NANGAULI BAIBOLO NI BUKU LASAYANSI YAYI, KWENI LIKAYOWOYERATHU VINTHU VYASAYANSI IVYO ŴASAYANSI PA NYENGO IYO ŴAKAVIMANYANGA YAYI. WONANI VIYELEZGERO VICHOKO WAKA.

Kasi charu chikachita kulengeka?

Kale, ŵasayansi ŵakagomezganga kuti zgoro la fumbo ili ndakuti yayi. Kweni sono ŵakuzomera kuti charu chikachitika kulengeka. Kweni Baibolo likaŵa kuti layowoya kale kuti charu chikachita kulengeka.—Genizesi 1:1.

Kasi charu chili wuli?

Kale, ŵanthu ŵanandi ŵakagomezganga kuti charu ntchafulati. Kweni mu 400 B.C.E., wasayansi munyake Wachigiriki wakasachizga kuti charu ntchabulunga. Kweni kale chomene mu 700 B.C.E., Baibolo likaŵa kuti layowoya kale kuti ‘charu chapasi ni bulunga.’—Yesaya 40:22.

Kasi vinthu vyakuchanya vikuvunda?

Wasayansi munyake Wachigiriki uyo wakaŵako m’ma 300 B.C.E., zina lake Aristotle wakasambizganga kuti vinthu vya pa charu chapasi pera ndivyo vikuvunda. Iyo wakati vinthu vyakuchanya vizamuvundapo chara. Ŵanthu ŵagomezga fundo iyi kwa vyaka vinandi. Kweni mu 1800, ŵasayansi ŵakamba kuyowoya vyakupambanako. Iwo ŵakati vinthu vyose, kwali ni vyakuchanya panji vya pa charu chapasi vikuvunda. Yumoza wa ŵasayansi aŵa wakaŵa Lord Kelvin. Iyo wakamanya ivyo lemba la Salimo 102:25, 26 likuyowoya. Lemba ili likuti: “Nga ntchakuvwara [charu chapasi na kuchanya] vitchujukenge.” Kelvin wakagomezganga ivyo Baibolo likuyowoya kuti Chiuta wakuchita kusankha kuti vinthu vileke kuvunda.—Mupharazgi 1:4.

Kasi mapulaneti nga ni charu chapasi ghali kukholera ku vichi?

Aristotle wakasambizganga kuti pulaneti yiliyose yili mukati mwa yinyake, ndipo charu chapasi ndicho chili pakati pa mapulaneti ghose. M’ma 1700 C.E., ŵasayansi ŵanyake ŵakamba kuzomerezga kuti nyenyezi na mapulaneti vikuning’ina pambura kanthu. Kweni buku la Yobu ilo likalembeka mu 1400 B.C.E., likaŵa kuti layowoya kale kuti Mlengi wali ‘kuning’ina charu chapasi pambura kanthu.’—Yobu 26:7.

NANGAULI BAIBOLO NI BUKU LA VYACHIPATALA YAYI, KWENI LILI NA FUNDO ZAKOVWIRA CHOMENE PA NKHANI YA VYAUMOYO.

Uyo wakulwara wakhalenge payekha.

Dango la Mozesi likatenge munthu uyo wakulwara vyoni wakwenera kukhala payekha. Mu vyaka vya m’ma 500-1500 AD, ndipo madokotala ŵakamba kulondezga fundo iyi. Ndipouli, fundo iyi yikaŵa kuti yilipo kale mu Baibolo pa Levitiko, chaputara 13 na 14.

Kugeza mu mawoko para munthu wakora chitanda.

Pambere vindafike vyaka vya m’ma 1800, madokotala para ghakora chitanda ghakalutiliranga waka kovwira ŵalwari kwambura kugeza dankha mu mawoko. Ivi vikapangiskanga kuti ŵanthu ŵanandi ŵafwenge. Ndipouli, Dango ilo Chiuta wakapeleka kwizira mwa Mozesi likatenge munthu uyo wakora chitanda ngwakufipirwa. Dango ili likatenge munthu wakwenera kugeza. Awo ŵakalondezganga fundo izi, vinthu vikaŵayenderanga makora.—Maŵazgo 19:11, 19.

Kujovwira.

Chaka chilichose, ŵana ŵakujumpha 500, 000 ŵakufwa chifukwa cha kujulika pamoyo. Ivi vikuchitika chifukwa ŵanthu ŵakujovwilira waka palipose. Dango la Mozesi likatenge munthu wakeneranga kujovwilira kutali na ŵanthu ndipo para wamara wajimire pasi na kuwundira.—Dotoronome 23:13.

Nyengo yakukotolera.

Dango la Chiuta likatenge mwana wakwenera kukotoleka pa zuŵa la nambara 8 kufuma apo wababikira. (Levitiko 12:3) Ŵasayansi ŵakuti sabata yakwamba iyo mwana wababikira ndopa zikufuma chomene yayi. Kale, nangauli kukaŵavya vinthu vyasono ivyo madokotala ghakugwilira ntchito, kweni uyo walondezga ulongozgi uwu vinthu vikamwenderanga makora.

Ivyo munthu wakughanaghana vikukhwaska umoyo wake.

Ŵasayansi ŵakuti munthu wakuŵa na umoyo uwemi para wakukondwa kweniso wakugowokera ŵanyake. Baibolo likuti: “Mtima wachimwemwe ni munkhwala uwemi, kweni mzimu wakuphyoka ukukamuska nkhongono.”—Zintharika 17:22.