1-2. (a) Enyikara eiturumu kasumi kanu n’esisana eta n’ey’Abayudaaya abaarugire Baburoni kugaruka Yerusalemu? (b) Bazaaho ebizibu Abayudaaya baatungire. (Rora akasanduuko “ Obusumi bwa Hagai, Zakaliya, na Ezera.”)

 OBWIRE obumu oyeralikirra ha busumi obw’omumaiso? Obundi oferiirwe omulimo gwawe kandi n’oyeralikirra omulingo orarolerramu eka yaawe. Obundi oyeralikirra ha bulinzi obw’ab’omu ka yaawe habw’enyikara ey’eby’obulemi, okuhiiganizibwa, rundi okuhakanizibwa habw’okutebeza. Ohikirweho bimu ha bizibu binu? Obukiraaba nukwo kiri noija kugasirwa kwega omulingo Yahwe yakonyiire Abaisaleri abaakara obubaatungire ebizibu nk’ebi.

² Abayudaaya abaali bamazire obwire bwabo bwona omu Baburoni, baali nibetaaga okwikiriza okw’amaani kusobora kulekaho ebintu byabo n’obwomeezi oburungi obw’omu Baburoni, bagende omu nsi baingi eibaali batamanyire. Obubaahikireyo, ahonaaho bakatandika kutunga ebizibu omu byentahya, omu by’obulemi, n’okuhakanizibwa. Abamu kikabagumira kuteeka omutima ha kwongera kwombeka yekaru ya Yahwe. Nahabweki omu mwaka 520 Y.A., Yahwe akateekaho banabbi babiri Hagai na Zakaliya kwekambisa abantu kukora omulimo gwe. (Hag. 1:1; Zak. 1:1) Nk’oku turarora, banabbi banu bakasobora kugarramu abantu amaani. Baitu omu myaka 50 eyahondireho, Abayudaaya bakongera bayetaaga kugarurwamu amaani. Hanyuma, Ezera omukoporozi w’Ebiragiro akaruga Baburoni yagenda Yerusalemu kwekambisa abantu ba Ruhanga kwebembeza okuramya kwabo.​—Ezer. 7:​1, 6.

3. Bikaguzo ki ebiturukwija kugarukamu? (Enfumo 22:19)

 ³ Nk’oku obunabbi bwa Hagai na Zakaliya bwakonyiire Abayudaaya kweyongera kwesiga Yahwe omu busumi obw’okuhiiganizibwa, naitwe nibusobora kutugumya ngu Yahwe naija kutukonyera omu kasumi ak’ebizibu. (Soma Enfumo 22:19.) Obuturaaba nitwegaho obutumwa bwa Ruhanga kuraba omu Hagai na Zakaliya, hamu n’ekyokurorraho kya Ezera, nitwija kutunga ebyokugarukamu ebyebikaguzo binu: Ebizibu ebi bikakwataho bita Abayudaaya? Habwaki tusemeriire kuteeka omutima ha kukora Ruhanga eby’agonza omu busumi obugumire? Kandi nitusobora tuta kweyongera kwesiga Yahwe omu kasumi ak’ebizibu?

4-5. Kiki ekisobora kuba kyaletiire obwekambi bw’Abayudaaya obw’okwombeka Yekaru kuheeha?

⁴ Abayudaaya obubaagarukire Yerusalemu, bakaba baine bingi eby’okukora. Bakongera baayombeka ekyoto kya Yahwe n’omusingi gwa yekaru. (Ezer. 3:​1-3, 10) Baitu obwekambi obubaatandikire nabwo bukahwaho. Habwaki? Oihireho kwombeka yekaru, bakaba baine kweyombekera amaju, kulima ebyokulya, n’okurolerra ab’omu maka gaabo. (Ezer. 2:​68, 70) Kandi bakatunga okuhiiganizibwa kuruga omu banyanzigwa baabo abaali nibagonza kubalemesa kwongera kwombeka yekaru.​—Ezer. 4:​1-5.

⁵ Ekindi, Abayudaaya bakahikwaho ebizibu omu byentahya, n’omu by’obulemi. Ensi yaabo ekaba efookere kicweka ky’Obukama bwa Buperesi. Hanyuma y’Omukama wa Buperesi Kuro kufa omu mwaka 530 Y.A., Omukama Cambyses ayayongiireho akagonza kurwanisa Misiri. Obwakaba nagenda Misiri, amahe ge nigasobora kuba gaasabire Abaisaleri ebyokulya, amaizi, n’oburaaro, ekyabaletiire kweyongera kubonabona. Obulemi obwayongiireho obwa Daliyo ow’okubanza nabwo bukabamu ebizibu bingi, nk’abantu okujeema, n’obwimukirro. Hataroho kugurukyagurukya, ebizibu binu byona bikaleetera Abayudaaya kweralikirra ha mulingo bararolerramu ab’omu maka gaabo. Nahabweki Abayudaaya abamu bakatekereza ngu kaali katali kasumi akahikire kwongera kwombeka yekaru ya Yahwe.​—Hag. 1:2.

6. Kusigikirra ha Zakaliya 4:​6, 7, bizibu ki ebindi Abayudaaya ebibaatungire, baitu Zakaliya akabagumya ata?

⁶ Soma Zakaliya 4:​6, 7. Oihireho ebizibu omu by’entahya, n’omu by’obulemi, Abayudaaya bakongera baatunga ekizibu ekindi eky’okuhiiganizibwa. Omu mwaka 522 Y.A., abanyanzigwa baabo bakasingura omu kubalemesa kwongera kwombeka yekeru ya Yahwe. Baitu Zakaliya akabagumya ngu Yahwe naija kugumizaamu nabakonyera n’obubakweyongiire kutunga ebizibu. Omu mwaka 520 Y.A., Omukama Daliyo akabaikiriza kugumizaamu nibombeka yekaru, yabaha sente ez’okukozesa, kandi yaragira n’abalemi ab’ekiikaro eki kubakonyera.​—Ezer. 6:​1, 6-10.

7. Abayudaaya abaagarukire Yerusalemu obubaayebembiize kukora Ruhanga ebyagonza bakatunga migisa ki?

 ⁷ Kuraba omu Hagai na Zakaliya, Yahwe akaraganiza abantu be ngu naija kugumizaamu nabasagika obubarayebembeza omulimo ogw’okwombeka yekaru. (Hag. 1:​8, 13, 14; Zak. 1:​3, 16) Habw’okwekambisibwa banabbi, Abayudaaya bakongera baatandika kwombeka yekaru, omu mwaka 520 Y.A., kandi bagimalirra omu myaka etarukuhika etaano. Habwokuba Abayudaaya bakebembeza kukora omulimo gwa Yahwe n’obukiraaba ngu bakatunga ebizibu, Yahwe akabasagika omu by’omubiri n’omu by’omwoyo.  Kandi ekyarugiremu, bakaramya Yahwe baine okusemererwa.​—Ezer. 6:​14-16, 22.

8. Ebigambo ebirukusangwa omu Hagai 2:4 nibitukonyera bita kwikara nitukora Ruhanga eby’agonza? (Rora obugambo obuli hansi.)

⁸ Nk’oku omuhito omwingi guliyo nigwirirra haihi, kikuru muno kukijuka ngu tusemeriire kworobera ekiragiro eky’okutebeza amakuru amarungi. (Mar. 13:10) Baitu nikisobora kutugumira kakuba tuba twine ebizibu omu byentahya rundi nituhakanizibwa omu kutebeza. Kiki ekisobora kutukonyera kwebembeza omulimo gw’Obukama? Tusemeriire kukigumya ngu “[Yahwe] wamahe” b ali naitwe. Naija kutusagika obuturagumizaamu nitwebembeza Obukama. Nahabweki titusemeriire kutiina ekintu kyona.​—Soma Hagai 2:4.

9-10. Ow’oruganda na mukazi we bakerorra bata ngu ebigambo bya Yesu ebiri omu Matayo 6:33 bihikire?

⁹ Tekerezaaho ekyokurorraho kya ky’Ow’oruganda Oleg na mukazi we Irina, c abarukuheereza nka bapayoniya. Hanyuma y’okugenda kukonyera ekitebe omu kicweka ekindi, bakafeerwa omulimo gwabo habw’ebizibu omu byentahya omu ihanga lyabo. N’obukiraaba ngu bakamara omwaka bataine omulimo, bakaikara nibarora obusagiki bwa Yahwe kandi obwire obumu baatungaga obukonyezi kuruga omu b’oruganda na banyaanya itwe. Kiki ekyabakonyiire kugumira enyikara egi? Oleg, ow’akaba ayenuubire ha kubanza, n’agamba ati: “Kwikara twine bingi eby’okukora omu buheereza kikatukonyera kuteeka omutima ha bintu ebirukukirayo obukuru omu bwomeezi.” Uwe na mukazi we bakagumizaamu nibaserra emirimo, baitu nabwo baikara nibekamba omu buheereza.

¹⁰ Kiro kimu obubaagarukire omu ka nibaruga  omu buheereza, bakasanga munywani wabo ow’arugire hara nka kilomita 160 (mairo 100) abaletiire ensahu ibiri ez’ebyokulya. Oleg n’agamba ati: “Ha kiro eki, tukongera twarora omulingo Yahwe n’ab’oruganda barukutufaaho. Nitukigumiza kimu ngu Yahwe talyebwa abaheereza be, n’obubarukuba bali omu nyikara ey’egumire muno.”​—Mat. 6:33.

11. Yahwe naturaganiza ki obuturaikara tutaire omutima ha kukora ebyagonza?

¹¹ Yahwe n’agonza tuteeke omutima ha mulimo ogw’okufoora abantu abegeswa ogurukujuna obwomeezi. Nk’oku kyolekerwe omu k acweka ka 7, Hagai akekambisa abantu ba Yahwe kutandika omulimo ogw’okwongera kwombeka yekaru. Obubaakukozere eki, Yahwe akabaraganiza ati: “Ndabahaga omugisa.” (Hag. 2:​18, 19) Naitwe nitusobora kukigumya ngu Yahwe naija kutuha emigisa kakuba twebembeza omulimo ogw’atuhaire kukora.

12. Habwaki Ezera hamu n’Abayudaaya abandi abakaba bali omu bunyagwa baali nibetaaga okwikiriza okw’amaani?

¹² Omu mwaka 468 Y.A., Ezera akagenda na guruupu eyakabiri ey’Abayudaaya kuruga Baburoni kugenda Yerusalemu. Ezera hamu naabo abaakaba ali nabo, baali nibetaaga okwikiriza okugumire kusobora kugenda orugendo oru. Baali baine ezaabbu n’efeeza nyingi Omukama yali abahaire kwombekesa yekaru. Nahabweki bakaba nibasobora kutahirirwa abasuma. (Ezer. 7:​12-16; 8:31) Ekindi, bakakyetegereza ngu Yerusalemu ekaba etaine bulinzi. Orubuga rwali rutarumu abantu baingi kandi ebisiika n’emiryango byali nibyetaaga kudabirizibwa. Kiki ekiturukwegera hali Ezera obukirukuhika ha kwesiga Yahwe?

13. Kiki ekyakonyiire Ezera kweyongera kwesiga Yahwe? (Rora obugambo obuli hansi.)

¹³ Ezera akaba aboine omulingo Yahwe yasagikire abantu be omu bwire bw’ebizibu. Emyaka nke enyuma omu mwaka 484 Y.A., Ezera n’asobora kuba akaba naikara omu Baburoni, Omukama Ahasuero obuyahaire ekiragiro ngu Abayudaaya boona abarukwikara omu Bukama bwa Buperesi baitwe. (Es. 3:​7, 13-15) Obwomeezi bwa Ezera n’obw’Abayudaaya boona bukaba buli omu kabi! Obubaakihuliire, baketuntura muno, baaleka kulya obu nibarra kandi baasaba Yahwe abakonyere. (Es. 4:3) Tekerezaaho omulingo Ezera n’Abayudaaya abandi boona bayehuliire obukyabaireho ngu abo abaali nibagonza kubaita nubo baisirwe! (Es. 9:​1, 2) Ezera ebiyarabiremu kasumi ako bikamukonyera kwetekaniriza ebizibu ebiyakutungire omu kasumi ak’omumaiso, kandi nikisobora kuba kyamuletiire kweyongera kwesigira kimu Yahwe ngu naija kulinda abantu be. d

14. Isomo ki munyaanya itwe eriyayegere hanyuma y’okurora omulingo Yahwe yamukonyiremu obuyatungire ebizibu?

¹⁴ Obuturora omulingo Yahwe arukutufaaho omu kasumi ak’ebizibu, tweyongera kumwesiga ngu naija kutufaaho omu kasumi ak’omumaiso. Tekerezaaho ekyokurorraho kya munyaanya itwe Anastasia, ow’arukwikara omu Burugaizooba bwa Bulaaya. Abakozi bataahi be obubaalengereho kumuhambiriza kugira orubaju orwarasagika omu by’obulemi akacwamu kuleka omulimo. N’agamba ati: “Gunu gwali murundi gwange ogw’okubanza kwesanga ntaine sente.” Ayongeraho ati: “Nkasaba Yahwe kandi nayerorra omulingo arukunfaaho. Kakuba kibaho  nkongera kufeerwa omulimo gwange tinditiina. Ise nyowe ow’omu iguru araaba nanfaaho hati, naija n’okufaaho omu kasumi ak’omumaiso.”

15. Kiki ekyakonyiire Ezera kwikara nayesiga Yahwe? (Ezera 7:​27, 28)

¹⁵ Ezera akarora omulingo Yahwe akaba namufaaho. Obuyatekerezaahoga emirundi yoona Yahwe yamukonyiire, kikamukonyera kwikara namwesiga. Ezera akagamba ati: “Habwomukono gwa [Yahwe] Ruhanga wange ogukaba guli hali nyowe.” (Soma Ezera 7:​27, 28.) Ezera akakozesa ebigambo ebirukwesisaniriza nka binu emirundi mukaaga omu kitabu ekiyahandiikire.​—Ezer. 7:​6, 9; 8:​18, 22, 31.

16. Nyikara ki ezimu nambere tusobora kukirora ngu mali Yahwe natusagika? (Rora ekisisani.)

¹⁶ Yahwe n’asobora kutukonyera obutuba tuli omu nyikara ey’egumire. Ekyokurorraho, obw’osaba mukama waawe kukwikiriza kugenda omu rusorrokano orukooto rundi kuhinduramu ha bwire obworukukora kusobora kugenda omu nsorrokano zoona, kikuha omugisa ogw’okurora omulingo Yahwe arukukukonyeramu. Ekiraabaho nikisobora kukuhuniriza. Kandi ekirugamu, tweyongera kwesiga Yahwe.

17. Ezera akooleka ata obwebundaazi omu kasumi ak’ebizibu? (Rora ekisisani.)

¹⁷ Ezera akasaba Yahwe amukonyere. Buli murundi yayetunturaga habw’obujunanizibwa obwakaba aine kuhikiiriza, yasabaga Yahwe. (Ezer. 8:​21-23; 9:​3-5) Habwokuba Ezera yayesigaga Yahwe, kikekambisa abandi kumusagika n’okwegera ha kwikiriza kwe. (Ezer. 10:​1-4) Obutuba twetuntwire habw’omulingo turayehikyaho ebyetaago byaitu, rundi ha bulinzi obwa b’omu maka gaitu, tusemeriire kusaba Yahwe kutukonyera.

18. Kiki ekiratukonyera kweyongera kwesiga Yahwe?

¹⁸ N’obwebundaazi kakuba tusaba Yahwe kutukonyera kandi tukaikiriza obusagiki obw’Abakristaayo bagenzi baitu, nitwija kweyongera kwesiga Yahwe. Munyaanya itwe Erika owaine abaana basatu, akaikara nayesiga Yahwe n’obuyatungire ebizibu eby’amaani. Omu kasumi kake, akafeerwa omwana we owakaba akyali omunda hamu na iba. Ebi byona ebiyarabiremu, n’agamba ati: “Obworukuba okyatungire ebizibu n’oba otamanyire omulingo Yahwe arakukonyeramu. N’osobora kutunga obukonyezi omu mulingo obaire otarukunihira. Nkyeroliire ngu Yahwe agarukiremu esaara zange nakozesa banywani bange kuraba omu bigambo n’omu bikorwa byabo.  Kakuba ngambira banywani bange ebindukurabamu, nikibanguhira kunkonyera.”

19-20. Kiki ekiturukwegera h’Abayudaaya abatarasoboire kugaruka Yerusalemu?

¹⁹ Nitusobora n’okwegera h’Abayudaaya abatarasoboire kugaruka Yerusalemu. Abamu nibasobora kuba baalemesiibwe habw’okukura omu myaka, oburwaire obw’amaani, rundi habw’obujunanizibwa obw’eka. Baitu nabwo, bakasagika abaali nibagaruka Yerusalemu kuraba omu kubaha ebintu ebibaali nibetaaga kwombeka yekaru. (Ezer. 1:​5, 6) Nikizooka ngu na hanyuma y’emyaka 19 kurabaho, Abayudaaya abaali basigaire Baburoni baali nibakyasindikira guruupu eyabandize kugaruka Yerusalemu ebisembo.​—Zak. 6:10.

²⁰ N’obuturaaba tutakyasobora kuheereza Yahwe nk’oku twakugondeze, nitusobora kukigumya ngu n’asiima amaani turukuteekamu kumuheereza. Eki nitukimanya tuta? Omu kasumi ka Zakaliya, Yahwe akasaba nabbi kukora ekondo kuruga omu zaabbu n’efeeza ebyasindikirwe Abayudaaya abaali nibaikara Baburoni. (Zak. 6:11) ‘Ekondo’ enu yakubaire ‘nk’ekiijukyo’ habw’okuhayo kwabo. (Zak. 6:14) Nitusobora kukigumya ngu Yahwe talyebwa amaani tuteekamu kumuheereza n’obutuba tuli omu nyikara ezigumire.​—Baheb. 6:10.

21. Kiki ekiratukonyera kwikara tugumire tutarukutiina ekiraabaho omu kasumi ak’omumaiso?

²¹ Nitwija kweyongera kutunga ebizibu omu biro binu ebya ha mpero kandi enyikara nizisobora kweyongera kusiisikara omu kasumi ak’omumaiso. (2 Tim. 3:​1, 13) Baitu titusemeriire kwetuntura ekihinguraine. Ijuka ebigambo Yahwe yagambiire abantu be omu kasumi ka Hagai. Akagamba ati: “Nyowe ndi hamu nainywe, . . . mutatina.” (Hag. 2:​4, 5) Naitwe nitusobora kukigumya ngu Yahwe naija kwikara hamu naitwe obuturagumizaamu nitwekamba kukora eby’agonza. Obuturateeka omu nkora ebitwegere kuruga omu bunabbi bwa Hagai na Zakaliya hamu n’ekyokurorraho kya Ezera, nitwija kwikara nitwesiga Yahwe n’obuturatunga ebizibu bya mulingo ki omu kasumi ak’omumaiso.