CHIGEORGIA ntchimoza mwa viyowoyero ivyo Baibolo likamba kung’anamulika. Viyowoyero vinyake ni Chiarmenia, Chikopitiki, Chilatini, Chisiriya, na vinyake. Ukaboni ukulongora kuti mipukutu yakale ya Makani Ghawemi mu Chigeorgia, makalata gha Paulosi, na Masalimo yikalembeka m’ma 450 C.E. panji kumasinda. Mu vyaka vyakulondezgapo, ŵanthu ŵakalutilira kung’anamura na kukopera Baibolo mu Chigeorgia, lekani pali Mabaibolo ghanandi gha chiyowoyero ichi. *

Ivyo ŵanthu ŵanyake ŵa ku Georgia ŵakulemba mu mabuku kweniso makhaliro gha ŵanthu, vikulongora kuti ŵakutolera ivyo vili mu Baibolo. Mwachiyelezgero, nkhani yachitima ya Fumukazi Shushanik, iyo panji yikalembeka cha kuumaliro wa 400 C.E., muli mazgu ghanyake agho ghali kutoleka mu Baibolo. Mu powemu yake (The Knight in the Panther’s Skin), iyo yikalembeka cha m’ma 1220, Shota Rustaveli wakazunuramo vya makhaliro gha Ŵakhristu. Wakalemba vyakukhwaskana na ubwezi, lusungu, na kutemwa ŵalendo. Ŵanthu ŵa ku Georgia ŵachali kughachindika chomene makhaliro agha.