Delphine, uyo tamuzunura mu nkhani iyo yajumpha, wakati apo wakenjerwanga, wakaŵanga na khumbo likuru la kumwa moŵa mwakujumphizga. Baibolo likukana yayi kumwapo, kweni likuyowoya kuti: “Ungaŵanga yayi pamoza na awo ŵakutemwa kumwa vinyo linandi.” (Zintharika 23:20) Kumwa chomene moŵa kukunanga umoyo, ubwezi withu na ŵanyithu, ndipo chaka chilichose ŵanthu ŵanandi ŵakufwa chifukwa cha kumwa chomene moŵa. Ŵanthu ŵangasangana na masuzgo agha yayi usange ŵangalondezga ulongozgi wa vinjeru uwo ukusangika mu Baibolo.

Delphine wakamanya fundo iyi. Iyo wakati: “Nkhamanya kuti moŵa ungamazga yayi masuzgo agho nkhafipanga nagho mtima. Nkhalondezga ulongozgi uwo uli pa Ŵafilipi 4:6, 7, uwo ukuti: ‘Lekani kwenjerwa na chinthu chilichose kweni . . . madandawuro ghinu ghamanyikwe kwa Chiuta.’ Usiku uliwose para namba kwenjerwa, nkhamuŵeyeleranga Yehova. Nkhamuphaliranga umo nkhujipulikira, kwali nakwiya panji nakhuŵara. Nkhamulombanga kuti wanovwire kuwona vinthu mwakwenelera. Para nawuka mulenji nkhaŵikangapo mtima kuti nileke kufipa mtima. Kulomba kwa Yehova kukanovwira chomene kuti niŵikenge maghanoghano pa vinthu ivyo nili navyo m’malo mwakughanaghanira ivyo nilije. Nkhadumura kuti nileke kumwaso moŵa chifukwa nkhakhumba yayi kutaya mtende uwo nkhasanga.”

Uzaghali ntchimoza mwa vinthu ivyo vikupangiska munthu kusuzgika chomene maghanoghano na kuŵa wambura kukondwa. Kweni fundo za mu Baibolo zingatovwira kugega masuzgo ghanthena agha para tingaleka vinthu ivyo vingalongozgera ku uzaghali, nga nkhuwonelera vinthu vyamuziro panji kutinyirana maso na munthu uyo ni mfumu panji muwoli withu yayi. Samuel wakati: “Chikaŵa chipusu chomene kutinyirana maso. Nyengo zinyake nkhaŵa kuti nkhumukhumba yayi msungwana, kweni umo iyo wakachitiranga nkhamanyanga kuti maghanoghano ghake ghose ghakaŵa pa ine, ntheura chikaŵa chipusu kutinyirana maso.” Samuel wakawona kuti chikamba kuŵa chizgoŵi kutinyirana maso na ŵasungwana kwambura chilato chilichose. Kweni pamasinda wakamba kutinyirana maso na chilato. Iyo wakati: “Vikafika paheni chomene chifukwa wamunthu ukuŵa na vizgoŵi viheni ndipo ukujighanaghanira waka wekha.”

Samuel wakaŵazga nkhani ya ŵachinyamata pa webusayiti ya jw.org. Wakaghanaghanirapo fundo ya pa Zintharika 20:11, apo pakuti: “Nanga ni mwana [panji kuti “msepuka,” mazgu ghamusi] wakumanyikwa na milimo yake, usange nkharo yake njiwemi na yakwenelera.” Kasi lemba ili likamovwira wuli? Samuel wakamanya kuti ivyo wakachitanga vikaŵa viwemi yayi. Ndipo pasono wakuti: “Nkhamanyaso kuti ŵachinyamata awo ŵali na chizgoŵi ichi, ŵakulutilira nanga ni para ŵatora panji kutengwa. Nangauli nindatore, kweni nkhajifumbanga kuti, kasi para natora, muwoli wane wazamujipulika wuli usange wamanya kuti nkhutinyirana maso na ŵasungwana ŵanyake? Nkhawamo kuti nkharo iyi njawakawaka.” Samuel wakasintha nkharo yake ndipo vyamovwira kuti wagege uzaghali.

Antonio nayo wakaŵa pangozi yikuru chomene. Wakaŵa na chizgoŵi cha kuwonelera vinthu vyamuziro. Nangauli wakaŵa wakutora ndipo wakamutemwanga chomene muwoli wake, kweni wakawoneleranga vinthu vyamuziro mwakuwerezgawerezga. Antonio wakati fundo ya pa 1 Petrosi 5:8 yikamovwira chomene. Lemba ili likuti: “Sungilirani maghanoghano ghinu, muŵe maso. Mulwani winu Dyabulosi wakuyingayinga nga ni nkhalamu yakuwuluma, wakupenja munthu wakuti wamumilimitizge.” Antonio wakatiso: “Vinthu vyamuziro vili palipose ndipo para taviwona vingakhalilira mu maghanoghano ghithu. Lemba ili likanovwira chomene kuti nikumbukenge kuti viyezgo ivi vikufuma kwa Dyabulosi. Pasono nkhumanya kuti Yehova ndiyo wanganovwira kuti ‘nisungilire maghanoghano ghane na kuŵa maso’ mwakuti nivikilire banja lane kweniso mtima wane.” Antonio wakapokera wovwiri ndipo pasono wali kuleka chizgoŵi chiheni ichi. Ndipo ivi vyamovwira kuti waleke kunjira mu masuzgo ghakofya.

Ntchakuwonekerathu kuti Baibolo lili na ulongozgi wa vinjeru uwo ungatovwira kugega masuzgo ghakofya. Kweni wuli pakuyowoya za masuzgo agho tasangana nagho kale ndipo ghakulutilira waka? Tiyeni tiwone umo Mazgu gha Chiuta ghangatovwilira.