Kasi Baibolo Linganovwira Kuti Nileke Kujiyimba Mulandu?

JULANI

Ivyo Baibolo Likuyowoya

Enya. Baibolo lili na fundo izo zingatovwira kuti tileke kujiyimba mulandu. (Salimo 32:1-5) Usange tabuda chinthu chinyake ndipo talapa kufumira pasi pa mtima, Chiuta wakutigowokera na kutovwira kuti tambeso kujipulika makora. (Salimo 86:5) Baibolo likulongora kuti nyengo zinyake kujiyimba mulandu pa ivyo tabuda nkhuwemi chifukwa kukutovwira kuti tisambirepo kanthu na kuleka kuzawerezgaposo. (Salimo 51:17; Zintharika 14:9) Ndipouli, Baibolo likutichenjezga kuti tingajiyimbanga mulandu mwakujumphizga yayi, panji kwamba kujiwona kuti ndise ŵawakawaka mu maso gha Chiuta. Usange tingamba kujiwona nthena vingapangiska kuti tiŵe “na chitima chikuru.”—2 Ŵakorinte 2:7.

Ntchivichi chingapangiska kuti tambe kujiyimba mulandu?

Tingajiyimba mulandu pa vifukwa vyakupambanapambana. Vingachitika kuti takhuŵazga munthu uyo tikumutemwa panji tatondeka kuchita chinthu icho tikuwona kuti tikwenera kuchita. Nyengo zinyake tingajiyimba mulandu pa vinthu vyambura kupulikikwa. Mwachiyelezgero, para tajiŵikira fundo izo tingakwaniska yayi kuzilondezga, ntchakumanyikwirathu kuti kanandi tikhalirenge waka kujiyimba mulandu para tatondeka kufiska. Lekani Baibolo likutichiska kuti tileke kukhazga vinandi kuluska ivyo tingafiska.—Mupharazgi 7:16.

Kasi ningachita wuli para nkhujiyimba mulandu?

M’malo mwakutaya mtima chifukwa cha kujiyimba mulandu, chitani ivyo mungafiska kuti munozge ivyo mwabudiska. Kasi mungachita wuli?

Zomerani ivyo mwabudiska. Lombani kwa Yehova a Chiuta, na kumupempha kuti wamugowokerani. (Salimo 38:18; Luka 11:4) Para mwalapa zanadi, mukuzomerezga ivyo mwabuda kweniso muzamuwerezgaposo yayi, mbwenu Chiuta wapulikenge lurombo lwinu. (2 Midauko 33:13; Masalimo 34:18) Iyo wakuwona wunthu wamukati, uwo ise tingawuwona yayi. Para Chiuta wawona kuti tikuyezgayezga kuleka kuchita chiheni, iyo ni “murunji na wakugomezgeka, ndipo watigowokerenge zakwananga zithu.”—1 Yohane 1:9; Zintharika 28:13.

Para mwabudira munthu munyake, mukwenera kuzomera kubuda kwinu na kumuphepiska kufumira pasi pa mtima. Kuchita nthena nkhupusu yayi! Mukwenera kuŵa ŵachikanga na ŵakujiyuyura. Kweni para mwaphepiska kufumira pasi pa mtima vikovwira pa fundo ziŵiri izi: Mukuŵa kuti mwathura katundu muzito, kweniso mwawezgerapo mtende.—Mateyu 3:8; 5:23, 24.
Ghanaghanirani malemba agho ghakuyowoya vya lusungu lwa Chiuta. Mwachiyelezgero, ghanaghanirani lemba la 1 Yohane 3:19, 20. Pa lemba ili, Baibolo likutiphalira kuti “mitima yithu yingatisuska”—ivyo vikung’anamura kuti nyengo zinyake tingamba kujikayikira, panji na kughanaghana kuti Chiuta wangatitemwa yayi. Ndipouli, lemba ili likulutizga kuti “Chiuta ni mukuru kuluska mitima yithu.” Mwawuli? Iyo wakumanya chilichose chakukhwaskana na ise ndipo wakupulikiska umo tikujipulikira kweniso ivyo tikutondeka. Wakumanyaso kuti tili kubabika ŵakwananga, ivyo vikung’anamura kuti ntchipusu kubudiska vinthu vinyake. b (Salimo 51:5) Ntheura iyo wakuŵakana yayi awo ŵalapa zanadi pa ivyo ŵabudiska.—Salimo 32:5.
Lekani kujiyimba mulandu chifukwa cha ivyo mukabuda kumasinda. Mu Baibolo muli viyelezgero vinandi vya ŵanalume na ŵanakazi awo pakwamba ŵakachitanga viheni kweni ŵakasintha nthowa zawo. Yumoza wawo ni Saulosi wa ku Taraso, uyo wakamba kumanyikwa kuti mpositole Paulosi. Iyo wakatambuzganga chomene ŵasambiri ŵa Yesu chifukwa wakaŵa Mufarisi. (Milimo 8:3; 9:1, 2, 11) Kweni wati wamanya kuti wakasuskananga na Chiuta kweniso Mesiya, panji kuti Khristu, wakalapa, kusintha nthowa zake, na kuŵa Mkhristu wa chiyelezgero chiwemi chomene. Mbunenesko kuti Paulosi wakadandawura chomene na ivyo wakachitanga kumasinda, kweni wakakhaliranga waka kujiyimba mulandu yayi. Pakuwona lusungu lukuru ulo Chiuta wakamulongora, Paulosi wakazgoka mupharazgi wamwamphu chomene ndipo nyengo zose maso ghake ghakaŵanga pa chigomezgo cha umoyo wamuyirayira icho chikaŵa panthazi pake.—Ŵafilipi 3:13, 14.

Mavesi gha mu Baibolo ghakuyowoya vya kujiyimba mulandu kweniso chigowokero

Salimo 51:17: “Mtima wakuphyoka na kuteketeka, A Chiuta, muwukanenge chara.”

Ng’anamuro lake: Para mwalapa zanadi pa ivyo mwabudiska, Chiuta wamukananinge yayi. Iyo wamulongoraninge lusungu.

Zintharika 28:13: “Uyo wakubisa maubudi ghake vinthu vimwenderenge yayi, Kweni uyo wakughazomera na kughaleka walongorekenge lusungu.”

Ng’anamuro lake: Para tamuphalira Chiuta ivyo tabuda na kusintha nthowa zithu, iyo watigowokerenge.

Yeremiya 31:34: “Nizamuŵagowokera maubudi ghawo ndipo nizamukumbukaso chara kwananga kwawo.”

Ng’anamuro lake: Para Chiuta watigowokera, wakukumbukaso yayi zakwananga zithu. Lusungu lwake ndukuru chomene.

a Yehova ni zina leneko la Chiuta.—Ekisodo 6:3.

b Chifukwa chakuti tili kuhara kwananga kufuma ku munthu wakwamba Adamu, lekani nyengo zinandi tikubudiska vinthu vinyake. Iyo pamoza na muwoli wake, Eva, ŵakanangira Chiuta ndipo ŵakataya umoyo wenecho wakufikapo wa iwo pamoza na ŵana ŵawo wose.—Genizesi 3:17-19; Ŵaroma 5:12.