SAMBIRO 2
Rabeka Wakakhumbanga Kukondweska Yehova
Rabeka wakatemwanga Yehova. Mfumu wake wakaŵa Yisake. Nayo wakatemwanga Yehova. Kasi Rabeka wakasangana wuli na Yisake? Kasi wakalongora wuli kuti wakakhumbanga kukondweska Yehova? Tiye tisambire vinandi vya Rabeka.
Ŵapapi ŵa Yisake ŵakaŵa Abrahamu na Sara. Ŵakakhalanga ku Kenani, uko ŵanthu ŵakasopanga Yehova yayi. Kweni Abrahamu wakakhumbanga kuti mwana wake wakatore mwanakazi uyo wakasopanga Yehova. Ntheura Abrahamu wakatuma muteŵeti wake kuluta ku Harani, uko ŵabali ŵake ŵakakhalanga, kuti wakapenjere Yisake mwanakazi. Muteŵeti uyu wakwenera kuti wakaŵa Eliyezeri.
Rabeka wakazomera kutekera maji ŵangamira
Eliyezeri wakaluta na ŵateŵeti ŵanyake ŵa Abrahamu. Ukaŵa ulendo utali comene. Ŵakaŵa na ŵangamila 10 awo ŵakayegha vyakurya na vyawanangwa. Kasi nchivici ico cikawovwira Eliyezeri kumanya uyo waŵenge muwoli wa Yisake? Eliyezeri na ŵateŵeti ŵanyake ŵati ŵafika ku Harani, ŵakalindilira pa cisimi cifukwa Eliyezeri wakamanya kuti ŵanthu ŵizenge kuzakateka maji. Wakalomba kwa Yehova, wakati: ‘Mwali uyo nimulombenge maji, ndipo wanipenge ine na ŵangamila ŵane, nimanyenge kuti ndiyo mwasora.’
Eliyezeri wacali kulomba, Rabeka wakiza ku cisimi. Baibolo likuti wakaŵa wakutowa comene. Eliyezeri wakamulomba maji ghakumwa, ndipo iyo wakati, ‘Agha mwani, ndipo ninegherengeso ŵangamila ŵinu mpaka wose ŵamwe.’ Ŵangamila para ŵali na nyota ŵakumwa maji ghanandi comene. Ntheura Rabeka wakacimbilira ku cisimi kanandi waka. Kasi wawona umo Rabeka watangwanikira pa cithuzithuzi apa?— Eliyezeri wakazizwa na umo Yehova wakazgolera lurombo lwake.
Eliyezeri wakapa Rabeka vinthu vinandi vyakutowa. Rabeka wakacemera Eliyezeri na awo wakaŵa nawo kunyumba kwa adada ŵake. Eliyezeri wakalongosora cifukwa ico wakizira na umo Yehova wakazgolera lurombo lwake. Ŵapapi ŵa Rabeka na mudumbu wake ŵakakondwa comene kuti watorane na Yisake.
Rabeka wakaluta ku Kenani na Eliyezeri na kutengwa kwa Yisake
Kweni kasi ukughanaghana kuti Rabeka wakakhumba kutengwa kwa Yisake?— Rabeka wakamanya kuti Yehova ndiyo wakatuma Eliyezeri. Ŵapapi ŵa Rabeka na mudumbu wake ŵati ŵamufumba usange wakukhumba kuluta ku Kenani kukatengwa kwa Yisake, iyo wakati: ‘Nilutenge.’ Nyengo yeneyiyo wakanyamuka na Eliyezeri. Ŵati ŵafika ku Kenani, Rabeka wakatorana na Yisake.
Cifukwa Rabeka wakacita ivyo Yehova wakakhumbanga, Yehova wakamutumbika. Vyaka vinandi vyati vyajumphapo, Yesu wakababika kufuma mu mbumba yake. Para ukondweskenge Yehova nga umo wakacitira Rabeka, nawe wakutumbikenge.
