Kanandi chitemwa cha mfumu na muwoli chikwamba kuzizima para tuvyaka twajumphapo. Usange ndimo viliri mu nthengwa yinu, kasi mukwenera kufipa mtima chomene?

•  Ivyo mukwenera kumanya

•  Ivyo mungachita

 Chitemwa ntchakukhumbikwa kuti nthengwa yiŵe yakukhora. Nyengo zose munthu wakwenera kurya chakurya chakukwana kweniso kumwa maji kuti thupi lake liŵe lankhongono, ntheura chitemwa nacho chikovwira kuti nthengwa yilutilire kuŵa yakukhora. Mfumu panji muwoli winu wakukhumba kuti nyengo zose mulongorenge kuti mukumutemwa chomene, kweniso kuti mukumupwelelera nangauli mungaŵa kuti mwakhala mu nthengwa vyaka vinandi.

 Chitemwa chanadi chikukhumba vyake pera yayi. Chikukhumba kuti ŵanji ŵakondwenge. Ntheura mfumu panji muwoli wakwenera yayi kulongora chitemwa para wakukhumba vinthu vinyake pera. Nyengo zose wakwenera kulongora chitemwa kwa munyake wa mu nthengwa.

 Mwakawiro, ŵawoli ndiwo ŵakukhumba kulongoreka chitemwa kuluska ŵafumu. Mfumu wangamutemwa muwoli wake kufumira pasi pa mtima. Kweni muwoli wangakayikira kuti mfumu wake wakumutemwa na kumupwelelera nadi usange wakumulongora waka chitemwa mwa apo na apo kweniso para wakukhumba waka kugonana. Ntchakukhumbikwa chomene kulongora kuti tikutemwa munyithu wamunthengwa zuŵa lililose.

 Ivyo mukuyowoya vikwenera kulongora kuti mukumutemwa munyinu. Tumazgu tupusu nga twakuti “nkhukutemwa chomene” panji “mtima wane uli waka pa iwe,” tungapangiska munyinu wajipulike kuti mukumutemwa nadi.

 Fundo ya mu Baibolo: “Mulomo ukuyowoya ivyo vili kuzura mu mtima.”—Mateyu 12:34.

 Ivyo mungachita: Muphalirani munyinu twakusingo twinu. Mungamulembera kakalata, imelo, panji meseji.

 Ivyo mukuchita vikwenera kulongora kuti mukumutemwa. Mungamuhaga, kumukisa panji kumulorako pa woko. Ivi vingalongora kuti mukutemwa nadi. Mungalongoraso kuti mukumutemwa para mukumusisita, kumuphinyira maso panji kumugulirako kachawanangwa. Mungamovwirako tuntchito tunyake muwoli winu, nga kumunyamulirako kachikwama, kumujulira chijaro, kusukira lumoza mbale panji kuchapira lumoza vyakuvwara kweniso kumuphikira chakurya. Nangauli iyi yingawoneka nga ni nkhani yichoko, kweni ŵawoli ŵanandi ŵakukondwa chomene ndipo ŵakuwona kuti ŵafumu ŵawo ŵakuŵatemwa chomene!

 Fundo ya mu Baibolo: “Tingatemwananga na mazgu pera yayi nesi lulimi, kweni mu milimo na unenesko.”—1 Yohane 3:18.

 Ivyo mungachita: Lutilirani kutemwa muwoli winu nga umo mukamutemweranga apo mukaŵa pa chibwezi.

 Patulani nyengo yakuchezgera. Munyinu wangawona kuti mukutemwa chomene para mungapatura nyengo na kuluta kukachezga ku malo ghanyake. Kweni nyengo zinyake chingaŵa chakusuzga kuti mupature nyengo para muli na ŵana panji mukutangwanika chomene na ntchito zinyake. Nyengo zinyake mungachita makora kukatembeyapo waka mwaŵaŵiri.

 Fundo ya mu Baibolo: “Musande ivyo ni vinthu vyakuzirwa chomene.”—Ŵafilipi 1:10.

 Ivyo mungachita: Mfumu na muwoli awo ŵakutangwanikanga chomene kanandi ŵakupatura nyengo na kukachezga ku malo ghanyake.

 Mumanyani makora munyinu. Taŵanthu tikukhumba kulongoreka chitemwa munthowa zakupambanapambana. Muphalirani munyinu ivyo mukukhumba kuti wamuchitiraninge kulongora kuti wakumutemwani, ndipo muchite ivyo wamuphalirani. Manyani kuti chitemwa ntchakuzirwa kuti nthengwa yinu yiŵe yakukhora.

 Fundo ya mu Baibolo: “Chitemwa . . . chikupenja vyake pera yayi.”—1 Ŵakorinte 13:4, 5.

 Ivyo mungachita: M’malo mwakuchichizga munyinu kuti wamutemwaninge, jifumbani kuti, ‘Kasi ningachita wuli kuti munyane wanitemwenge chomene?’