Salimo 31:1-24
Kwa wakulongozga sumu. Sumu ya Davide.
31 Nabisama mwa imwe, A Yehova.+
Ningalengeskekanga chara.+
Nithaskani chifukwa cha urunji winu.+
2 Thyani khutu kwa ine.
Zani luŵiro na kunithaska.+
Muŵe phiri lane lakukhora,Malo ghakuvikilirika kuti muniponoske.+
3 Pakuti ndimwe jalawe lane na linga lane lakukhora.+Munilongozgenge na kunidangilira+ chifukwa cha zina+ linu.
4 Muniwuskemo mu ukonde uwo ŵanithya nawo,+Pakuti ndimwe linga lane.+
5 Naŵikizga mzimu wane mu woko linu.+
Mwaniwombora, A Yehova Chiuta waunenesko.*+
6 Nkhutinkha awo ŵakujipeleka ku vikozgo vyawakawaka na vyambura ntchito.Kweni ine, nkhuthemba Yehova.
7 Nisekelerenge chomene mu lusungu* lwinu,Chifukwa mwawona visuzgo vyane.+Mukumanya kukweŵeka kwane.
8 Mundanipeleke mu woko la mulwani,Kweni mukuniyimika mu malo ghachivikiliro.*
9 Munilongore lusungu, A Yehova, pakuti nili mu suzgo.
Maso ghane ghalopwa na ulwilwi,+ kweniso thupi lane lose.+
10 Umoyo wane wamara na chitima,+Vyaka vyane na kudagha.+
Nkhongono zane zikumara chifukwa cha mphuvya zane,Viwangwa vyane vyalopwa.+
11 Nkhuhoyeka na wose awo ŵakupindikana nane,+Chomenechomene na ŵazengezgani ŵane.
Ŵanyane ŵakutenthema nane.Para ŵaniwona, ŵakunichimbira.+
12 Ŵaniwuskamo mu mitima yawo na kuniluwa, nga ni para nili kufwa.Nili nga ntchiŵiya chakusweka.
13 Napulika mahumuhumu ghanandi ghaheni,Wofi wanizingilizga.+
Para ŵawungana pamoza kwimikana nane,Ŵakunozga chiŵembu kuti ŵatore umoyo wane.+
14 Kweni ine nkhuthemba imwe, A Yehova.+
Nkhuti: “Ndimwe Chiuta wane.”+
15 Mazuŵa ghane ghali mu woko linu.*
Nithaskani mu woko la ŵalwani ŵane na ku awo ŵakunitambuzga.+
16 Ngweluskirani chisko chinu pa muteŵeti winu.+
Niponoskani na lusungu* lwinu.
17 A Yehova, ningalengeskekanga chara para nkhuchema pa imwe.+
Ŵaheni ŵalengeskeke.+Ŵachetamiskike mu Dindi.*+
18 Milomo yitesi yichetamiskike,+Milomo iyo mwakujituntha yikunena ŵarunji, pamoza na kujikuzga na miyuyuro.
19 Uwemi winu ngukuru nadi!+
Mwaŵasungira awo ŵakumopani,+Mwawulongora ku awo ŵakubisama mwa imwe pamaso pa ŵanthu wose.+
20 Muŵabisenge ku udesi uko imwe muli+Kuŵajoŵeska ku viŵembu vya ŵanthu.Muŵabisenge mu chisakasa chinuKuŵabisa ku ŵakuwukira.*+
21 Yehova walumbike,Pakuti wanilongora lusungu* lwake mu nthowa yakuzizwiska+ mu msumba wakuzingilizgika.+
22 Apo nkhafinyilizgika, nkhati:
“Nimalenge imwe mukuwona.”+
Kweni nkhati nalilira kwa imwe, mukapulika kuŵeya kwane kuti munovwire.+
23 Temwani Yehova, mose ŵakugomezgeka kwa iyo!+
Yehova wakuvikilira ŵakugomezgeka,+Kweni wakuwezgera mwakukwana waliyose uyo wakujikuzga.+
24 Khwimani, mtima winu uŵe wakukhora,+Mose imwe mukulindilira Yehova.+
Mazgu Ghamusi
^ Panji kuti, “Chiuta wakugomezgeka.”
^ Panji kuti, “chitemwa chakugomezgeka.”
^ Panji kuti, “malo ghasani.”
^ Mazgu gheneko, “Nyengo zane zili mu woko linu.”
^ Panji kuti, “chitemwa chakugomezgeka.”
^ Panji kuti, “Sheole,” ndiko kuti, malaro. Wonani Mang’anamuro gha Mazgu.
^ Mazgu gheneko, “kulimbana kwa malulimi.”
^ Panji kuti, “chitemwa chakugomezgeka.”
