IVYO ŴANYAKE ŴAKUYOWOYA

Ŵanthu ŵanandi ŵakuwona kuti kutchova njuga nkhuwemi waka, chikuru uko ŵakukhala ntchakuzomerezgeka. Mu vyaru vinyake malango ghakuzomerezga kuchita maseŵero gha kutchova njuga. Nakuti nyengo zinyake boma likupeleka na vinthu vinyake kuti viŵawovwirenge pa maseŵero agha.

IVYO BAIBOLO LIKUYOWOYA

Baibolo likuyowoya mwakudunjika yayi pa nkhani ya kutchova njuga. Kweni likupeleka fundo izo zikutovwira kumanya umo Chiuta wakuwonera nkhani ya kutchova njuga.

Ivyo vikuchitika pa kutchova njuga vikususkana na fundo za mu Baibolo, chifukwa munthu wakuwina ndalama izo wandazigwilire ntchito ndipo vikuyana waka na kwibira ŵanthu. Ndipo Baibolo likuti “chenjerani na mtundu uliwose wa uryezi.” (Luka 12:15) Nakuti uryezi ndiwo ukupangiska kuti munthu watchovenge njuga. Ŵanthu awo ŵakupangiska njuga ŵakuchemelera kuti ŵanthu ŵanandi ŵangawina ndalama zinandi chomene, kweni kuyowoya unenesko ŵakwibira waka ŵanthu, chifukwa ŵeneko ŵakumanya kuti ŵanthu ŵakukhumba kusambazga, ntheura ŵangaleka yayi kuseŵera njuga. Ivi vikupangiska kuti iwo ŵasangenge ndalama zinandi. Kutchova njuga kukupangiska kuti ŵanthu ŵaŵenge ŵaryezi chifukwa ŵakukhumba kusanga ndalama kwambura kusuzgikira.

Ŵanthu awo ŵakutchova njuga ŵakuŵa ŵakujighanaghanira waka ŵekha: iwo ŵakuwina ndalama izo ŵanyawo ŵaluza. Kweni Baibolo likutichenjezga kuti “waliyose waleke kupenja icho ntchachandulo kwa iyo, kweni icho ntchachandulo kwa munthu munyake.” (1 Ŵakorinte 10:24) Ndipo limoza mwa malango 10 agho Yehova wakapeleka ku Ŵaisrayeli likatenge: “Ungadokeranga . . . chara . . . chinthu chilichose cha munyako.” (Ekisodo 20:17) Usange munthu wakutchova njuga wakukhumba kuti ŵanyake ŵaluze kuti iyo ndiyo wawine, ivi vikuyana waka na kudokera ndalama zamwene.

Baibolo likususkana na fundo yakuti munthu wakutumbikika chifukwa chakuti wali na mwaŵi. Mu nyengo ya Ŵaisrayeli, ŵanandi ŵakaŵavya chipulikano mwa Chiuta ndipo ‘ŵakanozgeranga thebulu chiuta wa Mwaŵi.’ Kasi Chiuta wakazomerezganga kuti ŵanthu ŵasopenge “chiuta wa Mwaŵi”? Yayi. Iyo wakaŵaphalira kuti: “Mukalutilira kuchita viheni pamaso pane, ndipo mukasankha ivyo vikunikwiyiska.”—Yesaya 65:11, 12.

Mu vyaru vinyake malango ghakuzomerezga kutchova njuga, ndipo ndalama izo ŵakusanga pa maseŵero agha zikovwira pa vinthu nga masambiro, chitukuko kweniso ntchito zinyake zakovwira ŵanthu wose. Nangauli vili nthena, kweni vikusintha yayi fundo yakuti awo ŵakuchita maseŵero agha mbaryezi, ndipo ŵakusanga phindu pa vinthu ivyo ŵandagwilirepo ntchito. Nakuti vikukhuŵirizga fundo yakuti munthu wangavuna apo ŵandaseŵe.

“Ungadokeranga . . . chara . . . chinthu chilichose cha munyako.”—Ekisodo 20:17.

IVYO BAIBOLO LIKUYOWOYA

Baibolo likuchenjezga kuti “awo ŵakukhumbisiska kuŵa ŵasambazi, ŵakuwira mu chiyezgo na chipingo ndiposo mu makhumbiro ghanandi ghauzeleza na ghakupweteka, agho ghakunjizga ŵanthu mu masuzgo na pharanyiko.” (1 Timote 6:9) Ŵanandi ŵakutchova njuga chifukwa cha uryezi, ndipo Baibolo likuti uryezi ntchimoza mwa nkharo ziheni izo munthu wakwenera kuzigega.—Mupharazgi 5:3.

Kanandi ŵanthu awo ŵakutchova njuga ŵakukhumba kusambazga luŵiro, ivi vikupangiska kuti ŵatemwenge chomene ndalama. Nakuti Baibolo likuti kutemwa ndalama “ni msisi wa mtundu uliwose wa vinthu vyakupweteka.” Kutemwa chomene ndalama kungapangiska munthu kwenjerwa chomene, ndipo ivi vingananga chipulikano chake mwa Chiuta. Baibolo likuti awo ŵakuwira mu chipingo chakutemwa chomene ndalama, ‘ŵakujilasa bwekabweka na vyakuŵinya vinandi.’—1 Timote 6:10.

Uryezi ukupangiska munthu kuleka kukhorwa na ivyo wali navyo ndipo wakukondwa yayi na umoyo. “Uyo wakutemwa siliva wakhorwenge nalo yayi, nanga ni uyo wakutemwa chuma kukhorwa na ivyo wakusanga.”—Mupharazgi 5:10.

Kanandi ŵanthu awo kutchova njuga kwaŵanjira mu ndopa, ŵakujipulika makora yayi para ŵakhala waka kwambura kutchova njuga. Kafukufuku ukulongora kuti suzgo ili ndikuru chomene ku united states.

Ntharika yinyake yikuti: “Chiharo icho pakwamba chapokeka mu umbunu, chiŵenge thumbiko yayi paumaliro.” (Zintharika 20:21) Kanandi ŵanthu awo ŵali na chizgoŵi chakutchova njuga ŵakuŵa na ngongoli zinandi, nthengwa zikumara, ŵakukavuka, ŵakuŵavya ŵabwezi kweniso ntchito zikumara. Para munthu wakulondezga fundo za mu Baibolo, wangasangana yayi na masuzgo agho ŵanthu awo ŵakutchova njuga ŵakusangana nagho, ndipo waŵenge wakukondwa.

“Awo ŵakukhumbisiska kuŵa ŵasambazi, ŵakuwira mu chiyezgo na chipingo ndiposo mu makhumbiro ghanandi ghauzeleza na ghakupweteka, agho ghakunjizga ŵanthu mu masuzgo na pharanyiko.”—1 Timote 6:9.