Yesu wakaŵa mu sunagoge ku Kaperenaumu. Wakasambizganga ŵanthu kuti iyo ni chingwa chakufuma kuchanya. Wakalutizganga waka ivyo wakaphalira ŵanthu awo ŵakafuma kumafumiro gha dazi kwa Nyanja ya Galileya, awo wakaŵalyeska vingwa na somba.

Yesu wakalutilira kuyowoya. Wakati: “Ŵasekuru ŵinu ŵakarya mana mu mapopa, kweni ŵakafwa.” Kuti walongore kuti chingwa chira chikaŵa chakuzirwa pachoko, iyo wakati: “Ndine chingwa cha umoyo icho chikakhira kufuma kuchanya. Usange munthu wakuryako chingwa ichi, wazamuŵa wamoyo muyirayira. Nakuti chingwa icho nipelekenge ni thupi lane m’malo mwa umoyo wa charu.”—Yohane 6:48-51.

Mu 30 C.E., Yesu wakaphalira Nikodemo kuti Chiuta wakatemwa chomene charu lekani wakapeleka Mwana wake kuti wawombore ŵanthu. Kweni sono Yesu wakayowoya chomene za kukhumbikwa kwa kurya thupi lake na kuŵa na chipulikano mu sembe iyo wakaŵa pafupi kupeleka. Ndivyo munthu wakwenera kuchita kuti wazakasange umoyo wamuyirayira.

Kweni ŵanthu ŵakakolerana nagho yayi mazgu gha Yesu. Iwo ŵakati: “Kasi munthu uyu wangatipa wuli thupi lake kuti tirye?” (Yohane 6:52) Yesu wakakhumbanga kuti ŵamanye kuti wakung’anamura kurya thupi lanadi yayi. Ivyo wakayowoya pamanyuma ndivyo vikulongora.

Iyo wakati: “Kwambura kuti mwarya thupi la Mwana wa munthu na kumwa ndopa zake, mulije umoyo mwa imwe. Waliyose uyo wakurya thupi lane na kumwa ndopa zane wali na umoyo wamuyirayira, . . . Pakuti thupi lane ntchakurya cheneko, ndipo ndopa zane ntchakumwa cheneko. Waliyose uyo wakurya thupi lane na kumwa ndopa zane wakukhalilira mu umoza na ine.”—Yohane 6:53-56.

Ŵayuda awo ŵakapulikizganga mazgu agha ŵakwenera kuti ŵakakhuŵara chomene! Ŵakaghanaghananga kuti Yesu wakuŵatuma kuti ŵaryenge ŵanthu kweniso kuswa Dango la Chiuta ilo likukanizga kurya ndopa. (Genizesi 9:4; Levitiko 17:10, 11) Kweni Yesu wakang’anamuranga kurya thupi lanadi panji kumwa nadi ndopa yayi. Wakang’anamuranga kuti wose awo ŵakukhumba umoyo wamuyirayira ŵakwenera kuŵa na chipulikano mu sembe iyo wakaŵa pafupi kupeleka. Iyo wakaŵa pafupi kupeleka thupi lake lambura kwananga na kuthiska ndopa zake. Kweni nanga mbasambiri ŵake ŵanandi ŵakapulikiska yayi chisambizgo ichi. Ŵanyake mwa iwo ŵakati: “Mazgu agha ngakuzizika, ni njani wangaghapulikizga?”—Yohane 6:60.

Yesu wakamanya kuti ŵasambiri ŵake ŵanyake ŵakunyunyuta, ntheura wakafumba kuti: “Kasi ichi chikumukhuŵazgani? Kasi muchitenge wuli para mungawona Mwana wa munthu wakukwelera uko wakaŵa kale? . . . Mazgu agho namuphalirani ni mzimu ndipo mbumoyo. Kweni mwaŵanyake mukugomezga chara.” Chifukwa cha mazgu agha, ŵasambiri ŵanandi ŵakafumapo ndipo ŵakaleka kumulondezga.—Yohane 6:61-64.

Ntheura Yesu wakafumba ŵapositole ŵake 12 kuti: “Kasi namwe mukukhumba kuluta?” Petrosi wakazgora kuti: “Fumu, tilute tiye kwa njani? Imwe muli na mazgu gha umoyo wamuyirayira. Tagomezga na kumanya kuti imwe ndimwe Mutuŵa wa Chiuta.” (Yohane 6:67-69) Apa ŵapositole ŵakalongora kuti mbakugomezgeka chomene. Nangauli pa nyengo iyi Petrosi na ŵapositole ŵanyake ŵakapulikiska yayi ivyo Yesu wakang’anamuranga, kweni ŵakamuleka yayi.

Yesu wakakondwa chomene na ivyo Petrosi wakazgora, wakati: “Asi nkhamusorani 12? Ndipouli, yumoza wa imwe ngwakusesa.” (Yohane 6:70) Yesu wakanenanga Yudasi Isikariyoti. Vingachitika kuti pa nyengo iyi, Yesu wakamba kuwona tunkharo tuheni mwa Yudasi.

Nangauli vikaŵa nthena, kweni Yesu wakaŵa wakukondwa kumanya kuti Petrosi na ŵapositole ŵanyake ŵakaleka yayi kumulondezga. Ŵakalutilira kuchita mulimo wa kuponoska umoyo.