Apo Cimanyisko ca Ciuta Cikuzura Caru Capasi
Cipaturo 19
Apo Cimanyisko ca Ciuta Cikuzura Caru Capasi
1, 2. Kasi cilengiwa ca Yehova cikizakanangika uli?
GHANAGHANIRANI kuti nkwanta yakujambura yamarizga waka kujambura cithuzithuzi cakutowa. Iyo yikuciwona cakutowa nadi—caluso nkanira! Kweni mu usiku murwani wasanje wacinanga. Ncakupulikikwa nadi, kuti ici cikupangiska wakujambura uyu kuŵa wakukwenyerera comene. Iye ngwakukhumbisiska kuwona kuti murwani uyu wajaririke! Ndipo mungayerezgera waka umo wakujambura uyu wanganwekera kuti cithuzithuzi cake ciwezgekereposo nga mpakwamba.
2 Nga ngwakujambura yura, Yehova wakalenga caru capasi fikepo cakutowa ndiposo mwaluso nakuŵikamo mtundu wa ŵantu kuti ukhalemo. Pamanyuma pakuti walenga mwanarume na mwanakazi, iye wakati vyose ivyo wakalenga vikaŵa “viweme comene.” (Genesis 1:31) Adamu na Heva ŵakaŵa ŵana ŵake Ciuta, ndipo wakaŵatemwa. Iye wakawonerathu muntazi mwawo mwakukondweska, mwaucindami. Nadi, Satana wakaŵagaruska, kweni cilengiwa cakutowa ca Ciuta kuti cikanangika mwakuti cingatondeka kunozgeka cara.—Genesis 3:23, 24; 6:11, 12.
3. Kasi ncici ico ndi “umoyo weneco”?
3 Ciuta wasimikizga kunozgaso vintu kuŵa nga ndi umo vikaŵira pakwamba. Iye mwakutemwa wakukhumba kutiwona ise tikukhala na umoyo mwantowa iyo iye wakakhumbira pakudanga. Umoyo withu wufupi kweniso wamasuzgo kuti ndiwo “mbumoyo weneco” cara, pakuti uli kantu yayi pakuyerezgera na uwo Yehova wakutighanaghanira. ‘Umoyo weneco’ uwo Ciuta wakutikhumbira ise ni “umoyo wamuyirayira” pasi pa mikhaliro yiweme.—1 Timote 6:12, 19.
4, 5. (a) Kasi cirindizga ca Paradiso cizamkukwaniriskika uli? (b) Kasi cifukwa ncici tikwenera kughanaghanira za cirindizga cithu camuntazi?
4 Cimanyisko ca Ciuta cikwiziska mphingo pamaso pa Yehova. (Yakobe 4:17) Kweni aghanaghanani za vitumbiko ivyo mwizamkuzaya navyo usange mukugwiriskira ncito cimanyisko ico nakupenja umoyo wamuyirayira. Mu Mazgu ghake, Baibolo, Yehova wapereka cithuzithuzi cakutowa comene ca umo umoyo wizamkuŵira mu caru capasi ca Paradiso uyo waneng’enera pafupi. Mwanadi, nga mbantu ŵa Yehova kuti tikuteŵetera Ciuta waka cifukwa cakukhumba njombe cara. Tikumuteŵetera Ciuta cifukwa tikumtemwa. (Marko 12:29, 30) Nakwenenako, kuti tikusanga umoyo nga ndi malipo ghakumuteŵetera Yehova cara. Umoyo wamuyirayira ncawanangwa cakufuma kwa Ciuta. (Ŵaroma 6:23) Ciŵenge cakutipindulira kuranguruka pa umoyo wanteura cifukwa cirindizga ca Paradiso cikutikumbuska za mtundu wa Ciuta umo Yehova waliri—ni “wakupa njombe [wakutemwa] kwa ŵose awo ŵakumupenja mwaunenesko.” (Ŵahebere 11:6, NW) Cirindizga cakuŵara mu maghanoghano na mu mitima yithu citovwirenge ise kuzizipizga masuzgo mu caru ca Satana ici.—Yeremiya 23:20.
5 Tiyeni sono tiŵike maghanoghano ghithu pa cirindizga ca mu Baibolo ca umoyo wamuyirayira mu caru capasi ico cikwiza ca Paradiso. Kasi umoyo wizamkuŵa uli apo cimanyisko ca Ciuta cikuzura caru capasi?
PAMANYUMA PA ARAMAGEDONI—CARU CAPASI CA PARADISO
6. Kasi Aramagedoni ncici, ndipo kasi cizamung’anamuraci ku mtundu wa ŵantu?
6 Nga ndi umo kwalongorekera pakudanga, Yehova Ciuta sonosono apa waparanyenge kaŵiro ka vintu kaheni aka. Caru ici cikuneng’enera ku ico Baibolo likucema kuti Hara-Magedoni, panji Aramagedoni. Lizgu ilo lingacitiska ŵantu ŵanyake kughanaghana za kusakaza kwa nkondo ya nyukliya kwakucitiskika na mitundu iyo yikurwa nkondo, kweni Aramagedoni njakupambanako. Nga ndi umo Civumbuzi 16:14-16 cikurongolera, Aramagedoni ni “nkondo ya zuŵa likuru la Ciuta, Mwene-nkongono-zose.” Iyo ni nkondo yakunjizgamo “ŵakaronga ŵa caru cose,” panji mitundu. Mwana wa Yehova Ciuta, Karonga wakusoreka, sonosono apa warwenge nkondo. Cakufumapo cake ncakumanyikwirathu. Ŵose aŵo ŵakukana Ufumu wa Ciuta ndipo ŵali ku cigaŵa ca kaŵiro ka vintu aka ka Satana ŵizamkufumizgikapo. Ŵekha aŵo mbakugomezgeka kwa Yehova ndiŵo ŵizamkupona.—Civumbuzi 7:9, 14; 19:11-21.
7. Kasi Satana na viŵanda vyake ŵizamuŵanku mu nyengo ya Muwuso wa Vilimika Cikwi wa Kristu, ndipo kasi ici cizamuŵa na canduro uli ku mtundu wa ŵantu?
7 Yerezgerani kuti imwe mwapona suzgo yikuru iyo. Kasi umoyo wizamkuŵa uli pacaru capasi mu caru cipya ca kulayizgika ca Ciuta? (2 Petros 3:13) Kuti tikukhumbikwira kucita kusacizgira cara, pakuti Baibolo likutipharira, ndipo ivyo likuyowoya nvyakukondweska. Tikusambira kuti Satana na viŵanda vyake ŵizamupokeka nkongono, kujalirika mu cizongwe kwambura kugwira ncito mkati mu Muwuso wa Vilimika Cikwi wa Yesu Kristu. Vilengiwa viheni ivyo nta vizamkuzgeta-zgetangaso kunyuma kuti vitisuzge nesi kuyezga kutigaruska panji kutitayiska cigomezgo cithu kwa Ciuta cara. Nako nkupumula ’mwe!—Civumbuzi 20:1-3.
8, 9. Mu caru cipya, kasi ncici cizamkucitika ku masuzgo, urwari, na ucekuru?
8 Pa nyengo yake, mtundu wose wa urwari wizamkumara. (Yesaya 33:24) Penepapo ŵakupendera ŵizamwimirira, kwenda, kucimbira, nakuvina na malundi ghankongono. Pamanyuma pa vilimika vinandi vyaumoyo vyakuleka kupulika, ŵakumangwa makutu ŵamkupulika sumu zakunozga pafupi naŵo. Vinturu vizamuzizwa nakukora pa mlomo pa kuwona mitundu yakupambanapambana ya vintu ku caru. (Yesaya 35:5, 6) Paumaliro, ŵizamkuwona visko vya ŵakutemweka ŵawo! Nyengo zinyake ŵizamkutondeka danga kulaŵiska makora cifukwa m’maso mwawo muzamuzura na masozi gha cimwemwe.
9 Aghanaghanani! Nta kwizamkuŵaso magalasi gha maso, nesi ndodo na vikukunda vyakwendera, nesi mankwala, panji nesi vipatala vya mino panji vipatala cara! Nta kwizamkuŵakoso kurwara maghanoghano panji vyakumara mahara ivyo vikupangiska ŵantu kuleka kukondwa cara. Ŵana kuti ŵizamkukwinyiriraso na matenda cara. Maunonono gha ku ucekuru ghizamkusintika. (Job 33:25) Tizamkuŵa ŵa umoyo uweme, ŵankongono kwakuruska. Mulenji uliwose tizamkuwuka ŵankongono zakusazgikira kufuma ku turo tuweme, ŵakuzura na nkongono ndipo ŵakukhumbisiska kuwona zuŵa lipya la umoyo uweme na ncito yakukhorweska.
10. Kasi ndi ncito uli izo ŵakupona Aramagedoni ŵizamkucita?
10 Kwizamkuŵa ncito zinandi zakukondweska zakuti ŵacite aŵo ŵizamupona pa Aramagedoni. Iwo ŵizamkupanga caru capasi kuŵa paradiso. Vyakukhalako vyose vya caru cakwanangika ico vizamufumizgikapo. Mumalo ghakwanangika na mu vipakalala mwizamkuzgoka mapaki ghakutowa gha vipasi. Ŵose ŵizamuzaya nakufwasa, mu nyumba zawo ziweme. (Yesaya 65:21) Mukuruta kwa nyengo, vigaŵa vya paradiso ivyo vya caru capasi vizamukura nakutandazgika kufika pa sayizi yakuti caru cose capasi cizamuŵa cakutowa nga ndi umo wakacipangira Mlengi pakudanga mu munda wa Edeni. Nako nkukondweska ’mwe umo kwizamkuŵira kutoramo cigaŵa mu ncito yakuwerezgeraposo iyo!
11. Kasi pazamuŵa wene na wene uli muntazi mwa mtundu wa ŵantu mu malo ghakukhala na umoyo wa vinyama?
11 Vyose ivi vizamcitika pasi pa urongozgi wa uciuta mwakuti malo kuti ghizamkwanangikaso cara. Ŵantu ŵizamkhala pamtende na vinyama. M’malo mwakuvikomanga waka mwa nkaza, muntu wizamuyambiraso mazaza pa caru capasi, nakuvipwelerera makora. Citirani cithuzithuzi mu maghanoghano mpumpi na twana mberere, nkalamo na matholi, kuryera pamoza—ndipo vinyama vyakuŵeta vyakuvikilirika nkanira. Nanga kaŵe kamwana kacoko kuti kizamkuŵa na wofi cara na vinyama vyakuthondo, nesi kuti kwizamkuŵaso vigeŵenga, panji ŵantu ŵakofya ŵakwananga mtende wa caru cipya cara. (Yesaya 11:6-8) ’Mwe nawo ndi mtende uwo wamkuŵa mu caru cipya!
MTUNDU WA ŴANTU UKUSANDUKA
12. Kasi ndi mwauli mweneumo lemba la Yesaya 11:9 likukwaniriskikira lero, ndipo kasi lizamkwaniriskika uli mu Paradiso?
12 Yesaya 11:9 likutipharira za cifukwa ico kwizamuŵavye kucita uheni pacaru capasi. Ilo likuti: “Caru camkuzura na kumumanya Yehova umo maji ghakuzuzgira nyanja.” Ici cikung’anamura ŵantu pakuti vinyama vingaŵa vya “kumumanya Yehova” nakusinta cara, pakuti ivyo vikucita vintu mwa mahara ghakawiro kawo. Kweni cimanyisko ca Mlengi withu cikusinta ŵantu. Kwambura na kukayika imwe mwapanga kale kusinta mwati mwayamba kugwiriskira ncito cimanyisko ca Ciuta mu umoyo winu. Mamiliyoni ghanandi ghacita nteura. Mwanteura, ucimi uwu wayamba kale kukwaniriskika kwa awo ŵakuteŵetera Yehova. Kweni, ukurongoraso ku nyengo apo ŵantu caru cose ŵizamkuleka mukhaliro wa ucinyama panji mukhaliro waciwawa nakuŵa pa mtende kwamuyirayira.
13. Kasi ndi programu uli yakusambizga iyo yizamucitika pacaru capasi?
13 Cizamkuŵa cakukondweska ’mwe usange cimanyisko ca Ciuta cikuzura caru! Kwizamkuŵa programu yakusambizga ya caru cose pasi pa urongozgi wa Karonga Yesu Kristu na ŵa 144,000 ŵake awo mbakuwusa pamoza naye. Penepapo “mabuku” ghapya ghizamkwamba kugwiriskirika ncito. Mwapakweru agha ndi marango gha urongozgi ghakulembeka na Ciuta agho ghizamkuteŵetera nga ndi lufura lwakusambizgirapo ŵantu ŵakukhala pacaru capasi. (Civumbuzi 20:12) Mtundu wa ŵantu wuzamkusambira, kuti nkondo cara, kweni mtende. Virwero vyakuparanya vyose kwizamuŵavye. (Salmo 46:9) Ŵantu aŵo ŵizamukhala mu caru cipya ŵizamusambizgika kucita nawo ŵanyawo mwakutemwa, ulemu, na ncindi.
14. Kasi caru cizamusinta uli apo mtundu wa ŵantu wuzamkuŵa mbumba yimoza yakukorerezgana?
14 Mtundu wa ŵantu wuzamuŵa mbumba yimoza yakukorererana. Kwizamuŵavye vyakumara mahara vyakutondeska umoza na ubale. (Salmo 133:1-3) Palije nyumba ya muntu nanga njumoza yamukhumbikwira kukiyika pakopa ŵankungu. Mtende wamuwusa mu mtima wa muntu waliyose, mu nyumba yiliyose, mu cigaŵa ciricose ca caru capasi.—Mika 4:4.
CIWUKA CAKUKONDWESKA
15. Kasi ndi vigaŵa viŵiri uli vya ŵantu ivyo vizamkuwukiskika pacaru capasi?
15 Mkati mwa Vilimika Cikwi ivyo, muzamucitika ciwuka. Aŵo ŵali kwanangira mzimu mutuŵa wa Ciuta mwadala, panji nkongono yakugwira ncito, mwakuleka kulapa kususkana na virongolero panji urongozgi wa mzimu nta wazamkuwuka. (Mateyu 23:15, 33; Ŵahebere 6:4-6) Mwanadi, Ciuta ndiye wizamkumanya aŵo ŵakananga mwa ntowa iyo. Kweni vigaŵa viŵiri mwakuwonekera vizamuwukiskika—“ŵarunji na ŵambura urunji wuwo.” (Milimo 24:15) Pakuti vyose vyamwenda mwandondomeko, ncamahara kudumura kuti ŵakudanga kupokerereka ku umoyo pacaru capasi ŵamkuŵa ŵarunji, aŵo ŵakateŵeteranga Yehova mwakugomezgeka.—Ŵahebere 11:35-39.
16. (a) Kasi mbanjani awo ŵamkuŵa pakati pa “ŵarunji” ŵakuwukiskika pacaru capasi? (b) Pakati pa ŵantu ŵakugomezgeka ŵakale mba njani awo imwe muli ŵakukhumbisiska kukumana nawo, ndipo cifukwa?
16 M’malo mwakupulika malumbiri gha zinkondo, masoka na nyifwa, ŵateŵeti ŵa Yehova ŵamkupokera malipoti ghakuziziswa gha ciwuka. Camkuŵa cakukondweska kupulika za kwizaso kwa ŵanarume na ŵanakazi ŵakugomezgeka nga mba Abelu, Enoki, Nowa, Abrahamu, Sara, Yobe, Moses, Rahabi, Rute, Davide, Eliya, Estere. Nawo ndi mdauko wakuzukumiska uli ’mwe uwo ŵizamkutirongosorera penepapo ŵakukonkoska ndondomeko yake ya makani ghanandi gha mu Baibolo! Kwambura kukayika iŵo na ŵarunji aŵo ŵali kufwa mu nyengo yasonosono wazamkuŵa ŵakunweka kumanya za umaliro wa kaŵiro kavintu ka Satana ndiposo kuti ndi mwauli mweneumo Yehova wakatuŵiskira zina lake lituŵa na kusimikizgira muwuso wake.
17. Kasi ŵakugomezgeka aŵa ŵazamkupereka covwiro uli kwa ŵanji awo ŵawukiskika?
17 Nawo mbovwiri ’mwe uwo ŵakugomezgeka aŵa ŵizamkuŵa nawo mu cigaŵa caciŵiri ca ciwuka, apo mabiliyoni gha “ŵambura urunji” ŵakusutulika ku vikondo vya nyifwa! Wunandi mwa mtundu wa ŵantu wukaŵavye mwaŵi wakumanyira Yehova. Satana ‘wakaŵaburumutizganga maghanoghano ghaŵo.’ (2 Ŵakorinte 4:4) Kweni ncito za Diabolosi zizamkumara. Ŵantu ŵambura urunji ŵizamkuwukira mu caru cakutowa na camtende. Iwo ŵazamkupokerereka na mtundu wa ŵantu ŵakunozgekereskeka makora kuŵasambizga pakunena za Yehova na Mwana wake wakuwusa, Yesu Kristu. Apo mabiliyoni gha ŵakuwukiskika ghakufika pakumanya nakutemwa Mlengi wawo, cimanyisko ca Yehova cizamuzura caru mwantowa yambura kucitikapo nakale.
18. Kasi mukughanaghana kuti imwe muzamkujipulika uli pakupokerera ŵakutemweka awo ŵakuwuskika?
18 Nako nkukondwa ’mwe uko ciwuka cizamwiziska mu mitima yithu! Ndi njani wandasuzgikepo cifukwa ca murwani withu nyifwa? Inya nadi, ndi njani wandadinginyikepo cifukwa cakupatukana panji kutimbanizgika kwa ubwezi na wakutemweka wake apo matenda, ucekuru, ngozi, panji ciwawa cikanjizga wakutemweka wake mu nyifwa? Sono, aghanaghanani, kukondwa uko kwizamkuŵapo kukakumanaso mu Paradiso. Ŵamama na ŵadada, ŵana ŵasepuka na ŵana ŵasungwana, ŵabwezi na ŵabali, ŵizamkuvumbatirana, kusekerera nakulira cifukwa ca cimwemwe.
UKONGOREKWA PAUMALIRO!
19. Kasi ncamintondwe uli ico cizamucitika mu nyengo ya Vilimika Cikwi?
19 Mkati mwa nyengo ya Vilimika Cikwi, kwizamucitikanga camintondwe cakuziziswa. Ku mtundu wa ŵantu, ici panyake camkuŵa cigaŵa cakukondweska comene mu Muwuso wa Vilimika Cikwi wa Kristu. Yehova wamkulangura Mwana wake kugwiriskira ncito vyanduro vya sembe yakuwombolera kwa mwanalume na mwanakazi wali yose wakugomezgeka. Mwantowa iyo, kwananga kose kwamufumizgikapo ndipo mtundu wa ŵantu wamuwereraso ku ukongorekwa.—1 Yohane 2:2; Civumbuzi 21:1-4.
20. (a) Kasi cizamkung’anamuraci kuŵa mukongorekwa? (b) Kasi ŵakupona pa Aramagedoni na ŵakuwukiskika ŵazamkwamba pauli kukhala na umoyo mu ghanoghano lakukwana?
20 Ukongorekwa! Cizamkung’anamuraci? Ico cizamkung’anamura kuwerera ku umoyo nga ndi uwo Adamu na Heva ŵakaŵa nawo pambere ŵandanange mwakwimikana na Yehova Ciuta. Mukawonekero kakuthupi, mukaghanaghaniro, mukacitiro, mukakhaliro, na mwa kumzimu—mu ntowa yiriyose yakughanaghanirika—ŵantu ŵarunji ŵizamkuŵa ŵakufikapo pa vipimo vya Ciuta. Kweni kasi ŵantu ŵose ŵizamkuŵa na kawonekero kakuyana? Cara nadi! Vilengiwa vya Yehova—makuni, maluŵa, vinyama—vyose ivi vikutisambizga kuti iye wakutemwa mitundu yakupambanapambana. Ŵantu ŵarunji ŵazamkuŵa na wuntu na maluso ghakupambanapambana. Waliyose wizamkusekerera na umoyo nga ndi umo Ciuta wakakhumbira kuti ndimo viŵire. Civumbuzi 20:5 cikuti: “Ŵakufwa aŵo ŵakukhalapo kuti ŵakaŵa ŵamoyo cara yikasuka yikamara myaka cikwi.” Mwakulingana na mzinda ukuru ŵakupona Aramagedoni, ŵakuwukiskika ŵizamkuŵa na umoyo wakukwana usange ŵafikira ukongorekwa wambura kwananga.
21. (a) Kasi cizamkucitika ncici pa umaliro wa Muwuso wa Vilimika Cikwi wa Kristu? (b) Kasi pa umaliro cizamucitikira Satana na ŵose aŵo ŵali kucigaŵa cake ncivici?
21 Ŵantu ŵakongorekwa ŵizamkupokera ciyezgo cimoza caumaliro. Paumaliro wa Vilimika Cikwi, Satana na viŵanda vyake ŵizamkujuririka kufuma ku cizongwe kwa kanyengo kacoko waka ndipo ŵizamkuzomerezgeka kucita kuyezgayezga kwawo kwaumaliro kwa kupatuska ŵantu kwa Yehova. Ŵanji ŵizamkuŵikapo makhumbiro ghaheni pacanya pa kutemwa Ciuta, kweni kuwukira uku kwizamkudumulizgika. Yehova wizamkuŵakoma ŵaryezi aŵa pamoza na Satana na viŵanda vyake vyose. Ŵakucita uheni ŵose ŵizamkuparanyika kwamuyirayira.—Civumbuzi 20:7-10.
KASI IMWE MUCITENGECI?
22. Kasi imwe muli na cirindizga cakuzakacitaci mu Paradiso?
22 Umuyirayira uzamkuŵa pa wose aŵo ŵakutemwa Yehova Ciuta ndipo ŵakukhala mu caru capasi ca Paradiso. Tingayerezgera cara kukondwa uko ŵizamkuŵa nako, ndipo nanga ndimwe mungizakatoramo cigaŵa mu kukondwa uku. Sumu, maluso gha vyakujambura, vyakuŵaja—enya, kuruta pantazi kwa mtundu wa ŵantu ukongorekwa kwizamkujumpa ncito zakutowa nkanira za nkwanta za mu caru cakale! Nakwene nako, ŵantu ŵizamkuŵa ŵakongorekwa ndipo ŵizamkuŵa na nyengo yamtatakuya kuntazi zawo. Aghanaghanani ico imwe muzamkuŵa na mwaŵi kucita nga ndi muntu mukongorekwa. Ghanaghananiso, ico imwe na ŵanyinu mwizamkusambira pakunena za cilengiwa ca Yehova—kufuma pa mabiliyoni gha vipinga usiku ivyo vyapinjikika kucanya mpaka pa tuvibentu tucoko-tucoko twambura kuwoneka na maso. Cintu ciricose ico mtundu wa ŵantu wizamuŵa wukupanga cizamkondwereska mtima wa Ŵadada ŵithu ŵakutemwa ŵakucanya, a Yehova.—Salmo 150:1-6.
23. Kasi cifukwa ncici umoyo mu Paradiso kuti wuzamkuŵa wakuvuska cara?
23 Umoyo panyengo iyo kuti wizamkuŵa wakuvuska cara. Mukuruta kwa nyengo wizamkuŵa wakukondweska mwakusazgikira. Awonani, palije umaliro wa cimanyisko ca Ciuta. (Ŵaroma 11:33) Kwa muyirayira swii, nyengo zose pazamuŵa vinandi vyakukhumbikwira kuvisambira na vyasono vinandi vyakukhumbikwira kuvimanya. (Mupharazgi 3:11) Ndipo peneapo mukurutilira kusambira pakunena za Yehova Ciuta, muzamurutilira kukhala na umoyo—kuti kwa tuvirimika tucoko waka cara kweni kwamuyirayira!—Salmo 22:26.
24, 25. Kasi cifukwa ncici imwe sono mukwenera kukhala na umoyo mwakukorerezgana na cimanyisko ca Ciuta?
24 Kasi umoyo wakukondweska wa pacaru capasi ca paradiso wamuntazi uwu kuti ngwakwenerera kuyezgayezga panji kujipereka kucitapo kantu cara? Mwaunenesko ngwakwenerera! Eya, Yehova wamupani imwe kiyi wakunjilira ku umoyo waucindami wamuntazi uwu. Kiyi uyo ncimanyisko ca Ciuta. Kasi imwe mumugwiriskirenge ncito?
25 Usange mukumutemwa Yehova, musangenge kukondwa mukucita khumbo lake. (1 Yohane 5:3) Usange imwe mukurondezga ntowa iyo, navyo nvitumbiko ivyo musangenge! Usange mukugwiriskira ncito cimanyisko ca Ciuta, ico cimwiziskiraninge umoyo wakukondwa nanga mungaŵa mu caru ca masuzgo ici. Ndipo njombe zakuntazi nzikuru comene, pakuti ici ncimanyisko ceneico cikurongozgera ku umoyo wamuyirayira! Sono ndiyo nyengo yiweme yakuti imwe mucitepo kantu. Simikizgani kukhala na umoyo kwakuyana na cimanyisko ca Ciuta. Rongolani citemwa cinu pa Yehova. Cindikani zina lake lituŵa nakumusimikizgira Satana kuŵa mutesi. Nga ncakufumapo cake, Yehova Ciuta, Cisime ca vinjeru vyaunenesko na cimanyisko, wakondwenge namwe mu mtima wake wakutemwa kukuru. (Yeremiya 31:3; Zefaniya 3:17) Ndipo wamtemwaninge imwe kwamuyirayira!
YEZGANI CIMANYISKO CINU
Kasi ncici ico ndi “umoyo weneco”?
Pamanyuma pa Aramagedoni, kasi cizamkucitika ncici pano pacaru capasi?
Kasi mbanjani awo ŵizamuwukiskika pacaru capasi?
Kasi ndi mwauli mweneumo ŵantu ŵizamuŵira ŵakongorekwa ndipo paumaliro kuyezgekaso?
Kasi cirindizga cinu ncakuti uli pakunena za Paradiso?
[Mafumbo]
[Cithuzithuzi pa peji 188,189]
Kasi mukugomezga kuzakakhala na umoyo mu Paradiso, apo cimanyisko ca Ciuta cikuzura caru?
