NKHANI YAKUSAMBIRA 24
SUMU 24 Zaninge ku Phiri la Yehova
Lutilirani Kuŵa Ŵalendo ŵa Yehova Kwamuyirayira!
“A Yehova, kasi ni njani wangaŵa mulendo mu hema linu?”—SAL. 15:1.
FUNDO YIKURU
Nkhani iyi yitovwirenge kumanya ivyo tingachita kuti tilutilire kuŵa ŵabwezi ŵa Yehova, kweniso tiwonenge ivyo Yehova wakukhumba kuti tichitirenge ŵabwezi ŵake.
1. Kasi Salimo 15:1-5 lingatovwira wuli?
MU NKHANI iyo yajumpha, tikasambira kuti ŵateŵeti ŵakujipeleka ŵa Yehova ŵangaŵa ŵalendo mu hema lake para ŵali paubwezi wakukhora na iyo. Kweni kasi tikwenera kuchita vichi kuti tiŵe nayo paubwezi? Lemba la Salimo 15 likuyowoya vinandi pa nkhani iyi. (Ŵazgani Salimo 15:1-5.) Salimo ili likuyowoya ivyo tingachita kuti tiŵe paubwezi wakukhora na Chiuta.
2. Kasi wamasalimo Davide wakwenera kuti wakaghanaghaniranga vichi apo wakayowoya vya hema la Yehova?
2 Salimo 15 likwamba na mazgu ghakuti: “A Yehova, kasi ni njani wangaŵa mulendo mu hema linu? Ni njani wangakhala mu phiri linu lituŵa?” (Sal. 15:1) Wamasalimo Davide pakuyowoya kuti “hema” la Yehova, wakwenera kuti wakaghanaghaniranga vya chihema icho chikaŵa ku Gibiyoni kwakanyengo. Davide wakayowoyaso vya “phiri lituŵa” la Chiuta, panji wakaghanaghaniranga vya phiri la Ziyoni mu Yerusalemu. Ku malo agha, agho ghakaŵa kumwera kwa Gibiyoni, Davide wakajintha hema ilo ŵakaŵikamo likasa la phangano m’paka apo tempile likazengekera.—2 Sam. 6:17.
3. Chifukwa wuli tikwenera kunweka na Salimo 15? (Wonaniso chithuzi.)
3 Mbunenesko kuti Ŵaisrayeli ŵanandi ŵakazomerezgekanga yayi kuteŵetera pa chihema, kweniso Mbaisrayeli ŵachoko waka awo ŵakazomerezgekanga kunjira mukati umo likasa likasungikanga. Kweni ŵateŵeti wose ŵakugomezgeka ŵa Yehova ŵakaŵanga na mwaŵi wakuŵa ŵalendo mu hema lake lakuyelezgera para ŵali nayo paubwezi. Nakuti tose ndivyo tikukhumba. Lemba la Salimo 15 likuyowoya ivyo tikwenera kuchita kuti tilutilire kuŵa ŵabwezi ŵa Yehova kwamuyirayira.
Chikaŵa chipusu ku Ŵaisrayeli mu nyengo ya Davide kumanya icho chikung’anamura kuŵa mulendo mu hema la Yehova (Wonani ndime 3)
MWENDENGE KWAMBURA KAFUKWA NA KUCHITA ICHO NTCHAKWENELERA
4. Kasi tikumanya wuli kuti kubatizika pakwekha ndiko Yehova wakukhumba pera yayi? (Yesaya 48:1)
4 Pa Salimo 15:2, mubwezi wa Chiuta wakulongosoreka kuti ni ‘uyo wakwenda kwambura kafukwa, na kuchita icho ntchakwenelera.’ Mazgu ghakuti ‘mwendenge’ na ‘muchitenge,’ ghakulongora kuti tikwenera kulutilira kuchita vinthu ivyo. Kweni kasi tingenda nadi kwambura kafukwa? Enya. Nangauli palije munthu uyo ngwakufikapo, kweni Yehova watiwonenge kuti ‘tikwenda kwambura kafukwa’ para tikuchita vyose ivyo tingafiska pakumupulikira. Para tajipeleka kwa Chiuta na kubatizika, tikuŵa kuti tamba waka kwenda na Chiuta. Wonani kuti nanga ni mu nyengo yakale, kuŵa waka Muisrayeli chikaŵa chakukwana yayi kuti munthu waŵe mulendo wa Yehova. Ŵanyake ŵakachemanga pa Yehova “kweni mu unenesko na urunji chara.” (Ŵazgani Yesaya 48:1.) Ŵaisrayeli awo ŵakakhumbanga kuŵa paubwezi na iyo, ŵakeneranga kusambira ivyo Yehova wakukhumba na kuvilondezga. Mwakuyana waka, mazuŵa ghano napo kuti tiŵe paubwezi na Chiuta pakukhumbikwa vinandi, padera pa kubatizika waka na kuchemeka Kaboni wa Yehova. Tikwenera kulutilira “kuchita icho ntchakwenelera.” Kasi tingachita wuli nthena?
5. Kasi kupulikira Yehova mu vyose kukusazgapo vichi?
5 Kwa Yehova, “kwenda kwambura kafukwa” na “kuchita icho ntchakwenelera” chikung’anamura vinandi padera pa kuwungana waka nyengo zose ku Nyumba ya Ufumu. (1 Sam. 15:22) Tikwenera kuŵikapo mtima kumupulikira Chiuta pa chilichose, nanga tingaŵa kwatekha. (Zinth. 3:6; Muph. 12:13, 14) Ntchakuzirwa chomene kumupulikira Yehova nanga pangaŵa pa tunthu tuchokotuchoko. Para tikuchita nthena tikulongora kuti tikumutemwa na mtima wose, ndipo ivi vipangiskenge kuti nayo watitemwenge chomene.—Yoh. 14:23; 1 Yoh. 5:3.
6. Kuyana na Ŵahebere 6:10-12, kasi chakuzirwa chomene ntchivichi kuluska chilichose chiwemi icho tikachita kumasinda?
6 Yehova wakuwonga chomene ivyo tili kumuchitira kumanyuma. Ndipouli, pakuti tikachitapo vinthu viwemi kumanyuma, vikung’anamura kuti mbwenu tilutilirenge kuŵa ŵalendo mu hema la Yehova yayi. Fundo iyi tikuyiwona pa lemba la Ŵahebere 6:10-12. (Ŵazgani.) Yehova wakuluwa yayi milimo yithu yiwemi iyo tikachita kumanyuma. Ndipouli, wakukhumba tilutilire kumuteŵetera na mtima wose “m’paka paumaliro.” Waŵenge mubwezi withu kwamuyirayira “usange tikuvuka yayi.”—Gal. 6:9.
MUYOWOYENGE UNENESKO MU MTIMA WINU
7. Kasi kuyowoya unenesko mu mtima kukusazgapo vichi?
7 Uyo wakukhumba kuŵa mulendo mu hema la Yehova wakwenera “kuyowoya unenesko mu mtima wake.” (Sal. 15:2) Ichi chikung’anamura vinandi padera pakuleka kuyowoya utesi. Yehova wakukhumba tiŵe ŵanenesko mu vyose ivyo tikuyowoya na kuchita. (Heb. 13:18) Ichi ntchakuzirwa, “pakuti Yehova wakuseluka nayo munthu muryarya, kweni wakuŵa mubwezi wa ŵakunyoloka.”—Zinth. 3:32.
8. Kasi ni nkharo wuli iyo tikwenera kugega?
8 Awo ‘ŵakuyowoya unenesko mu mtima,’ ŵakugega kujilongora kuti mbakupulikira pawumba uku kumphepete ŵakuswa fundo za Chiuta. (Yes. 29:13) Ŵakugega kuchita vinthu mwauryarya. Munthu muryarya wangamba kukayikira malango ghanyake gha Yehova. (Yak. 1:5-8) Wangaleka kupulikira Yehova pa nkhani izo iyomwene wakuwona kuti ni zichokozichoko. Kufuma apo para wawona kuti palije masuzgo ghalighose agho wakumanapo nagho, wangaswaso fundo zinyake za Chiuta. Nangauli wangaŵa kuti wakughanaghana kuti wakusopa Chiuta, kweni kusopa kwake kungaŵa kwambura kuzomerezgeka. (Muph. 8:11) Ndipouli, ise tikwenera kuŵa ŵanenesko mu vinthu vyose.
9. Kasi tingasambirako vichi ku ivyo vikachitika apo Yesu wakakumana kakwamba na Nataniyeli? (Wonaniso chithuzi.)
9 Ntchakuzirwa chomene kuŵa munthu uyo wakuyowoya unenesko mu mtima wake. Tikuwona fundo iyi pa ivyo vikachitika apo Filipu wakachema mubwezi wake Nataniyeli kuti wakumane na Yesu. Nangauli Yesu wakaŵa kuti wandakumanepo na Nataniyeli, kweni wakati: “Wonani, Muisrayeli nadi, mwa uyo mulije upusikizgi.” (Yoh. 1:47) Mbunenesko kuti Yesu wakawonanga ŵasambiri ŵanyake kuŵa ŵanenesko, kweni mwa Nataniyeli wakawonamo kanthu kanyake kawemi chomene pa nkhani iyi. Nangauli Nataniyeli wakaŵa wambura kufikapo nga ndise, kweni wakaŵa mupusikizgi yayi, wakaŵa munenesko mu vinthu vyose. Yesu wakakondwa nawo mukhaliro uwu ndipo wakamulumba Nataniyeli. Tose tingakondwa chomene usange Yesu wangatiphalira mazgu agho wakayowoya kwa Nataniyeli!
Filipu wakwiza na mubwezi wake Nataniyeli kwa Yesu, mwanalume uyo mukaŵavya upusikizgi. Kasi nase ndimo tiliri? (Wonani ndime 9)
10. Chifukwa wuli tikwenera kugega kayowoyero kaheni? (Yakobe 1:26)
10 Vinthu vinandi ivyo vili mu Salimo 15, chomene ni vyakukhwaskana na umo tikwenera kuchitira vinthu na ŵanji. Salimo 15:3 likuyowoya kuti mulendo mu hema la Yehova “wakusesa chara na lulimi lwake, wakumuchitira chiheni chara mzengezgani wake, nanga nkhulengeska ŵabwezi ŵake.” Usange ŵanyithu tikuŵasesa vingaŵapweteka chomene, ndipo tingaŵaso ŵakwenelera yayi kuŵa ŵalendo mu hema la Yehova.—Ŵazgani Yakobe 1:26.
11. Kasi kusesa ni vichi, ndipo ntchivichi icho chingachitikira wakusesa wambura kupera?
11 Wamasalimo mwakudunjika wakayowoya vya kusesa. Kasi kusesa ni vichi? Mwakudumura, kusesa nkhuyowoyera munthu munyake vyautesi na chilato cha kunanga lumbiri lwake. Usange uyo wakusesa ŵanji wakupera yayi, wangasezgeka mu mpingo.—Yer. 17:10.
12-13. Kasi ni vyakuchitika wuli vinyake ivyo vingapangiska kuti tinange lumbiri lwa ŵanyithu kwambura kumanya? (Wonaniso chithuzi.)
12 Lemba la Salimo 15:3 likutikumbuska kuti ŵalendo ŵa Yehova ŵakuchitira viheni yayi ŵanyawo nesi kunanga lumbiri lwa ŵabwezi ŵawo. Kasi tingananga wuli lumbiri lwa ŵabwezi ŵithu?
13 Mwambura kumanya tingananga lumbiri lwa munyithu para tingathandazga nkhani zambura kukhozga zakukhwaskana na iyo. Mwachiyelezgero: (1) para mudumbu waleka kuchita upayiniya wanyengozose, (2) para mbumba yinyake yaleka kuteŵetera pa Beteli, panji (3) para mubali walekeskeka ulara panji uteŵeti wakovwira. Chingaŵa chiheni chomene kuphalira ŵanji kuti ŵabali na ŵadumbu aŵa, ŵakwenera kuti ŵali kuchita chinthu chinyake chiheni lekani uteŵeti wawo wasintha. Pangaŵa kuti pali vifukwa vinandi ivyo vyapangiska kuti uteŵeti wawo usinthe, ivyo ise tikuvimanya yayi. Kweniso mulendo mu hema la Yehova “wakumuchitira chiheni chara mzengezgani wake, nanga nkhulengeska ŵabwezi ŵake.
Ntchipusu kuthandazga nkhani zambura kukhozga za ŵanji ndipo paumaliro tingamba kusesa (Wonani ndime 12-13)
MUCHINDIKENGE AWO ŴAKOPA YEHOVA
14. Longosorani umo ŵalendo ŵa Yehova ŵakukanira “waliyose uyo ni mukazuzi.”
14 Lemba la Salimo 15:4 likuyowoya kuti mubwezi wa Yehova “wakukana waliyose uyo ni mukazuzi.” Kasi tingamanya wuli usange munyake ni mukazuzi? Pakuti ise ndise ŵanthu ŵambura kufikapo, tingamanya yayi usange munthu munyake ni mukazuzi panji yayi. Chifukwa wuli? Mwakawiro tingamba kutemwana na ŵanthu awo tikuyana vyakuchita, na kwamba kutinkha awo vyakuchita vyawo vikutikwenyerezga. Ntheura tikwenera kukana ŵekha awo Yehova waŵapima kuti “mbakazuzi” nadi. (1 Kor. 5:11) Ŵanthu aŵa ŵakusazgapo awo ŵakuchita vinthu viheni ndipo ŵakupera yayi, awo ŵakuyuyura vigomezgo vithu, panji awo ŵakuyezga kunanga ubwezi withu na Yehova.—Zinth. 13:20.
15. Kasi ni nthowa wuli yimoza iyo tingalongolera kuti tikuchindika “awo ŵakopa Yehova”?
15 Kweniso lemba la Salimo 15:4 likutiphalira kuti tikwenera kuchindika “awo ŵakopa Yehova.” Ntheura tikupenjerezga nthowa izo tingalongolera lusungu na ntchindi ku ŵabwezi ŵa Yehova. (Rom. 12:10) Nthowa yimoza iyo yikuyowoyeka pa lemba la Salimo 15:4, njakuti mulendo mu hema la Yehova “wakusintha yayi pa ivyo walayizga, nanga ni para vimuŵikenge paheni.” Kuleka kufiska ivyo talayizga kungakhuŵazga ŵanji. (Mat. 5:37) Mwachiyelezgero, Yehova wakukhazga kuti ŵalendo ŵake ŵasungilirenge chilapo chawo cha nthengwa. Wakukondwaso chomene para ŵapapi ŵakuŵikapo mtima kufiska ivyo ŵalayizga ŵana ŵawo. Kutemwa Chiuta na ŵazengezgani ŵithu, kutichiskenge kuchita vyose ivyo tingafiska mwakuti tifiske ivyo talayizga.
16. Kasi ni nthowa wuli yinyake iyo tingalongolera kuti tikuchindika ŵabwezi ŵa Yehova?
16 Nthowa yinyakeso iyo tingalongolera kuti tikuŵachindika ŵabwezi ŵa Chiuta, nkhuŵa wakupa kweniso kuŵa na mtima wakupokelera ŵalendo. (Rom. 12:13) Para tikupatura nyengo yakuchezgera na ŵabali na ŵadumbu, vikutovwira kuti tikhozge ubwezi withu na iwo kweniso na Yehova. Kweniso para tili na mzimu wakupokelera ŵalendo, ndikuti tikuyezga Yehova
GEGANI KUTEMWA CHOMENE NDALAMA
17. Chifukwa wuli lemba la Salimo 15 likuyowoya vya ndalama?
17 Mu Baibolo tikuŵazgaso kuti mulendo wa Yehova “wakubwerekeska ndalama zake kuti wasangirepo zapachanya chara, wakupokera chara chimbundi pa munthu wambura mulandu.” (Sal. 15:5) Chifukwa wuli salimo ili likuzunuraso vya ndalama? Chifukwa ntchakuti kuwona mwambura kwenelera ndalama kungakwenyerezga ŵanji na kunanga ubwezi withu na Chiuta. (1 Tim. 6:10) Mu nyengo yakale ŵanji ŵakalyeranga masuku pamutu ŵabali ŵawo ŵakavu, pakuŵatchaja chapachanya pa ndalama iyo ŵabwereka. Kweniso ŵeruzgi ŵanyake ŵakapokanga vimbundi ndipo pamanyuma ŵakeruzganga mwakutemwera. Kachitiro kanthena aka kakumuseluska Yehova.—Ezek. 22:12.
18. Kasi ni mafumbo wuli agho ghangatovwira kuti tijisande umo tikuwonera ndalama? (Ŵahebere 13:5)
18 Ntchiwemi chomene kujisanda pa umo tikuwonera ndalama. Jifumbani kuti: ‘Kasi kanandi nkhutemwa kughanaghana waka vya ndalama na ivyo ningagura? Usange nabwereka ndalama, kasi nkhuchedwa kuwezga na kughanaghana kuti munthu uyo wakanibwereka wakuzikhumba dankha yayi pasono? Kasi ndalama zikupangiska nijiwonenge wapachanya chomene kuluska ŵanji? Kasi ndine mukaka? Kasi nkhweruzga ŵabali na ŵadumbu kuti mbakutemwa chomene vinthu vyakuthupi chifukwa waka ŵali na ndalama? Kasi nkhutemwa kuŵa paubwezi na ŵanthu ŵasambazi na kugega ŵakavu?’ Ntchiwemi kujifumba mafumbo agha chifukwa tili na mwaŵi wapadera chomene wakuŵa ŵalendo ŵa Yehova. Tingalongora kuti tikuzirwiska mwaŵi uwu para tikugega kutemwa chomene ndalama. Para tichitenge nthena Yehova watilekenge yayi!—Ŵazgani Ŵahebere 13:5.
YEHOVA WAKUŴATEMWA ŴABWEZI ŴAKE
19. Chifukwa wuli Yehova wakukhumba kuti tichitenge vyose ivyo vikuyowoyeka mu Salimo 15?
19 Lemba la Salimo 15 likumalizga na layizgo lakuti: “Munthu uyo wakuchita vinthu ivi wasunkhunyikenge chara.” (Sal. 15:5) Apa wamasalimo wakutiphalira chifukwa chikuru icho tikwenera kuchitira ivyo Yehova wakukhumba. Yehova wakukhumba kuti tikondwenge. Ntheura wakutipa ulongozgi uwo utovwirenge kuŵa ŵakukondwa kweniso kuŵa ŵakuvikilirika.—Yes. 48:17.
20. Kasi ŵalendo ŵa Yehova wakulindilira mwakunweka vichi?
20 Ŵalendo ŵa Yehova ŵakulindilira mwakunweka vinthu viwemi kunthazi. Ŵakuphakazgika, Yesu waŵanozgera “malo ghanandi ghakukhalamo” kuchanya. (Yoh. 14:2) Awo ŵali na chilindizga chakuzakakhala pa charu chapasi, ŵakulindilira mwakunweka malayizgo agho ghali pa Chivumbuzi 21:3. Nadi, tose tikuwona kuti ni mwaŵi wapadera chomene kuti Yehova wakukhumba tiŵe ŵalendo mu hema lake kwamuyirayira!
SUMU 39 Pangani Zina Liwemi na Chiuta
