IVYO ŴACHINYAMATA ŴAKUFUMBA
Kasi Nkhuwoneka Wuli?
Chifukwa wuli ukwenera kughanaghanira chomene umo ukuvwalira? Chifukwa umo ukuvwalira vikuvumbura wunthu wako. Kasi vikuvumbura vichi?
Masuzgo ghatatu ghakurughakuru ghakukhwaskana na umo ukuwonekera kweniso umo ungaghagegera
Suzgo lakwamba: Kuzomerezga kuti intaneti ndiyo yikuphalirenge umo ukwenera kuwonekera.
Msungwana munyake zina lake Theresa wakati: “Nyengo zinyake nkhuyegheka na fashoni yinyake chifukwa cha umo ŵakusaska malonda ŵayichemelera. Kanandi chikuŵa chipusu kutolera waka umo ŵanthu ŵakuvwalira para nyengo zose ukughanaghanira waka ivyo ŵakuvwara.”
Mbasungwana pera yayi awo ŵakuyegheka na umo ŵakusaska malonda ŵakuchitira. Buku lakuti The Everything Guide to Raising Adolescent Boys likuti: “Ŵanyamata nanga ŵangaŵa kuti ŵachali ŵana, nawo ŵakukhwaskika chomene na umo ŵamalonda ŵakuchitira.”
Ivyo vingakovwira: Baibolo likuti: “Munthu muzeleza wakugomezga mazgu ghalighose, Kweni wakuchenjera wakulanguruka pa mendero ghake ghose.” (Zintharika 14:15) Kuyana na ulongozgi wa pa lemba ili, ŵikapo mtima kuti uleke kuyegheka bweka na ŵakusaska malonda. Mwachiyelezgero, para wawona chakuvwara chinyake chakuthina panji chakulangara icho ŵamalonda ŵakusaska, jifumba kuti:
‘Kasi pangaŵa uheni uliwose usange ningavwara chakuvwara ichi?’
‘Usange ningavwara malaya agha, kasi ningawoneka kuti nkhuchezga na ŵanthu wuli?’
‘Kasi fashoni iyi yikuvumburachi za ine?’
Fundo yakuti ughanaghanirepo: Kwa sabata yimoza, ughanaghanirepo chomene pa ma fashoni agho ŵamalonda ŵakusaska. Kasi ŵakusaska malaya gha fashoni wuli? Kasi umo ŵakuchitira pakusaska vikukupangiska kuti uyegheke nayo? Msungwana munyake zina lake Karen wakayowoya kuti: “Ŵanthu ŵanandi ŵakukhumba kuti ŵawonekenge makora, ŵavwarenge makora kweniso kujilongora kuti ŵali na thupi ‘liwemi.’ Ŵakusaska malonda ŵakuŵika chomene mtima pa ŵachinyamata.”
Suzgo lachiŵiri: Kutolera waka vya ŵanthu ŵakutchuka.
Munyamata munyake zina lake Manuel wakati: “Para kwafuma waka laya lasono, waliyose wakuŵa nalo ndipo uyo walije wakuwoneka kuti ngwakukhalira.” Msungwana munyake nayo zina lake Anna wakati: “Nkhani nkhuŵa waka na laya lasono yayi kweni kuti uchitenge ivyo ŵanyako ŵakuchita.”
Ivyo vingakovwira: Baibolo likuti: “Lekani kutolera nkharo ya ŵanthu ŵa mu nyengo iyi.” (Ŵaroma 12:2) Kuyana na ulongozgi wa pa lemba ili, wona malaya yako ndipo jifumba kuti:
‘Kasi ntchivichi chikunipangiska kusankha malaya agha?’
‘Kasi pali uwemi wuli usange ningatolera waka ma fashoni agho ngakutchuka?’
‘Kasi nkhuvwara kuti nizukumiske waka ŵanthu?’
Fundo yakuti ughanaghanirepo: Leka kugura malaya chifukwa chakuti ghali mu fashoni panji kuleka kugura chifukwa chakuti ghali kufuma mu fashoni. M’malo mwake, ukwenera kujigomezga kweniso kujivikilira. Para uchitenge nthena uchichizgikenge yayi kuti ugure malaya agho ghafuma waka kuti uyane waka na ŵanyako.
Suzgo lachitatu: Kughanaghana kuti ‘para ukuwoneka ŵakukopa ndikuti vili makora chomene.’
Msungwana munyake zina lake Jennifer wakati: “Kuyowoya unenesko taŵanandi tikuyezgeka kuvwara malaya ghakukopa nga ghakulangara, ghafupi kweniso ghakuthina.”
Ivyo vingakovwira: Baibolo likuti: “Kujitozga kwinu kuleke kuŵa kwa kuwaro . . . kweni kuŵe kwa munthu wakubisika wa mu mtima.” (1 Petrosi 3:3, 4) Kuyana na ulongozgi wa pa lemba ili, kasi ukuwona kuti chakuzirwa ni ntchi, kutowa kwa kuwaro panji kwa mu mtima?
Fundo yakuti ughanaghanirepo: Fashoni yiwemi chomene mazuŵa ghano nkhuvwara mwantchindi. Uwu mbunenesko, kweni ŵanthu ŵanandi mazuŵa ghano ŵakuvwara mwantchindi yayi. Ghanaghanira fundo iyi:
Kasi uli kuchezgapo na munthu uyo wakukhalira waka kuyowoya vya umo wakuwonekera? Chachitima ntchakuti iyo wakumanya yayi kuti ivyo wakuyowoya vingapangiska kuti ŵanthu ŵaleke kuchezga nayo!
Munthu uyo wakuvwara mwakujikuzga wangayana na munthu uyo wakutemwa waka kuyowoya vya iyo, ndipo ivi vingapangiska kuti ŵanthu ŵaleke kuchezga nayo
Para ungamba kuvwara mwambura kwenelera ungaŵa nga munthu uyu. Ivyo ukuvwara vikuvumbura vinandi vya iwe, ivi vingapangiska kuti uŵe wambura kuvikilirika. Vingapangiskaso kuti wambe kukopa ŵanthu nanga mungaŵa mu nthowa zambura kwenelera.
Munthu wangasaska yayi icho wakuleka kuguliska, ntheura mu malo mwakuvwara malaya ghakukopa, vwara malaya agho ghakupeleka ntchindi. Msungwana munyake zina lake Monica wakati: “Kuvwara mwantchindi chikung’anamura kuti uvwarenge nga mbagogo yayi, kweni chikung’anamura kuvwara mwakuti ŵanthu ŵakuwonenge mwakwenelera.”
Panji Mungatemwa Kuŵerengaso Nkhani Izi
IVYO ŴANYINU ŴAKUYOWOYA
Chifukwa Wuli Nkhufipa Mtima Chomene na Umo Nkhuwonekera?
Sambirani umo mungachitira kuti muleke kuyegheka waka na umo mukujipulikira.
IVYO ŴANYINU ŴAKUYOWOYA
Ivyo Ŵanyamata na Ŵasungwana Ŵakuyowoya—Umo Ukuwonekera
Chifukwa wuli ŵachinyamata ŵakufipa mtima na umo ŵakuwonekera? Kasi ŵakwenera kuchita wuli?
