Bakarora Okugonza omu Bikorwa
YOMARA hamu n’abagenzi be—Marcelo na Hiver—nibaikara omu kyaro ekitaito omu Guatemala. Yomara akatandika kwega Baibuli n’Abakaiso ba Yahwe kandi hanyuma n’abagenzi be bakamweteranizaaho. Baitu hakaba haroho ekizibu. Boona basatu bakaba bafu b’amaiso, kandi batarukusobora kusoma orulimi orw’abafu b’amaiso. Nahabweki, omwegesa wabo yabasomeraga obucweka hamu n’enkarra eza Baibuli ezaabaga omu isomo.
Ekindi, kyabagumiraga kugenda omu nsorrokano z’ekitebe. Bakaba batarukusobora kurubata orugendo rw’edakiika 40 kugenda ha Kyombeko ky’Obukama habwabo bonka. Baitu ab’oruganda omu kitebe bakakora entekaniza ez’okubatwaraga omu nsorrokano zoona. Kandi obubatandikire kuheereza ebicweka by’abeegi omu nsorrokano eza hagati omu wiiki, ab’oruganda babakonyeraga kukwata ebicweka byabo omu mutwe.
Omu Maayi 2019, ensorrokano z’ekitebe zikatandika kuba omu kyaro kyabo. Omu bwire obu, ow’oruganda na mukazi we abaheerezaaga nka bapayoniya ab’akasumi koona bakafurukira omu kyaro kyabo. Bakakifoora kigendererwa kyabo kukonyera Yomara, Marcelo, hamu na Hiver kwega kusoma n’okuhandiika orulimi orw’abafu b’amaiso, n’obukiraaba ngu bakaba batamanyire omulingo gw’okukikoramu. Nahabweki bakagenda omu laiburale batunga ebitabu ebirukubazaaho orulimi rw’abafu b’amaiso nukwo basobole kwega omulingo gw’okwegesa abandi kubikozesa.
Marcelo nahayo eky’okugarukamu ha rusorrokano rw’ekitebe
Hanyuma y’emyezi nke, Yomara, Marcelo, hamu na Hiver bakaba nibasobora kusoma orulimi rw’abafu b’amaiso kurungi, kandi eki kikabakonyera kweyongera kukurakurana omu by’omwoyo. a Hati, nibaheereza nka bapayoniya ab’akasumi koona. Marcelo naheereza nk’omuheereza omu kitebe. Wiiki yoona bagimara baine bingi by’okukora omu kuheereza Yahwe. Habw’obwekambi bwabo, kiretiitire n’abandi kugonza kuba nkabo.
Yomara, Marcelo, hamu na Hiver nibasiima muno habw’obusagiki n’okugonza ekitebe kiboolekere. Yomara nagamba ati: “Kurugira kimu omurundi gwaitu ogw’okubanza kutangatangana Abakaiso ba Yahwe, batwolekere okugonza kwonyini okw’Ekikristaayo.” Marcelo nayongeraho ati: “Twine abanywani abarungi omu kitebe kyaitu, kandi tuli kicweka ky’oruganda orw’ensi yoona oruli omu bumu.” Yomara hamu n’abagenzi be balindiriire n’ekihika ekiro obubalirora ensi efookere orugonjo orurungi.—Zab. 37:10, 11; Is. 35:5.
a Burocuwa ey’eine omutwe Learn to Read Braille etekaniziibwe kukonyera omuntu ow’afiire amaiso rundi ow’atarukuhweza kurungi kwega omulingo gw’okusoma n’okuhandiika orulimi orw’abafu b’amaiso.
