Yohane Mubatizi wakaŵa ntchimi ya Chiuta. (Luka 1:76) Wakababika kuumaliro wa 100 B.C.E. Chiuta wakamupa ntchito yakuti wanozgere nthowa Mesiya panji kuti Khristu. Yohane wakachita nthena mwa kupharazga uthenga wa Chiuta ku Ŵayuda mwakuti ŵalape na kuweleraso kwa Chiuta.—Mariko 1:1-4; Luka 1:13, 16, 17.

 Uthenga uwo Yohane wakapharazganga, ukawovwira ŵanthu awo ŵakategherezganga kuti ŵamanye Yesu wa ku Nazarete, kuti wakaŵa Mesiya uyo wakalayizgika. (Mateyu 11:10) Yohane wakachiska ŵanthu awo ŵakamutegherezganga kuti ŵalape zakwananga zawo ndipo pamanyuma ŵabatizike nga ntchilongolero chakuti ŵalapa zanadi. (Luka 3:3-6) Chifukwa chakuti wakabatizanga ŵanthu ŵanandi, lekani Yohane wakuchemeka kuti Mubatizi. Ubatizo wakuzirwa chomene uwo Yohane wakachita, ngwa kubatiza Yesu. a—Mariko 1:9.

Mu nkhani iyi

•  Ntchivichi chikapangiska Yohane Mubatizi kuŵa wapadera?

•  Kasi ŵapapi ŵa Yohane Mubatizi ŵakaŵa anjani?

•  Ni njani wakapangiska kuti Yohane Mubatizi wakomeke?

•  Kasi Yohane Mubatizi na Yesu ŵakaphalizgananga pakuchita vinthu?

•  Kasi mbanalume ŵalinga mu Baibolo awo ŵakumanyikwa na zina lakuti Yohane?

 Ntchito iyo wakachitanga yikayowoyekerathu: Pakuchita ntchito yakupharazga, Yohane wakafiska uchimi wakukhwaskana na thenga la Yehova. (Malaki 3:1; Mateyu 3:1-3) Iyo wakalongora nadi kuti ndiyo wakaŵa wakwenelera kuti “wanozgere Yehova ŵanthu ŵakunozgeka” chifukwa wakawovwira Ŵayuda kuti ŵazomere uthenga wa Yesu Khristu, uyo wakaŵa mwimiliri wakwamba wa Yehova Chiuta.—Luka 1:17.

 Chiharo: Yesu wakati “wandawukepo munthu mukuru kuluska Yohane Mubatizi, kweni munthu uyo ni muchoko mu Ufumu wakuchanya ni mukuru kuluska iyo.” (Mateyu 11:11) Chifukwa chakuti Yohane wakaŵa ntchimi kweniso “thenga” ilo Baibolo likayowoyerathu, palije muteŵeti wa Chiuta uyo wakaŵa mukuru padera pa iyo pambere iyo wandababike. Mazgu gha Yesu ghakulongoraso kuti Yohane wazamuluta kuchanya yayi kuti wakaŵe fumu mu Ufumu wa Chiuta. b Ntchimi yakugomezgeka iyi, yikafwa pambere Khristu wandajure nthowa yakuti ŵanthu ŵanyake ŵakakhale na umoyo kuchanya. (Ŵahebere 10:19, 20) Ndipouli, Yohane wazamukhala pa charu chapasi mu Ufumu wa Chiuta, ndipo wazamuŵa na mwaŵi wakukhala na umoyo wamuyirayira mu Paradiso.—Salimo 37:29; Luka 23:43.

 Ŵapapi ŵa Yohane Mubatizi ŵakaŵa Zekariya na Elizabeti. Zekariya wakaŵa wasembe Wachiyuda. Kubabika kwa Yohane ukaŵa munthondwe, chifukwa Elizabeti wakaŵa chumba panji kuti wakababanga yayi. Kweniso, Elizabeti na Zekariya “ŵakaŵa ŵachekuru.”—Luka 1:5-7, 13.

 Themba Herode Antipasi ndiyo wakapangiska kuti Yohane ŵamudumure mutu. Wakachita ivi chifukwa chakuti muwoli wake, Herodiya, wakamupempha kwizira mwa mwana wake msungwana. Herodiya wakamutinkhanga Yohane chifukwa chakuti wakaphalira Herode uyo wakaŵa Muyuda, kuti nthengwa yawo yikaŵa yakuzomerezgeka yayi kuyana na dango la Chiyuda.—Mateyu 14:1-12; Mariko 6:16-19.

 Palije ukaboni uliwose mu Baibolo uwo ukukhozgera fundo iyi. (Yohane 3:25-30) Unenesko ngwakuti, Yohane wakamanyanga kuti ukaŵa udindo wake kunozgera Mesiya nthowa, kweni wakaphalizgananga na Yesu yayi. Yohane wakati: “Ine nkhiza kuzakabatiza na maji kuti iyo wawoneke kwa Israyeli.” Ndipo wakasazgirapo kuti: “Uyu ni Mwana wa Chiuta.” (Yohane 1:26-34) Ntheura Yohane wakakondwanga chomene kuwona Yesu wakufiska uteŵeti wake.