Obunabbi 5. Kuhwerekereza Ensi

‘[Ruhanga naija] kuhwerekereza abo abahwerekereza ensi.’​—OKUSUKU’RWA 11:18.

● Mr. Pirri alegya eviini ha miti y’eviini omu Kpor, Nigeria. Omulimo gwe gusiisirwe abantu abarukuseesa amafuta omu kisaaru ekirukwetwa Niger Delta. N’agamba ati; “Amafuta gaita encu zaitu, gasiisa omubiri gwaitu hamu n’ebisaaru byaitu. Tinkyaine mulimo gwona.”

AMANANU NIGOOLEKA KI? Kusigikirra ha bakugu abamu, kasasiro ey’erukuhika taani nka 6,500,000 niyo enagwa omu nyanja enkooto buli mwaka. Nikitekerezebwa ngu obucweka 50 ha buli kikumi obwa kasasiro enu, eri pulasitika ey’emara emyaka nyingi etakajunzire. Oihireho kusiisa ensi, abantu nibamaraho eby’obuguuda byayo ha sipiidi ey’amaani. Okuseruliiriza nikwoleka ngu ensi n’eyetaaga omwaka gumu n’emyezi etaano kwongera kugarraho ebintu abantu bakozesa omu mwaka gumu. Orupapura rw’amakuru orwa Australia orukumanywa nka Sydney Morning Herald nirugamba ngu “Kakuba abantu beyongera kukanya n’okukozesa ebintu omu nsi, nitwija kuba nitwetaaga ensi ibiri nambere omwaka 2035 gurahikira.”

ABANTU BAGAMBA KI? Nk’abantu twine amagezi. Nitusobora kumaraho ebizibu binu kandi tukajuna ensi.

MALI ENTEKEREZA EGI EHIKIRE? Abantu baingi hamu na guruupu z’abantu abarukukora n’amaani, basoboire kuhayo entekereza zaabo ezirukukwata ha by’obuhangwa. Baitu nabwo ensi n’eyeyongerra kimu kusiisikara.

NOTEKEREZA KI? Mali nikyetaagisa Ruhanga kugira ekiyakoraho kujuna ensi yaitu etahwerekerezebwa nk’oku yaraganiize?

Kwongerra ha bunabbi butaano obutwakabazaaho, Baibuli ekabazaaho n’ebintu ebirungi ebyakubaireho omu biro ebya ha mpero. Wetegereze kimu ha byokurorraho ebiri omu bunabbi obwa mukaaga.

[Ebigambo ebikomerwemu]

“Ninyehurra ngu tinkyaine kiikaro ekirukuzooka kurungi baitu ninsisana anyakwine ekiikaro ekirukunagwamu kasasiro.”​—ERIN TAMBER, OMWIKAZI W’EKIIKARO KYA GULF COAST, OMU UNITED STATES, OBW’AKABA N’ABAZAAHO AMAFUTA AGABAASEESERE OMU NYANJA YA GULF OF MEXICO OMU 2010.

[Akasanduuko]

Ruhanga Nuwe Arukujunanizibwa?

Nk’oku Baibuli yarangire ebintu ebibi ebiturukurora kasumi kanu, eki nikimanyisa ngu Ruhanga nuwe arukujunanizibwa habw’ebintu binu? Nuwe atuleetera kubonabona? N’osobora kutunga ebyokugarukamu by’ebikaguzo ebi omu suura 11 ey’akatabu Baibuli Mali Eyegesa Ki? Akaatirwe Abakaiso ba Yahwe.

[Ekisisani Nambere Kiihirwe]

U.S. Coast Guard photo