Ebikaguzo Kuruga Omu Basomi Baitu
Noha ow’arukubazibwaho omu Isaya 60:1, ‘aimuka ata’ kandi ‘ayangasana ata’?
(Isaya 60:1) a nihagamba: “IMUKA, yangansana; baitu omusana gwawe guizire, ekitinisa kya [Yahwe] kikurugiireyo.” Ebigambi ebyetoroire orukarra runu nibyoleka ngu omukazi akaba Sayuni rundi Yerusalemu, ey’ekaba eri orubuga rwa Yuda omu kasumi ako. (Is. 60:14; 62:1, 2) Orubuga Yerusalemu nirukikirra ihanga lyona erya Isaleri. Ebigambo bya Isaya bituleetera kwekaguza ebikaguzo bibiri: Eky’okubanza, nidi kandi omu mulingo ki Yerusalemu obu yaimukire kandi yayangasana omu mulingo gw’akokurorraho? Ekyakabiri, ebigambo bya Isaya biriyo nibihikirra omu mulingo ogurukukiraho omu kasumi kaitu?
Nidi kandi omu mulingo ki Yerusalemu obu yaimukire kandi yayangasana omu mulingo gw’akokurorraho? Yerusalemu hamu na Yekaru yayo biikaire biri omu nyikara embi nambere Abayudaya obu bakaba bali omu bwiru omu Baburoni kumara emyaka 70. Baitu hanyuma ya Baburoni kusingurwa Abamedi n’Abaperusi, Abaisaleri boona kuruga omu Bulemi bwona obwa Baburoni bakaba nibasobora kugarukayo omu ihanga lyabo kandi bakagarraho okuramya okw’amananu. (Ezer. 1:1-4) Kutandika n’omwaka 537 Y.A., Abaisaleri abesigwa kuruga omu nganda 12 bakagarukayo. (Is. 60:4) Bakatandika kuhayo ebihongwa hali Yahwe, kujaguza ebijaguzo n’okwombeka buhyaka yekaru. (Ezer. 3:1-4, 7-11; 6:16-22) Omurundi ogundi, ekitiinisa kya Yahwe kikatandika kwangasana hali Yerusalemu—ekirukumanyisa kikatandika kwangasana h’abantu be. Hanyuma, nabo bakafooka endugirro y’ekyererezi hali amahanga, agakaba gali omu mwirima gw’eby’omwoyo.
Baitu nabwo, obunabbi bwa Isaya bukahikiirizibwa ekicweka omu kasumi ako. Abaisaleri baingi batagumizeemu niborobera Ruhanga. (Neh. 13:27; Mara. 1:6-8; 2:13, 14; Mat. 15:7-9) Hanyuma, bakanga Masiya, Yesu Kristo. (Mat. 27:1, 2) Omu mwaka 70 Y.A.K., Yerusalemu hamu na Yekaru yayo bikahwerekerezebwa omurundi ogwa kabiri.
Yahwe akaranga ngu Yerusalemu ekaba niija kuhwerekerezebwa omurundi gwa kabiri. (Dan. 9:24-27) Ekirukwoleka ngu, kitabe kigendererwa kye Yerusalemu ey’omu nsi kuhikiriza obunabbi bwona obwokugarra buhyaka oburukusangwa omu Isaya esuura 60.
Ebigambo bya Isaya biriyo nibihikirra omu mulingo ogurukukiraho omu kasumi kaitu? Ego, baitu kinu nikihikirra hali omukazi ondi ow’akokurorraho—“Yerusalemu orwomu iguru.” Omukwenda Paulo akamuhandiikaho ati: “Nuwe nyina itwe.” (Bag. 4:26) Yerusalemu orwomu iguru nikyo ekicweka eky’ekitebe kya Ruhanga eky’omu iguru ekirumu ebihangwa eby’omwoyo ebyesigwa. “Abaana” be nibatwarramu Yesu hamu n’Abakristaayoabaseserweho amagita 144,000, nka Paulo, abaine okunihira okw’okugenda omwiguru. Abakristaayo abaseserweho amagita nibakora “ihanga erirukwera”—“Isareri owa Ruhanga.”—1 Pet. 2:9; Bag. 6:16.
Yerusalemu orw’omu iguru ‘ekaimuka’ kandi ‘yayangasana’ eta? Eki ekakikora kuraba omuli abaana abaseserweho amagita ab’omu nsi. Lengesaniza ebibarabiremu hamu n’ebi ebyarangirwe omu Isaya esuura 60.
Abakristaayo abaseserweho amagita bakaba baine ‘kwimuka’ habwokuba bakaba bali omu mwirima ogw’eby’omyoyo, enyegesa z’ebisuba obu zajanjaire hanyuma y’abakwenda kufa. (Mat. 13:37-43) Omu kasumi ako, bakaba hansi y’obusobozi bwa Baburooni orukuru, orurukukikirra amadiini goona ag’ebisuba omu nsi. Abaseserweho amagita bakaikara bali bairu kuhikya “hampero yensi,” akasumi akaatandikire omu mwaka 1914. (Mat. 13:39, 40) Omu kacu kake, omu 1919, bakalekerwa kandi ahonaaho bakatandika kwangasana ekyererezi eky’ebyomyoyo obu nibejumbira omu bwijwire omu mulimo ogw’okutebeza. b Kumara emyaka nyingi, abantu kuruga omu mahanga maingi baizire omu kyererezi eki, otwaliiremu n’abasigaireho hali Isaleri ya Ruhanga—kandi abo nubo ‘abakama’ abarukubazibwaho omu Isaya 60:3.—Kus. 5:9, 10.
Omu kasumi ak’omumaiso, Abakristaayo abaseserweho amagita nibaija kwangasana ekyererezi kuruga hali Yahwe omu mulingo ogurukukiraho. Omu mulingo ki? Hanyuma y’okufa hanu omu nsi, nibaija kuba kicweka kya “Yerusalemu Oruhyaka,” rundi omugole wa Kristo kandi abo nubo 144,000 abakama kandi banyakatagara bagenzi be.—Kus. 14:1; 21:1, 2, 24; 22:3-5.
Yerusalemu Oruhyaka rukuru muno omu kuhiikiriza obunabbi oburukusangwa omu Isaya 60:1. (Lengesaniza Isaya 60:1, 3, 5, 11, 19, 20 na Okusuku’rwa 21:2, 9-11, 22-26.) Nk’oku Yerusalemu ey’omu nsi kikaba kiri kitebe kikuru omu Isaleri eya kara, omulingo nigwo gumu Yerusalemu Oruhyaka hamu na Kristo nibaija kufooka gavumenti ey’entekaniza ey’ebintu empyaka. Yerusalemu Oruhyaka rusirimuka ruta “okuruga omu iguru hali Ruhanga”? Kuraba omu kugira eki rwakoraho hali ensi. Abantu abarukutiina Ruhanga kuruga omu mahanga goona “[baligendera] omu musana gwarwo.” Ekindi, nibaija kuba bacungwirwe kuruga omu kibi n’okufa. (Kus. 21:3, 4, 24) Ekirarugamu, kugarra ebintu byona buhyaka, nk’oku Isaya na banabbi abandi baagambire. (Eng. 3:21) Okugarra ebintu buhyaka kukatandika Kristo obu yafookere Omukama kandi nikwija kuhwa hakumalirra kw’Obulemi bwe obw’Emyaka Rukumi.
a Omu Ruheburaniya orukarra runu nirubazaaho omukazi.
b Okugarurwa buhyaka omu by’omwoyo okwabaireho omu 1919 nukwongera kubazibwaho omu Ezekyeri 37:1-14 hamu na Okusuku’rwa 11:7-12. Ezekyeri akaranga okugarurwa buhyaka okw’Abakristaayo boona abaseserweho amagita hanyuma y’okumara akasumi omu bunyagwa. Obunabbi obuli omu Okusuku’rwa nibumanyisa kuzaarwa buhyaka omu by’omyoyo okwa guruupu entaito ey’ab’oruganda abaseserweho amagita abarukwebebembera hanyuma y’akasumi kake bahambiriziibwe kuleka kuheereza Yahwe obu nibasibwa omu nkomo bataine musango. Omu 1919, bakakomwa kuba ‘omwiru omwesiga kandi ow’amagezi.’—Mat. 24:45; rora ekitabu Pure Worship of Jehovah—Restored At Last!, rup. 118.
