Yesaya 46:1-13
46 Beli wakujikama pasi,+ Nebo wakusindama.
Vikozgo vyawo vyayegheka pa vinyama, pa viŵeto vyakunyamura katundu,+Nga ni katundu uyo waphyora nyama izo zavuka.
2 Ŵakusindama na kujikama pamoza.Ŵangathaska yayi katundu,*Ndipo nawo ŵakutolekera ku wuzga.
3 “Pulikani kwa ine, imwe nyumba ya Yakhobe, na mose imwe mwakhalapo mu nyumba ya Israyeli,+Mwaŵeneimwe namovwirani kwamba apo mukababikira na kumuyeghani kwamba mu nthumbo.+
4 M’paka muchekure, ine niŵenge mweneyura.+M’paka muŵe na mbuha,* nimuyeghaninge nipera.
Nimunyamuraninge, kumovwirani na kumuthaskani nga umo nachitira.+
5 Kasi muniyaniskenge, kunikozganiska panji kuniyelezgera na njani,+Kuti tiyane?+
6 Pali awo ŵakunanga golide la mu tuvikwama twawo.Ŵakupima siliva pa sikelo.
Ŵakulemba ntchito nkhwantha ya visulo na kupanga chiuta.+
Kufuma apo, ŵakusindama na kuchisopa.+
7 Ŵakuchinyamura pa viŵegha vyawo.+Ŵakuchiyegha na kuchiŵika pa malo ghake, ndipo chikwimilira penepapo sikisiki.
Chikufumapo yayi apo ŵachiŵika.+
Ŵakulira kwa icho, kweni chikuŵazgora yayi.Chingaponoska yayi munthu ku suzgo.+
8 Kumbukani ichi, khwimani mtima.
Muchiŵike mu mtima, imwe ŵabudi.
9 Kumbukani vinthu vyakwamba vyakale chomene,Kuti ine ndine Chiuta, kulije munyake.
Ndine Chiuta, kulije munyake wakuyana na ine.+
10 Nkhuyowoyerathu kufuma pakwamba ivyo vizamuchitika,Kwamba kale chomene nkhuyowoyerathu vinthu ivyo vindachitike.+
Ine nkhuti: ‘Fundo* yane yiyimenge,+Nichitenge chilichose icho nakhumba.’+
11 Nkhuchema chiyuni chakofya kufuma kumafumiro gha dazi,+Kufuma ku charu chakutali nkhuchema munthu kuti wafiske fundo yane.*+
Nayowoya, ndipo nichichitenge.
Nachinozga ndipo nichifiskenge.+
12 Pulikani kwa ine, imwe ŵanonono* mtima,Imwe muli kutali na urunji.
13 Nasendezgera kufupi urunji wane.Uli kutali chara,Chiponosko chane chichedwenge yayi.+
Nipelekenge chiponosko ku Ziyoni, uchindami wane ku Israyeli.”+
Mazgu Ghamusi
^ Ndiko kuti, vikozgo ivyo vyayegheka pa vinyama.
^ Mazgu ghanyake, “nyivwi.”
^ Panji kuti, “Ulongozgi wane; Udumuliro wane.”
^ Panji kuti, “ulongozgi wane; udumuliro wane.”
^ Mazgu gheneko, “ŵankhongono mu.”
