Baibuli Ehindura Obwomeezi

KIKI ekyaletiire omusaija kuruga Scotland kutunga obwomeezi oburumu okusemererwa kukira bizineesi ye? Kiki ekyakonyire omusaija kuruga Brazil kuleka engeso z’obusiihani n’okukozesa ebitokooza bwongo? Kiki ekyakonyire omusaija kuruga Slovenia kuleka kutamiira muno? Soma abantu banu ekibarukugamba.

“Obwomeezi bwange bukaba nibuzooka nk’oburungi.”​—JOHN RICKETTS

AKAZAARWA: 1958

IHANGA: SCOTLAND

EBYAFAAYO: AKABA ATUNGIRE OBUSINGUZI OMU BY’OBUSUBUZI

OBWOMEEZI BWANGE OBWA KARA: Nkakurra omu bwomeezi oburungi. Ise nyowe akaba ali mukuru omu mahe ga Bungereeza, kandi twaikaraga nitufuruka. Oihireho kwikara Scotland, tukaikara England, Bugirimaani, Kenya, Malaysia, Ireland, na Cyprus. Kuruga ha myaka munaana, nasomeraga omu masomero ga bbodingi omu Scotland. Hanyuma nkamalirra emisomo yange ha yunivasite eya Cambridge.

Ha myaka 20, nkatandika kukora bizineesi ey’okusuubura amafuta eyamazire emyaka munaana. Ha kubanza nkakorra omu South America, narugayo nagenda omu Afrika, kandi hanyuma nagenda omu Australia. Hanyuma y’okugenda Australia, nkatandikaho ekitongole eky’okwahuramu sente kandi hanyuma nkakitunda.

Sente ezinatungire hanyuma y’okukitunda zikansobozesa kuleka eby’okukora nyine emyaka 40. Nk’oku nkaba ntarukukora, nkakozesa obwire bwange kugenda omu biikaro ebirukwahukana. Nkavuga pikipiki nayetoroora Australia yoona emirundi ebiri kandi nkacwamu kwetoroora ensi yoona. Obwomeezi bwange bukaba nibuzooka nk’oburungi.

OMULINGO BAIBULI YAHINDWIRE OBWOMEEZI BWANGE: N’obunkaba ntakalekere kukora, nkaba ninserra omulingo ndasiima Ruhanga habw’obwomeezi oburungi muno obunkaba ninyegondezaamu. Nkatandika kugenda omu kanisa ya Anglican, nambere twakuzire nitugenda. Baitu omu kanisa enu tibayegesahoga muno Baibuli. Nkongera nayegaho Baibuli n’Abamomoni, baitu nkahika naleka kwega nabo habwokuba tibasigikirraga ha Baibuli.

Kiro kimu, Abakaiso ba Yahwe bakaija omu ka yange. Nkakirorraho ngu enyegesa zaabo zoona nizisigikirra ha Baibuli. Kimu ha byahandiikirwe ebibanyolekere kiri omu 1 Timoseo 2:3, 4. Enkarra ezi nizigamba ngu Ruhanga n’agonza “abantu bona okujunwa, nokuhika omukumanyira kimu amazima.” Nkakwatwaho muno kurora ngu Abakaiso ba Yahwe tibeegesa amananu kwonka baitu amananu gonyini kuruga omu Baibuli.

Kwega Baibuli n’Abakaiso ba Yahwe kikankonyera kumanya amananu gonyini. Ekyokurorraho, nkega ngu Ruhanga na Yesu tibali kicweka ky’obusatu obutarukwetegerezebwa; baitu nibahukanira kimu. (Yohana 14:28; 1 Abakolinso 11:3) Nkasemererwa obunayegere amananu ganu aganguhire. Ekindi nkabiihirwa muno habwokuba nkalengaho kutekamu amaani kwetegereza enyegesa ey’obusatu eyetasobora kwetegerezebwa!

Omu bwire obutali bwa hara nkatandika kugenda omu nsorrokano z’Abakaiso ba Yahwe. Nkagonza muno omulingo gw’obunywani ogubantwaizemu n’engeso enungi ezibaine​—bakansisanira nk’abamalaika. Okugonza okw’amananu okubanyolekere kundetera kukigumya ngu nzoire amananu.​—Yohana 13:35.

OMULINGO NGASIIRWE: Hanyuma y’okubatizibwa nkarora omukazi omurungi muno arukwetwa Diane. Akakuzibwa nk’omu h’Abakaiso ba Yahwe, kandi akaba aine emiringo enungi nyingi eyansikiriize. Hanyuma tukataaha obuswere. Obunywani n’obusagiki bwa Diane guli mugisa kuruga hali Yahwe.

Nyowe na Diane tukahurra nitugonza muno kugenda kuheereza nambere hali obwetaaga bw’abatebezi b’amakuru amarungi ag’omu Baibuli. Omu 2010, tukagenda Belize, Central America. Hanu, tutebeza abantu abarukugonza Ruhanga kandi abaine iroho ly’amananu agali omu Baibuli.

Hati nyine obusinge omu bitekerezo habw’okumanya amananu agarukukwata hali Ruhanga n’Ekigambo kye Baibuli. Habwokuba ninkozesa obwire bwange bwona kutebeza, ntungire okusemererwa habw’okwegesa abantu baingi Baibuli. Kurora amananu kuruga omu Baibuli nigahindura obwomeezi bw’omuntu nk’oku gaahindwire obwange, nikyo ekintu ekirukukirayo kuleeta okusemerwa. Hakumalirra nkatunga omulingo ogukukirrayo kimu ogw’okusiima Ruhanga habw’obwomeezi oburungi obundukwegondezaamu.

“Bakanyoleka embabazi.”​—MAURÍCIO ARAÚJO

AKAZAARWA: 1967

IHANGA: BRAZIL

EBYAFAAYO: YALI MUSIIHANI

OBWOMEEZI BWANGE OBWA KARA: Nkakurra omu Avaré, etawuni entaito ey’eculiire omu isaaza lya São Paulo. Abantu abaikara omu tawuni enu abarukukira obwingi nibakora.

Isenyowe akafa obunkaba nkyali munda ya nyina nyowe. Obunkaba nkyali muto, najwaraga engoye za nyina nyowe obuyabaga atali muka. Nkatandika kwetwaza nkabaisiki, kandi abantu bakatandika kundora nk’omukuuhya. Hanyuma y’akasumi, nkatandika kuterana n’aboojo abandi hamu n’abasaija.

Obunkaba ndi haihi kuruga omu myaka yange ey’obusigazi, naserraga butoosa ab’okuterana nabo (abasaija n’abakazi) hoona nambere naali ninsobora kubasanga​—omu mabbaara, omu ndongo, n’omu makanisa. Omu kasumi k’ebijaguzo, najwaraga nk’omukazi kandi nzinira omu maiso g’abantu abaingi. Abantu baingi baali nibammanya kandi nibangonza.

Bamu h’abanywani bange baali bakuuhya, bamalaaya, n’abarukukozesa ebitokooza bwongo. Bamu hali bo bakangambira ngu ndengeho kunywa enjaahi, kandi nkakwatirayo. Haroho obutwaginywaga obwire bw’ekiro bwona. Obwire obumu, haroho obunayesorooraga kandi mara ekiro kyona ninywa enjaahi. Nkafooka mutaito muno kandi abantu batandika kugamba ngu ndwaire siliimu.

OMULINGO BAIBULI YAHINDWIRE OBWOMEEZI BWANGE: Omu kasumi ako, nkatangatangana Abakaiso ba Yahwe. Bakanyoleka embabazi. Rumu ha nkarra ezibansomiire kuruga omu Baibuli nirusangwa omu Abarumi 10:13, nambere harukugamba ngu: “Omuntu wena alikunga ibara lya [Yahwe] alijunwa.” Ebigambo binu bikandetera kumanya habwaki kikuru kukozesa ibara lya Yahwe. Emirundi nyingi hanyuma y’okukozesa ebitokooza bwongo omu bwire bw’ekiro, nakinguraga idirisa, nindora haiguru, kandi nsaba Yahwe nincura nimwesengereza kunkonyera.

Habw’okurora nk’oku nyina nyowe akaba ayeralikiriire kandi nabonabona obuyaroraga omulingo ebitokooza bwongo birukusiisa obwomeezi bwange, nkacwamu kuleka kubikozesa. Hanyuma, nkaikiriza kwega Baibuli n’Abakaiso ba Yahwe. Bakangumya ngu kwega Baibuli kwali nikwija kunkonyera kugumira ha ncwamu yange ey’okwecwaho ebitokooza bwongo​—kandi mali kikankonyera!

Obunayeyongiire kwega Baibuli, nkakyetegereza ngu nsemeriire kuhinduramu obwomeezi bwange. Kikangumira muno kuleka ebikorwa byange eby’obukuuhya, habwokuba nkaba mazire obwire bwingi muno nimbikora. Baitu, kimu ha bintu ebyankonyiire, kwali kuhinduramu ebiikaro nabamuga. Nkecwaho banywani bange aba akara kandi nkalekeraho n’okugenda omu mabbaara n’omu ndongo.

N’obukiraaba ngu kitanyanguhire kukora empindahinduka zinu, kikampuumuza muno kukimanya ngu Yahwe n’anfaaho kandi ngu nayetegereza ebindukurabamu kurora nayecwaho ebintu binu ebibi. (1 Yohana 3:19, 20) Nambere omwaka 2002 gwahikiire, nkaba ndekere ebikorwa byona eby’obukuuhya, kandi omu mwaka ogu gwonyini nkabatizibwa nk’omu h’Abakaiso ba Yahwe.

OMULINGO NGASIIRWE: Nyina nyowe akahunirra muno habw’empindahinduka nakozere kandi nauwe yatandika kwega Baibuli. Eky’enaku, kuruga obu akateerwa stroke. Baitu nabwo, akagumizaamu kwombeka okugonza kwe hali Yahwe na Baibuli.

Omu myaka munaana ey’erabireho, nyikaire ndi omu buheereza obw’akasumi koona, ninkozesa obwire bwange oburukukira kwegesa abantu abandi Baibuli. Amananu gali ngu obwire obumu haroho obuntunga okwegomba okubi kandi nkurwanisa. Baitu kimpumuza kukiijuka ngu kakuba ncwamu kutahondera okwegomba okubi ninsobora kusemeza Yahwe.

Kwirra haihi na Yahwe n’okukora ebyagonza kinkonyire kweha ekitiinisa. Hati, ndi musaija ow’asemeriirwe.

“Nanywaga Amaarwa Maingi.”​—LUKA ŠUC

AKAZAARWA: 1975

IHANGA: SLOVENIA

EBYAFAAYO: YANYWAGA AMAARWA MAINGI MUNO

OBWOMEEZI BWANGE OBWA KARA: Nkazaalirwa omu Ljubljana, orubuga orukuru orwa Slovenia. Nkakurra omu bwomeezi oburungi kuhikya obunahikize emyaka ena, Isenyowe obuyayeisire. Hanyuma y’ekigwererezi kinu, nyina nyowe akaba aine kukora n’amaani kusobora kutungira aboojo be babiri ebyokulya, obu ninyowe na mugenzi wange omukuru.

Obunahikize emyaka 15, nkatandika kwikara na nyinenkuru nyowe arukuzaara maama. Nagonzaaga muno kwikara nauwe habwokuba banywani bange baikaraga haihi n’eka ye. Ekindi, nabaga nyine obugabe bwingi oburukukira hali obunabaga nabwo ninyikara omuka. Ha myaka 16, nkatandika kunywana abantu abagendaga kunywa amaarwa ha wiikendi. Nkakuza isoke, natandika kujwara nk’omujeemu, kandi hanyuma nkatandika kunywa etaaba.

N’obukiraaba ngu nkakozesaaho ebitookoza bwongo ebirukwahukana, nkagumizaamu n’okunywa amaarwa habwokuba nikyo narozere nk’ekirukukirayo kunsemeza. Hanyuma y’akasumi, nkaruga ha kunywa gilaasi nke natandika nkunywa ecupa ezirukuhingura omuli emu. Nkafooka mukugu omu kunywa amaarwa kandi kikaba kitanguhire kumanya obundaaba ntamiire. Obwire oburukukira obwingi, okununka amaarwa nikyo kyonka kyayolekaga ngu nywire. Baitu nabwo, busaho muntu n’omu ow’akaba n’asobora kumanya ngu nywire ecupa nyingi ez’eviini, bbiya kandi nataburamu waragi.

Emirundi nyingi, n’obukiraaba ngu ninyowe nabaga nkizireyo kunywa amaarwa, ninyowe nakonyeraga banywani bange kusobora kurubata kutaaha hanyuma y’okuruga omu ndongo ekiro. Kiro kimu, nkahurra munywani wange nagamba ngu ndi “duramu etaine bugarukiro”​—ebigambo ebirukukozesebwa kujerega omuntu arukukira abandi kunywa amaarwa. Ebigambo ebi bikansaaliza muno.

Nkatandika kutekerezaaho omulingo nkaba nitwazaamu obwomeezi bwange. Nkatandika kwehurra nk’owataine mugaso. Kikansisanira ngu busaaho ekinkaba ninkora omu bwomeezi ekyali kiine amakuru.

OMULINGO BAIBULI YAHINDWIRE OBWOMEEZI BWANGE: Omu kasumi ako, nkakyetegereza ngu omu ha beegi bataahi bange akaba ahindukire; enyetwaza ye ekaba ehindukire kandi yafooka muculeezi. Nkaba nyine ekihika ky’okumanya ekyamuhindwire, nahabweki nkamuraaliza tugende hamu kugira ekitwalya. Obutwali nitubaza, akansoborra ngu akaba atandikire kwega Baibuli n’Abakaiso ba Yahwe. Akangambiraho bimu ha bintu eby’akaba nayega, byona bikambera bihyaka, habwokuba nkaba ntaine ekimanyire ha nyegesa z’ediini kuruga omu buto bwange. Nkatandika kugenda omu nsorrokano ez’Abakaiso ba Yahwe n’okwega Baibuli.

Kwega Baibuli kukansukurra amananu agankaba ntamanyire. Ekyokurorraho, nkeega ngu tuli omu biro Baibuli eby’eyeta ‘ebya ha mpero.’ (2 Timoseo 3:1-5) Ekindi, nkeega ngu Ruhanga ali haihi kwihaho abantu ababi omu nsi kandi ahe abantu abarungi omugisa ogw’okwegondeza omu bwomeezi obutahwaho omu rugonjo orurungi. (Zabuli 37:29) Nkahurra natunga ekihika eky’amaani eky’okugonza kusemeza obwomeezi bwange nukwo nanyowe mbe omu h’abantu abo abarungi.

Nkatandika kugambiraho banywani bange amananu agankaba ninyega kuruga omu Baibuli. Baingi hali bo bansekerezaaga habw’ebi ebinkaba nimbagambira, baitu kinu kikankonyera kugira ekinayetegereza. Omulingo bayetwaizemu gukankonyera kukimanya ngu bakaba batali banywani bange mali. Nkakyetegereza ngu ekizibu kyange eky’okunywa amaarwa kikaba kiine akakwate n’abanywani abankaba nyine. Baamaraga wiiki yoona balindiriire wiikendi nukwo bongere kutamiira.

Nkabecwaho kandi natunga abanywani abarukwombeka omu Bakaiso ba Yahwe. Obunywani bwabo bwanyekambisaaga habwokuba bali bantu abarukugonza Ruhanga kuruga ha mutima, kandi nibalengaho kugendera ha ndengo ze. Mpora mpora, nkasobora kulekera kimu engeso ey’okunywa amaarwa maingi.

OMULINGO NGASIIRWE: Ninsiima Yahwe ngu tinkyayetaaga amaarwa kusobora kusemererwa. Amananu gali ngu timanyire nk’oku nakubaire kakuba nagumiizeemu n’omulingo nkaba nitwazaamu obwomeezi bwange. Baitu ninkigumiza kimu ngu hati obwomeezi bwange burungi mali.

Hati, kumara emyaka musanju, nyine omugisa gw’okuheereza ha ofiisi y’itaagi ey’Abakaiso ba Yahwe omu Slovenia. Nsoboire kutunga ekigendererwa omu bwomeezi habw’okumanya n’okuramya Yahwe.