KASI ukumanya cifukwa ico mwanalume uyu wakupalulira munjilira wake? Yehova ndiyo wakamuphalira kuti wacite ntheura. Mwanalume uyu ni Ahiya, nchimi ya Ciuta. Kasi nchimi ukuyimanya? Nchimi zikaŵanga ŵanthu awo Ciuta wakaŵaphaliranga vinthu ivyo vikeneranga kucitika kunthazi.

Ahiya wakayowoya na Yeroboamu. Yeroboamu wakaŵa mwanalume uyo Solomoni wakamuŵika kuti walaŵilirenge milimo yake ya kuzenga. Wakati wakumana na Yeroboamu pa nthowa, Ahiya wakacita cinthu cinyake cakuziziswa. Wakavura munjirira wake wuphya na kuwupalura mu vizwazwa 12. Wakaphalira Yeroboamu kuti: ‘Tola vizwazwa 10 ivyo.’ Kasi ukumanya cifukwa ico Ahiya wakapelekera vizwazwa 10 kwa Yeroboamu?

Ahiya wakalongosora kuti Yehova wakeneranga kupoka ufumu mu mawoko gha Solomoni. Wakayowoya kuti Yehova wazamupeleka mafuko 10 kwa Yeroboamu. Ici cikang’anamura kuti Rehoboamu, mwana wa Solomoni, wakeneranga kukhala na mafuko ghaŵiri pera.

Solomoni wakati wapulika ivyo Ahiya wakaphalira Yeroboamu, wakakwiya comene. Wakakhumba kukoma Yeroboamu. Kweni Yeroboamu wakacimbilira ku Egupto. Pakati pajumpha nyengo yicoko waka, Solomoni wakafwa. Wakaŵa fumu kwa vilimika 40, pamanyuma pake Rehoboamu mwana wake ndiyo wakaŵa fumu. Ku Egupto Yeroboamu wakapulika kuti Solomoni wafwa, ntheura wakawelera ku Israyeli.

Rehoboamu wakaŵa fumu yiwemi yayi. Wakaŵa muheni comene kuluska umo Solomoni dada wake wakaŵira. Yeroboamu na ŵanthu ŵanyake ŵakuzirwa ŵakaluta kwa Fumu Rehoboamu na kumupempha kuti wacitirenge ŵanthu vinthu viwemi. Kweni Rehoboamu wakapulikira yayi. Nakuti, wakaŵa muheni comene kuluska pakwamba. Mwantheura ŵanthu ŵakimika Yeroboamu kuti ŵawe fumu ya mafuko 10, kweni mafuko ghaŵiri gha Benjamini na Yuda ghakaŵa ghacali kuwusika na Rehoboamu.

Yeroboamu wakakhumba yayi kuti ŵanthu ŵake ŵalutenge ku Yerusalemu kukasopa mu tempele la Yehova. Antheura wakapanga ŵana ŵa ng’ombe ŵaŵiri ŵa golide na kucitiska ŵanthu ŵa ufumu wa mafuko 10 kuyamba kuŵasopa. Mwambura kucedwa caru cikazura na viwawa.

Ufumu wa mafuko ghaŵiri nawoso ukaŵa mu masuzgo. Pandajumphe vilimika vinkhondi kufumira apo Rehoboamu wakaŵira fumu, fumu ya Egupto yikiza kuzakarwa nkhondo na Yerusalemu. Yikatora vinthu vinandi mu tempele la Yehova. Ntheura kwa nyengo yicoko waka tempele likayana na umo likaŵira lati lazengeka waka.