarondezgi ŵake, mwambura kupwererako kantu za msinku wawo. Cifukwa? Cifukwa cimoza ncakuti, nga ni umo Yesu wakarongolera, ŵasambiri ŵake ŵalimbanenge na murwani wankongono na wambura kuwoneka—“muheni,” Satana Dyabulosi. Baibolo likuyowoya kuti cilengiwa cauzimu ciheni ici cili ‘nga ndi nkaramu yakuwuruma, cikuyingayinga kupenja uyo cingamumirimitizga.’—1 Petros 5:8.

6. Kasi tikumanya wuli kuti Satana wakucitira citima yayi ŵawukirano?

⁶ Kwambira kale, Satana wakucitira nkaza ŵantu mwa kucitiska masoka ghaheni comene. Ghanaghanani waka za masoka ghakofya agho Satana wakacitira Yobu na mbumba yake. (Job 1:13-19; 2:7) Mutepanyake mungakumbuka nkani zinyake za mu nyengo yinu izo zikurongora mtima wankaza wa Satana. Satana wahaŵa kupenja uyo wangarya, ndipo pakupenja uyo wangamumirimitizga, wakucitira citima ŵawukirano ca. Mwaciyerezgero, kukwambilira kwa handiredi lakwamba C.E., Herode wakapanga manozgero ghakuti wakome ŵana ŵanarumi wose mu Betelehemu, awo ŵakaŵa na virimika viŵiri panji kukhilira pasi. (Mateyu 2:16) Ncakuwonekerathu  kuti Satana ndiyo wakatuma Herode kucita ici, khumbo lake likaŵa lakuti wakome mwana uyo zuŵa linyake wazamuŵa Mesiya wakulayizgika wa Ciuta uyo wazamupereka ceruzgo pa Satana. (Genesis 3:15) Mwakuwonekerathu, Satana wakuseŵera na ŵawukirano ca. Khumbo lake leneco ndakuti wamirimitizge ŵantu ŵanandi. Ici ncaunenesko comene-comene sono, cifukwa Satana wali kucimbizgika kucanya na kupondomoskekera pa caru capasi, “wakuŵa na ukali ukuru, uku wakumanya kuti nyengo yake njicoko waka.”—Civumbuzi 12:9, 12.

7. (a) Kasi Yehova wakupambana wuli na Satana? (b) Kasi Yehova wakuwona wuli nkani yakuti mukondwenge na umoyo?

⁷ Mwakupambana comene na Satana, uyo wali na “ukali ukuru,” Yehova wali na “lusungu” lukuru. (Luka 1:78) Mukhaliro wake ukuru ni citemwa. Nakuŵanako, Mlengi withu wakurongora comene mukhaliro uwu mwakuti Baibolo likuti “Ciuta nkutemwa.” (1 Yohane 4:8) Ee, mphambano yilipo nadi pakati pa ciuta wa caru cino na Ciuta uyo muli na mwaŵi wa kumusopa! Peneapo Satana wakukhumba kumirimitizga ŵantu, Yehova ‘wakukhumba yayi kuti ŵanji ŵaparanyike.’ (2 Petros 3:9) Wakuwona umoyo wa muntu waliyose kuŵa wakuzirwa, kusazgapo umoyo winu. Para Yehova, kwizira mu Mazgu ghake wakumuphalirani kuti muleke kuŵa cigaŵa ca caru, kuti wakumujandani kuti muleke kukondwa na umoyo panji kutimbanizga wanangwa winu yayi. (Yohane 15:19) M’malo mwake, wakumuvikilirani ku muheni. Dada winu wa kucanya wakukhumba kuti muŵe na cintu cinyake cakujumpa vyakusekereska vya kanyengo kafupi vya mu caru ici. Khumbo lake ndakuti muzakasange ‘umoyo weneco’—umoyo wamuyirayira mu caru ca paradiso. (1 Timote 6:17-19) Yehova wakukhumba kuti mutonde, ndipo wakumuciskani kuti mulimbikire. (1 Timote 2:4) Kusazgaso apa, Yehova wakumucemani kuti mucite cintu cinyake capadera. Kasi ncintu wuli?

‘Kondweskani Mtima Wane’

8, 9. (a) Kasi ncawanangwa wuli ico mungapereka kwa Yehova? (b) Nga ni umo nkani ya Yobu yikurongolera, kasi Satana wakunena wuli Yehova?

⁸ Kasi muli kugulirapo cawanangwa mubwezi winu, ndipo apo mukati mwamupa, cisko cake cikarongora kuti wakondwa naco comene nakuti ngwakuwonga? Pambere mundagure, mukwenera mukaghanaghanirapo comene cintu ico cingaŵa cakwenelera kwa iyo. Sono ghanaghanirani fumbo ili: Kasi ncawanangwa wuli ico mungapereka kwa Mlengi winu, Yehova Ciuta? Pakwamba, fundo iyi yingawoneka kuŵa yambura kupulikikwa. Kasi Ciuta Wankongono-zose wangakhumba vici kwa muntu? Ncivici ico mungamupa cakuti walije? Baibolo likuzgora pa Zintharika 27:11 kuti: “Mwana wane, khala wavinjeru na kukondwereska mtima wane, mwakuti ndimuzgore uyu wandicenya.”

⁹ Nga ni umo muli kusambilira mu Baibolo, ni Satana Dyabulosi uyo wakunena Yehova. Iye wakunena Ciuta kuti waliyose uyo wakumuteŵetera wakucita ici cifukwa cakuti wakumutemwa yayi, kweni kuti wasange phindu linyake. Iye wakuti usange ŵantu ŵangasuzgika, mbwenu ŵalekenge kusopa kwaunenesko. Mwaciyerezgero, ghanaghanani waka ivyo Satana wakayowoya kwa Yehova pakukhwaskana na muntu murunji Yobu: “Asi muli kumuŵighirira luwigho, iye na nyumba yake na vyose ivyo wali navyo zingirizge kwete? Mwatumbika milimo ya mawoko ghake ndipo vyakuŵeta vyake vyandana mu caru. Kweni nyoroskani woko linu sono, mukwaske vyose ivyo wali navyo, muwone usange tiwareke kumutukani pamaso pinu.”—Job 1:10, 11.

10. (a) Kasi tikumanya wuli kuti Satana wakakayikira kugomezgeka kwa Yobu pera yayi? (b) Kasi namwe mukunjizgikamo wuli mu nkani ya muwuso wa Yehova?

¹⁰ Nga ni umo Baibolo likuvumbulira, Satana wakakayikira kugomezgeka kwa Yobu pera yayi kweniso waliyose uyo wakuteŵetera Ciuta—kusazgapo imwe. Nakuŵanako, pakuyowoya za ŵantu wose, Satana wakati kwa Yehova: “Muntu tiwapereke vyose ivyo wali navyo [Yobu pera yayi kweni waliyose] kuwombora umoyo wake.” (Job 2:4) Kasi mwawona udindo uwo muli nawo pa nkani yikuru iyi? Nga ni umo pakurongolera pa Zintharika 27:11, Yehova wakuti pali cintu cinyake ico mungamupa—zgoro lakuti wapereke kwa Satana, uyo wakumunena. Aghanaghanani waka, Fumu ya Cilengiwa Cose yikumupempani kuti namwe muzgoreko pa nkani yikuru iyi. O! nawo ni udindo  na mwaŵi ukuru uwo muli nawo! Kasi mungakwaniska ico Yehova wakukhumba kwa imwe? Yobu wakakwaniska. (Job 2:9, 10) Yesu na ŵantu ŵanyake ŵambura mapendeko, kusazgapo ŵawukirano ŵanandi, nawo ŵakakwaniska. (Ŵafilipi 2:8; Civumbuzi 6:9) Namwe ndimo mungacitira. Kweni lekani kubudiska, muntu wangaŵa pakati-kati yayi pa nkani iyi. Kwizira mu ivyo mukucita, murongorenge kuti mukovwira Satana kuti wanyoze makora Ciuta panji kovwira Ciuta kuti wazgore Satana. Kasi musankhenge nci?

Yehova Wakumupwerererani!

11, 12. Kasi vili na kantu kwa Yehova usange mwasanka kumuteŵetera panji yayi? Rongosorani.

¹¹ Kasi vyakusanka vinu vili na kantu kwa Yehova? Kasi ŵantu ŵanandi mbakugomezgeka kale yayi kwa iyo mwakuti wangapereka zgoro kwa Satana? Uwu mbunenesko, Satana wakati palije muntu uyo wakuteŵetera Yehova cifukwa ca kumutemwa, ndipo ici cili kuwoneka kale kuti mbutesi. Ndipouli, Yehova wakukhumba kuti muŵe ku kucigaŵa cake cifukwa wakumupwerererani. Yesu wakati: “Ŵawiskemwe ŵa kucanya ŵalive kukhumba kuti yumoza wa ŵacoko ŵeneaŵa watayike.”—Mateyu 18:14.

¹² Mwakuwonekerathu, Yehova wakuŵikako mahara ku vyakusanka vinu. Kujumpa apa, ivyo mukusanka vikumukhwaska. Baibolo likurongora makora kuti Yehova wakukhwaskika na vintu viweme panji viheni ivyo ŵantu ŵakucita. Mwaciyerezgero, apo Ŵaisrayeli ŵakagarukanga mwakuwerezga-werezga, ‘vikamuŵinya’ Yehova. (Salmo 78:40, 41) Pambere Cigumula ca nyengo ya Nowa cindacitike, Yehova “cikamuŵinya mu mtima wake” apo ‘uheni wa ŵantu ukaŵa ukuru mu caru.’ (Genesis 6:5, 6) Ghanaghanani waka ivyo ici cikung’anamura. Para mukucita viheni, Mlengi winu vikumuŵinya. Ici cikung’anamura kuti Ciuta ngwambura nkongono panji wambura kukhazikika maghanoghano yayi. Kweni wakumutemwani ndipo wakumughanaghanirani. Kusazgaso apa, para mukucita viweme, mtima wa Yehova ukukondwa. Wakukondwa cifukwa mwamupa waka zgoro lakupereka kwa Satana yayi, kweni cifukwa cakuti sono wangamupani makora vitumbiko. Ndipo kupereka vitumbiko ndiko iyo wakukhumba. (Ŵahebere 11:6) O! naco ncitemwa ico cili na dada withu Yehova Ciuta!

Vitumbiko Vikuru Sono

13. Ni mwauli umo kuteŵetera Yehova kukuperekera vitumbiko pa nyengo yasono?

¹³ Vitumbiko ivyo muntu wangasanga cifukwa ca kuteŵetera Yehova viri kuntazi pera yayi. Ŵawukirano ŵanandi awo Mbakaboni ŵa Yehova mbacimwemwe kweniso mbakukhorwa  na umoyo pa nyengo yasono, pa cifukwa ciweme. “Vilayizgo vya Yehova nvyakunyoroka, vikusekereska mtima,” ndimo wakalembera wamasalmo. (Salmo 19:8) Yehova wakumanya makora ico nciweme kwa ise kuruska muntu waliyose. Kwizira mwa ncimi Yesaya, Yehova wakati: “Ine ndine Yehova, Ciuta winu uyo wakumusambizgani kuti muwone candulo, uyo wakumurongozgani mu ntowa iyo mukwenera kwendamo. A! mupulikirenge marango ghane mphanyi cimango cinu canguŵa nga ndi mronga, na urunji winu nga ndi majigha gha nyanja.”—Yesaya 48:17, 18.

14. Kasi marango gha Baibolo ghangamovwirani wuli kuti muleke kukomwa na ngongoli?

¹⁴ Kurondezga ivyo Baibolo likusambizga kumovwiraninge kuti mutceŵe vyakuŵinya ndiposo citima. Mwaciyerezgero, Baibolo likuti awo ŵakutemwa ndarama ‘ŵakujilasa na vitima vinandi.’ (1 Timote 6:9, 10) Kasi walipo muwukirano munyinu uyo wali kusuzgikapo cifukwa ca kutemwa ndarama? Ŵanyamata na ŵasungwana ŵanandi ŵali na ngongoli zikuru cifukwa ca kukhumba kuŵa na malaya ghapya, ghapacanya na ghakudura. Kudokera vintu vya ndarama zinandi, vyakuti ungakwaniska yayi kugura nkhwakupweteka ndipo ni wuzga ukuru!—Zintharika 22:7.

15. Ni mwauli umo marango gha mu Baibolo ghakumuvikilirani ku vyakuŵinya ivyo vikwiza cifukwa ca uzaghali?

¹⁵ Ghanaghaniraniso nkani ya uzaghali? Pa caru cose capasi, cirimika cilicose, ŵasungwana ŵanandi ŵambura kutengwa ŵakutora nthumbo. Ŵanyake ŵakuŵa na ŵana ŵambura kuŵakhumba, ŵakuti ŵangakwaniska yayi kulera. Ŵanyake ŵakufumya nthumbo ndipo pamanyuma ŵakusuzgika maghanoghano. Pali ŵanyamata na ŵasungwana ŵanyake awo ŵakutora matenda ghakupirana pa kugonana, nga ni AIDS. Kweni kwa awo ŵakumanya Yehova, cintu ciheni comene kuruska vyose ncakuti ubwezi wawo na Yehova ukudumuka. b (Ŵagalatiya 5:19-21) Lekani Baibolo liri na cifukwa ciweme ca kuyowoyera kuti: “Cimbirani uzaghali.”—1 Ŵakorinte 6:18.

Kuteŵetera “Ciuta Wacimwemwe”

16. (a) Kasi tikumanya wuli kuti Yehova wakukhumba kuti mukondwenge na uwukirano winu? (b) Cifukwa wuli Yehova wakumupani urongozgi wakuti murondezgenge?

¹⁶ Baibolo likuti Yehova ni “Ciuta wacimwemwe.” (1 Timote 1:11, NW) Wakukhumba kuti mukondwenge. Nakuŵanako, Mazgu ghake ghakuti:  “Sekerera na uwukirano wako. Kondwa apo ucali munyamata.” (Mupharazgi 11:9, Today’s English Version) Kweni Yehova wakuwona vya nyengo ya sono pera yayi kweniso vya kuntazi—wakumanya vyakufumapo vya mukhaliro wuliwose, uweme panji uheni. Lekani wakumucenjezgani kuti: “Kumbuka Mlengi wako mu mazuŵa gha upya wako, ghandafike mazuŵa ghaheni, na virimika vindaneng’enere, mwa ivyo wamkunena kuti, ‘Nkukondwera mwa ivyo cara.’”—Mupharazgi 12:1.

17, 18. Ni mwauli umo muwukirano munyake Wacikristu wakarongosolera cimwemwe cake pa kuteŵetera Yehova, ndipo namwe mungasanga wuli cimwemwe cantena ici?

¹⁷ Ŵawukirano ŵanandi lero ŵasanga cimwemwe cikuru cifukwa ca kuteŵetera Yehova. Mwaciyerezgero, Lina, uyo wali na virimika 15 wakuti: “Nkhwenda mwakufwatuka ndipo ŵantu ŵakunicindika. Nili na thupi liweme cifukwa ca kuleka kukhweŵa hona na kumwa minkhwara ya kunanga wongo. Nkupokera urongozgi uweme ku mpingo uwo ukunovwira kuti nitonde viyezgo vya Satana. Cisko cane ncacimwemwe cifukwa ca ncezgo yiweme iyo tikuŵa nayo pa Nyumba ya Ufumu. Kuruska vyose, nili na cilindizga cakuruska cintu cilicose—umoyo wamuyirayira pa caru capasi.”

¹⁸ Nga ni Lina, ŵawukirano ŵanandi Ŵacikristu ŵakulimbalimba comene kuti ŵasunge cipulikano cawo, ndipo ici cikuŵapa cimwemwe. Ŵakumanya kuti nangauli umoyo wawo nyengo zinyake ukuzura na masuzgo ndiposo viyezgo, kweni ngwa ng’anamuro ndipo wuli na muntazi muweme. Mwanteura, rutilirani kuteŵetera Ciuta uyo wakumukhumbirani viweme. Kondweskani mtima wake, ndipo iye wamupaninge cimwemwe sono na muyirayira wose!—Salmo 5:11.

[Mazgu ghamusi]

Kasi Mukukumbuka?

• Ni urwani wuli uwo ukufuma kwa “muheni,” Satana?

• Kasi mungakondweska wuli mtima wa Yehova?

• Ni mwauli umo Baibolo likurongolera kuti Yehova wakumupwerererani?

• Ni vitumbiko wuli vinyake ivyo vikwiza para muntu wakuteŵetera Yehova?

[Mafumbo]

[Bokosi/Cithuzithuzi pa peji 7]

Mwanarumi Murunji Uyo Wakaŵa Pafupi Kukhuŵara

Asafu wakaŵa wakwimba wakumanyikwa wa fuko la Levi pa tempele la Yehova mu Israyeli. Ndiyo wakata sumu izo zikimbikanga pa nyengo ya kusopa. Mwambura kupwererako kantu za mwaŵi ukuru uwo wakaŵa nawo, pa nyengo yinyake Asafu wakamba kudokera mikhaliro yiheni ya ŵanyamata ŵanyake, awo ŵakawonekanga kuti ŵakuswa marango gha Ciuta kwambura kupokera cilango. “Marundi ghane ghakaŵa pafupi kukhuŵara, marwayo ghane ghakaŵa pafupi kuterera,” Asafu wakuzomerezga mwanteura. “Nkaŵa na sanji na ŵakujikuzga, pakuwona kusakata kwa ŵakwananga.”—Salmo 73:2, 3.

Pamanyuma pake, Asafu wakaruta mu tempele la Ciuta na kupereka lurombo pa nkani iyi. Cifukwa ca mzimu upya uwo ukanjira mwa iyo, wakamanya kuti Yehova wakutinka viheni, ndipo para nyengo yakwana, muheni na murunji, wose ŵazamuvuna ivyo ŵakumija. (Salmo 73:17-20; Ŵagalatiya 6:7, 8) Enya, ŵaheni ŵali pa malo ghakuteremuka. Paumaliro, wose ŵazamuwa apo Yehova wazamuparanya caru ici cambura kumanya Ciuta.—Civumbuzi 21:8.

[Vithuzithuzi pa peji 9]

Yehova wakumukhumbirani viweme, kweni Satana wakukhumba kumumirimitizgani

[Cithuzithuzi pa peji 10]

Ŵawukirano ŵanandi ŵakusanga cimwemwe mwa kuteŵetera Yehova pamoza na Ŵakristu ŵanyawo