GEORGIA
“Kwa Chiuta Vinthu Vyose Ni Vyamachitiko”
Natela Grigoriadis
-
WAKABABIKA MU 1960
-
WAKABATIZIKA MU 1987
-
MBIRI YAKE Natela wakaŵa manejara pa kampani ya vyamalonda ndipo wakamanyananga na ŵanthu ŵanandi. Ntheura wakati wabatizika waka, wakawovwira chomene kuti ŵambe kusindikizga mabuku mwakabisira.
M’MA 1980, pa maungano ghithu, mubali uyo wakachitiskanga Sambiro la Gongwe la Mulinda ndiyo yekha wakaŵanga na magazini. Nakuti kanandi likaŵanga lakulembeka pa mawoko. Nkhakumana na mubali Genadi Gudadze, yumoza wa ŵalara, ndipo nkhamufumba usange vingachitika kuti tiyezge kusindikizga magazini ghithu.
Vyaka vyakumasinda, ŵabali ŵakapanga mashini agho ŵakasindikizgirangapo mabuku ghachoko waka. Kweni kuti nyengo zose ŵapangenge magazini, pakakhumbikwiranga mashini ghawemi, munthu wakumanya kutayipa, tayipilayitara, kweniso mapepara ghakukwana. Ndipouli, kuti munthu waŵe na vyakupulintira, nanga ghangaŵa mapepara, wakeneranga kulembeska dankha ku boma. Gulu lapadera la ŵapolisi ndilo likendeskanga vyose ivi.
Nkhaŵa na munyane uyo tikamanyananga chomene, ndipo wakaŵa na mwaŵi wakuti wanganisangira mashini agho boma likaŵavya nagho ntchito. Munthu uyu ndiyo wakanovwira kuti nisange tayipilayitara. Mukuru wane wakamanyanga kutayipa ndipo wakaŵa wakunozgeka kutovwira. Ŵabali ŵakapanga mashini ghanyake ghakusindikizgira mabuku, kweniso ŵakasanga malo ghakugurako mapepara. Vyose vikenda makora, ndipo nakalinga Gongwe la Mulinda lakwamba mu Chigeorgia likasindikizgika.
Kweni pakasangika suzgo linyake. Zuŵa linyake, Mubali Genadi wakaniphalira kuti: “Tisangeso malo ghanyake ghakugurako mapepara.” Mubali uyu wakawona mapepara ghanandi mu ofesi ya boma, kweni wakatondeka kugura chifukwa ŵaboma ŵakamuŵendanga. Tikajifumbanga umo tingaghasangira mapepera agha. Ine nkhayowoya kanandi waka kuti: “Vingachitika yayi kughasanga!” Mubali Genadi wakanizgora na chikanga kuti: “Leka kuyowoya kuti, ‘Vingachitika yayi.’ ‘Kwa Chiuta vinthu vyose ni vyamachitiko!’”—Mat. 19:26.
Zuŵa lakulondezgapo, apo nkhalutanga ku ofesi ya boma iyi, nkhaghanaghaniranga waka ivyo mubali Genadi wakayowoya. Yehova wakanilongozgera kwa mwanakazi munyake uyo wakagwiranga ntchito ya kutayipa mu ofesi iyi. Mwanakazi uyu wakazomera kukapeleka pempho lane kwa bwana wake. Uwemi ngwakuti bwana uyu wakaŵa mfumu wake. Kufuma waka pa nyengo iyi, nkhaguranga mapepara mu ofesi iyi, ndipo suzgo la mapepara nalo likamalira papo.
