Zekariya 2:1-13
2 Nkhinuska maso ndipo nkhawona munthu wali na chingwe*+ chakupimira mu woko lake.
2 Ntheura nkhamufumba kuti: “Kasi ukuya nkhu?”
Wakazgora kuti: “Kukapima Yerusalemu, kuti nkhawone usani wake na utali wake.”+
3 Ndipo wonani! mungelo uyo wakayowoyanga nane wakafuma, ndipo mungelo munyake wakiza kuzakakumana nayo.
4 Penepapo wakati kwa iyo: “Chimbilira kura ndipo munyamata yura ukamuphalire kuti, ‘“Mu Yerusalemu muzamukhala ŵanthu+ nga ni mizi yambura malinga, chifukwa ŵanthu na viŵeto ivyo vilimo ni vinandi.+
5 Ine nizamuŵa linga lake la moto zingilizge,+ ndipo nizamuŵa uchindami mukati mwake,”’+ ndimo wayowoyera Yehova.”
6 “Endeskani! Endeskani! Chimbiraniko ku charu chakumpoto,”+ ndimo wayowoyera Yehova.
“Pakuti namumbininiskirani ku mphepo zinayi zakuchanya,”+ ndimo wayowoyera Yehova.
7 “Endeska, Ziyoni! Chimbira, iwe ukukhala na mwana msungwana wa Babuloni.+
8 Pakuti ichi ndicho Yehova wa mawumba wayowoya, uyo pamanyuma pa kupika uchindami, wanituma ku mitundu iyo yikamuphanganinge vinthu,+ wati: ‘Waliyose uyo wakukhwaska imwe, wakukhwaska mboni ya jiso lane.+
9 Pakuti sono nisunkhunyenge woko lane kwimikana nawo, ndipo ŵazamuzgoka chinthu chakuti ŵazga ŵawo ŵaphange.’+ Ndipo muzamumanya nadi kuti Yehova wa mawumba wanituma.
10 “Chemerezga mwakukondwa, iwe mwana msungwana wa Ziyoni,+ pakuti nkhwiza,+ ndipo nizamukhala pakati pako,”+ ndimo wayowoyera Yehova.
11 “Mu zuŵa ilo, mitundu yinandi yizamujibatika kwa Yehova,+ ndipo yizamuŵa ŵanthu ŵane, ndipo ine nizamukhala pakati pako.” Ndipo uzamumanya kuti Yehova wa mawumba wanituma kwa iwe.
12 Yehova wazamutora chigaŵa cha Yuda kuŵa chigaŵa chake pa malo ghatuŵa, ndipo wazamusankhaso Yerusalemu.+
13 Mwaŵanthu mose khalani chete pamaso pa Yehova, pakuti wakuchitapo kanthu kufuma mu malo ghatuŵa agho wakukhala.
Mazgu Ghamusi
^ Mazgu ghanyake, “nthambo.”
