Usange ni Chiuta yayi uyo wakupangiska masuzgo, ipo ni njani uyo wakupangiska masuzgo nga ni njara, ukavu, nkhondo, matenda kweniso masoka ghachilengiwa? Mazgu gha Chiuta Baibolo ghakuvumbura vinthu vitatu ivyo vikupangiska masuzgo.

1. Kujighanaghanira, Uryezi, na Thinkho. Baibolo likuti: “Munthu wakuwusa munyake na kumupweteka.” (Mupharazgi 8:9) Kanandi ŵanthu ŵakusuzgika chifukwa cha ŵanthu ŵambura urunji, ŵakujitemwa, kweniso ŵankhaza awo ŵakuŵawusa.

2. Nyengo na Vyakuchitika Vyamabuchi. Kanandi ŵanthu ŵakusuzgika chifukwa “nyengo na vyakuchitika vyamabuchi vikuwira wose.” (Mupharazgi 9:11) Fundo iyi yikulongora kuti ŵanthu ŵakusangana na soka chifukwa cha kuŵa pa malo ghaheni na pa nyengo yiheni. Kweniso ngozi zikuchitika chifukwa chakuti ŵanthu ŵakubudiska panji ŵakupwelelera yayi pakuchita vinthu.

3. Muheni Ndiyo Wakuwusa Charu. Baibolo likulongosora makora uyo wakupangiska kuti taŵanthu tisuzgikenge. Ilo likuti: “Charu chose chikugona mu nkhongono za muheni.” (1 Yohane 5:19) Satana Dyabulosi ndiyo ni “muheni” uyo wakuzunulika apa. Iyo ntchilengiwa chauzimu cha nkhongono, uyo pakwamba wakaŵa mungelo wa Chiuta kweni “wandayimepo mu unenesko.” (Yohane 8:44) Ŵangelo ŵanyake ŵakalondezga Satana na kugalukira Chiuta kuti ŵafiske makhumbiro ghawo ghakujighanaghanira ŵekha. Ntheura ŵangelo aŵa ŵakazgoka viŵanda. (Genizesi 6:1-5) Kufuma waka apo ŵakagalukira, Satana na viŵanda vyake ndiwo ŵakuchitiska vinthu viheni ivyo vikuchitika pa charu chapasi. Ndipo ivi vikuchitika chomene mu nyengo yithu yino. Pasono Satana wali na ukali ukuru “wakupuluska charu chose” lekani pa ‘charu pakuchitika masoka.’ (Chivumbuzi 12:9, 12) Nadi Satana ndiyo wakuwusa charu chose mwankhaza. Ndipo wakukondwa para wakuwona ŵanthu ŵakusuzgika. Ntheura Satana ndiyo wakupangiska masuzgo, ni Chiuta yayi.

GHANAGHANIRANI FUNDO IYI: Munthu muheni kweniso wankhaza ndiyo wangapangiska ŵanthu ŵambura mulandu kuti ŵasuzgikenge. Mwakupambana na fundo iyi Baibolo likuti: “Chiuta ntchitemwa.” (1 Yohane 4:8) Pakuti Chiuta ntchitemwa “wangachita uheni chara, Wankhongonozose wangachita kwananga chara.”—Yobu 34:10.

Kweni panji mungajifumba kuti, ‘Kasi Chiuta Wankhongonozose wazomerezgenge kuti Satana walamulire m’paka pawuli?’ Nga umo tawonera, Chiuta wakutinkha viheni ndipo vikumuŵinya chomene para tikusuzgika. Kweniso Mazgu ghake ghakutichiska kuti: “Muthulirani vyose ivyo mukwenjerwa navyo, chifukwa wakumupwelelerani.” (1 Petrosi 5:7) Chiuta wakutitemwa kweniso wali na nkhongono, ndipo wawuskengepo vinthu vyambura urunji nga umo tiwonerenge mu nkhani yakulondezgapo. *