MU NYENGO yakale, muteŵeti mulara ndiyo wakalaŵiliranga nyumba panji katundu wamunthu munyake. Mazgu Ghachihebere na Ghachigiriki agho ghali kung’anamulika kuti “muteŵeti mulara,” nyengo zinyake ghakuyowoya za mulaŵiliri panji kuti mulaŵiliri wanyumba yose.

Yosefe mwana wa Yakhobe, apo wakaŵa muzga ku Eguputo, ŵakamuŵika kuŵa muteŵeti mulara munyumba ya fumu yake. Nakuti fumu yake, ‘vyose ivyo yikaŵa navyo yikaviŵika mu woko lake.’ (Gen. 39:2-6) Pamanyuma, Yosefe wati waŵa muwusi wankhongono mu Eguputo, nayo wakasankha munthu kuti waŵe muteŵeti mulara wanyumba yake.—Gen. 44:4.

Mu nyengo ya Yesu, kanandi ŵeneko ŵa minda ŵakakhalanga mu misumba kutali na minda yawo. Ntheura ŵakasankhanga muteŵeti mulara kuti ndiyo walaŵilirenge ntchito iyo yikuchitika ku minda yawo.

Kasi ninjani wakaŵanga wakwenelera kuŵa muteŵeti mulara? Wakulemba mbiri wakale Wachiroma, Columella, wakalemba kuti muzga uyo wakasankhikanga kuti waŵe mulaŵiliri panji muteŵeti mulara wakeneranga kuŵa “uyo wali kusambizgika makora ntchito.” Wakeneranga kuŵa munthu uyo “wakuwoneseska kuti ŵantchito ŵakugwira makora ntchito zawo. Kweniso wakeneranga kuŵa wankhaza yayi.” Wakasazgiraposo kuti: “Chakuzirwa chomene kwa muteŵeti mulara chikaŵa chakuti wakeneranga yayi kughanaghana kuti wakumanya vyose, kweni nyengo zose wakeneranga kuŵa wakukhumbisiska kusambira vinthu viphya.”

Baibolo likuyowoya chiyelezgero cha muteŵeti mulara kuti lilongosore milimo yinyake iyo yikuchitika mu mpingo Wachikhristu. Mwachiyelezgero, mpositole Petrosi wakachiska Ŵakhristu kuti ŵagwiliskirenge ntchito maluso agho Chiuta wali kuŵapa kuti ‘ŵateŵeteranenge pakuŵa ŵateŵeti ŵalara ŵawemi ŵa lusungu lukuru lwa Chiuta.’—1 Pet. 4:10.

Yesu nayo wakayowoya chiyelezgero cha muteŵeti mulara mu ntharika iyo yili kulembeka pa Luka 16:1-8. Kweniso, mu uchimi wakuyowoya za chimanyikwiro cha kuŵapo kwake nga ni Themba, Yesu wakalayizga ŵalondezgi ŵake kuti wazamwimika “muzga wakugomezgeka na wavinjeru” panji kuti “muteŵeti mulara wakugomezgeka.” Mulimo ukuru wa muteŵeti mulara uyu uzamuŵa wakupeleka chakurya chauzimu icho ŵalondezgi ŵa Khristu ŵakukhumbikwira mu nyengo yaumaliro. (Mat. 24:45-47; Luka 12:42) Tikuwonga chomene kuti nase tili mu gulu la ŵanthu awo wakupokera chakurya chauzimu icho muteŵeti mulara wakugomezgeka wakupeleka pa charu chose chapasi.