ŴANTHU ŵakukhumba kuŵa ŵachimwemwe. Kweni mu mazuŵa ghaumaliro agha, waliyose wakukumana na viyezgo ivyo ni ‘vyakusuzga.’ (2 Tim. 3:1) Ŵanyake ŵakuŵavya chimwemwe chifukwa cha vinthu vyambura urunji ivyo vikuŵachitikira, kusoŵa kwa ntchito, chitima, panji vinthu vinyake ivyo ŵakufipa navyo mtima. Ŵateŵeti ŵa Chiuta nawo ŵangaŵa na masuzgo agha ndipo ŵangaleka kuŵa ŵachimwemwe. Para ivi vyamuchitikirani, kasi mungachita wuli kuti muŵeso ŵachimwemwe?

Kuti tizgore fumbo ili, tiyeni timanye dankha umo chimwemwe chanadi chikuŵira ndiposo ivyo ŵanyake ŵakachita kuti ŵalutilire kuŵa ŵachimwemwe nangauli ŵakaŵa na masuzgo. Pamanyuma, tiwonenge ivyo tingachita kuti tilutilire kuŵa ŵachimwemwe kweniso kuti tisazgireko chimwemwe chithu.

Para munthu wakuseka panji wakondwa, tileke kughanaghana kuti ngwachimwemwe. Mwachiyelezgero, para munthu waloŵera, wangamba kusekaseka. Kweni para moŵa wamara, kuseka kose kukumalira papo, wakwambaso kukumbuka masuzgo ghake ndipo wakuŵaso wachitima. Ichi chikulongora kuti wanguŵa na chimwemwe chanadi yayi.—Zinth. 14:13.

Kweni chimwemwe chikufuma mu mtima. Chimwemwe ni ‘mukhaliro uwo munthu wakuŵa nawo para wali na chinthu chinyake chiwemi panji wakulindilira chinthu chiwemi.’ Para tili na chimwemwe, tilutilirenge kuŵa ŵakukondwa, mu nyengo ya masuzgo na ya mtende. (1 Tes. 1:6) Nanga munthu wangaŵa na masuzgo kweni wangalutilira kuŵa wachimwemwe. Mwachiyelezgero, ŵapositole ŵakathyapulika chifukwa cha kupharazga vya Khristu. Kweni “ŵakafumapo panthazi pa Khoti Likuru, ŵakasekeleranga pakuti ŵakapimika ŵakwenelera kuyuyulika chifukwa cha zina la Yesu.” (Mil. 5:41) Iwo ŵakasekelera chifukwa chakuti ŵakathyapulika yayi, kweni chifukwa chakuti ŵakagomezgeka kwa Chiuta uyo ŵakamuteŵeteranga.

Chimwemwe tikubabika nacho yayi kweniso chikwiza chekha yayi. Chifukwa wuli tikuyowoya nthena? Chifukwa chimwemwe chanadi ntchipambi cha mzimu utuŵa wa Chiuta. Mzimu wa Chiuta ungatovwira kuti tiŵe na “wunthu uphya” uwo muli chimwemwe. (Efe. 4:24; Gal. 5:22) Para tili na chimwemwe, vitisuzgenge yayi kuzizipizga masuzgo agho tikukumana nagho.

Yehova wakakhumbanga kuti mu charu muŵe vinthu viwemi pera. Wakakhumbanga yayi kuti muŵe viheni ivyo tikuwona mazuŵa ghano. Kweni Yehova wakulutilira kuŵa na chimwemwe nanga ŵanji ŵangachita viheni. Mazgu gha Chiuta ghakuti: “Nkhongono na chimwemwe vili mu malo ghake ghakukhalamo.” (1 Mid. 16:27) Kweniso vinthu viwemi ivyo ŵateŵeti ŵa Yehova ŵakuchita, ‘vikukondweska mtima’ wake.—Zinth. 27:11.

Para tingaleka kutaya mtima usange vinthu vindayende umo taghanaghaniranga ndikuti tikuyezga Yehova. M’malo mwa kuleka kuŵa ŵachimwemwe, tikwenera kukumbuka viwemi ivyo tili navyo sono na kulindilira viwemi ivyo vili kunthazi. *

 Baibolo likuzunura ŵanthu ŵanandi awo ŵakalutilira kuŵa ŵachimwemwe nangauli ŵakakumananga na masuzgo. Abrahamu wakalutilira kuŵa wachimwemwe nanga ni apo umoyo wake ukaŵa pangozi kweniso apo wakakumananga na masuzgo agho ŵanji ŵakambiska. (Gen. 12:10-20; 14:8-16; 16:4, 5; 20:1-18; 21:8, 9) Nangauli Abrahamu wakasangana na masuzgo agha, kweni wakalutilira kuŵa wachimwemwe. Kasi chikamovwira ntchivichi? Wakaŵa na chigomezgo kuti kunthazi wazamukhala mu charu chiphya icho Mesiya ndiyo wazamuŵa Fumu. (Gen. 22:15-18; Heb. 11:10) Yesu wakati: “Wiskemwe Abrahamu wakasekelera chomene apo wakalindiliranga kuti wawone zuŵa lane.” (Yoh. 8:56) Para tikughanaghanira vinthu vyakukondweska ivyo vili kunthazi ndikuti tikuchita vinthu nga ni Abrahamu.—Rom. 8:21.

Nga ni Abrahamu, mpositole Paulosi na Sila nawo ŵakakumbukanga ivyo Chiuta wali kulayizga. Ŵakaŵa na chipulikano chakukhora ndipo ŵakalutilira kuŵa ŵachimwemwe nangauli ŵakakumananga na masuzgo. Mwachiyelezgero, ŵakati ŵatimbika chomene na kujalirika mu jele, “pakati pa usiku, [iwo] ŵakalombanga na kwimba sumu kulumba Chiuta.” (Mil. 16:23-25) Padera pa kukondwa chifukwa cha chigomezgo icho ŵakaŵa nacho, Paulosi na Sila ŵakaŵaso ŵakukondwa chifukwa chakuti ŵakasuzgika chifukwa cha zina la Khristu. Para tikukumbuka viwemi ivyo vikwiza chifukwa cha kuteŵetera Chiuta mwakugomezgeka ndikuti tikuyezga Paulosi na Sila.—Fil. 1:12-14.

Mazuŵa ghano napo pali ŵabali na ŵadumbu ŵanandi awo ŵakulutilira kuŵa ŵachimwemwe nangauli ŵakukumana na masuzgo. Mwachiyelezgero, mu Novembala 2013, chimphepo chakuchemeka Super Typhoon Haiyan chikananga vinthu pa chigaŵa cha pakati cha Philippines, ndipo chikabwangandura nyumba za mabanja ghakujumpha 1,000 gha Ŵakaboni. George, wakaŵa na nyumba mu msumba wa Tacloban ndipo yose yikabwanganduka. Iyo wakati: “Nangauli nyumba zikabwanganduka, kweni ŵabali mbakukondwa. Nkhutondeka na kulongosora wuwo chimwemwe icho tili nacho.” Para tasangana na masuzgo ghakuru, tilutilirenge kuŵa ŵachimwemwe usange tikukumbuka ivyo Yehova watichitira. Ni vinthu wuli vinyake ivyo Yehova wali kutipa ivyo vikutovwira kuŵa ŵachimwemwe?

Ubwezi withu na Yehova ntchifukwa chikuru chomene icho tiliri ŵachimwemwe. Ghanaghanirani waka! Tikumanya Fumu ya chilengiwa chose. Iyo ni Dada withu, Chiuta withu, kweniso Mubwezi withu.—Sal. 71:17, 18.

Chifukwa chinyake icho tikuŵira ŵachimwemwe ntchakuti tili na umoyo, uwo ntchawanangwa. (Muph. 3:12, 13) Pakuti tili na mahara ndipo tili kuguzika na Yehova, tikumanya kuti wakutikhumbira viwemi. (Kol. 1:9, 10) Ntheura tikukondwa na umoyo ndipo tikumanya uko tafuma na uko tikuya. Kweni ŵanthu ŵanandi ŵakumanya yayi uko ŵafuma na uko ŵakuya. Kuti wadidimizge fundo iyi, Paulosi wakalemba kuti: “‘Palije munthu uyo wali kuwonapo panji kupulikapo, nesi kughanaghanirapo mu mtima wake vinthu ivyo Chiuta wanozgera awo ŵakumutemwa.’ Pakuti Chiuta wali kutivumbulira ise vinthu ivi kwizira mu mzimu wake.” (1 Kor. 2:9, 10) Tikukondwa chomene kuti tikupulikiska khumbo na chilato cha Yehova. Ni nthena yayi?

Wonani vinyake ivyo Yehova wachitira taŵanthu ŵake. Kasi tikukondwa yayi kuti zakwananga zithu zingagowokereka? (1 Yoh. 2:12) Chifukwa chakuti Chiuta wali na lusungu, tili na chigomezgo chose kuti sonosono apa charu chiphya chizenge. (Rom. 12:12) Nanga ni sono nthena, Yehova watipa ŵabali na ŵadumbu ŵawemi. (Sal. 133:1) Kweniso Mazgu gha Chiuta ghakutisimikizgira kuti Yehova wakutivikilira kwa Satana na viŵanda vyake. (Sal. 91:11) Chimwemwe chithu chikukura chomene para tikughanaghanira vitumbiko vyose ivyo Chiuta watipa.—Fil. 4:4.

Kasi Mkhristu uyo ngwachimwemwe kale wangasazgirako chimwemwe chake? Yesu wakati: “Namuphalirani vinthu ivi kuti chimwemwe chane chiŵe mwa imwe, ndipo chimwemwe chinu chifuluke.” (Yoh. 15:11) Lemba ili likulongora kuti chimwemwe chithu chingalutilira kufuluka  panji kuti kukura. Ivyo tikuchita kuti chimwemwe chithu chikure tingaviyaniska na kusonkhezga moto. Moto ukubuka chomene para mukusonkhako nkhuni. Mwakuyana waka, tikwenera kurya chakurya chauzimu kuti chimwemwe chithu chikure. Kumbukani kuti mzimu wa Chiuta ndiwo ukutovwira kuŵa ŵachimwemwe. Ntheura, chimwemwe chithu chikurenge chomene para nyengo zose tikulomba Yehova kuti watipe mzimu wake na kughanaghanirapo pa Mazgu ghake agho ngakupelekeka na mzimu wake utuŵa.—Sal. 1:1, 2; Luka 11:13.

Kweniso chimwemwe chithu chikukura para nyengo zose tikuchitako milimo iyo yikukondweska Yehova. (Sal. 35:27; 112:1) Chifukwa wuli? Chifukwa tili kulengeka kuti ‘topenge Chiuta waunenesko na kusunga malango ghake, pakuti ichi ndicho munthu wakwenera kuchita.’ (Muph. 12:13) Tingayowoyaso kuti, tili kulengeka kuti tichitenge khumbo la Chiuta. Ntheura para tikuteŵetera Yehova, tikukondwa chomene na umoyo. *

Para tili na chimwemwe chakufuma kwa Chiuta, tiŵenge ŵakukondwa kweniso tisangenge vyandulo vinyake. Mwachiyelezgero, Adada ŵithu ŵakuchanya ŵakondwenge nase chomene para tikuŵateŵetera mwachimwemwe nanga tingakumana na masuzgo wuli. (Doto. 16:15; 1 Tes. 5:16-18) Kweniso para tili na chimwemwe chanadi, tidangizgenge vinthu vyakuthupi yayi kweni tijinorenge vinthu vinyake mwakuti tiŵike vinthu vya Ufumu wa Chiuta pakwamba. (Mat. 13:44) Apo tikuwona viwemi ivyo vikuŵapo chifukwa cha kudangizga vinthu vya Ufumu, chimwemwe chithu chikurenge chomene, tikhorwenge na umoyo, ndipo tiwovwirengeso ŵanji kuŵa ŵachimwemwe.—Mil. 20:35; Fil. 1:3-5.

Munthu munyake wakusanda vya umoyo pa Yunivesite ya Nebraska ku United States wakalemba kuti: “Para uli na chimwemwe kweniso ukukhorwa na umoyo sono, ungazakaŵaso na umoyo uwemi kunthazi.” Wakayowoya mazgu agha wati wasanda ivyo ŵa kafukufuku wa vya umoyo ŵakupambanapambana ŵakasanga. Mazgu agho wakayowoya ghakukolerana na mazgu gha mu Baibolo, ghakuti: “Mtima wachimwemwe ni munkhwala uwemi.” (Zinth. 17:22) Nadi, para chimwemwe chinu chikukura, muŵenge na umoyo uwemi.

Nangauli tili mu charu cha masuzgo, kweni tingaŵa ŵakukondwa nadi. Ichi chingachitika usange tikulomba mzimu utuŵa kwa Yehova, kusambira Mazgu ghake, na kughanaghanirapo pa ivyo tasambira. Kweniso chimwemwe chithu chikukura para tikukumbuka vitumbiko ivyo tili navyo sono, para tikuyezga chipulikano cha ŵanji, na kuchita khumbo la Chiuta. Para tikuchita vinthu ivi, mazgu gha pa Salimo 64:10 ghaŵenge ghaunenesko kwa ise. Ghakuti: “Murunji wasekelerenge mwa Yehova na kubisama mwa iyo.”