Omulingo Tusobora Kwoleka Abantu Abandi Okugonza
Itwena nk’oku tuli baijukuru b’omusaija ow’okubanza Adamu, nikimanyisa ngu tuli ab’omu ka emu. N’obukiraaba ngu abantu ab’omu ka emu basemeriire kugonza n’okutamungana ekitiinisa, kasumi kanu abantu tibaine okugonza oku. Ruhanga waitu ow’okugonza tagonza abantu betwaze omu mulingo ogu.
EBYAHANDIIKIRWE EBIRUKWERA EKIBIRUKUGAMBA HA OKUGONZA
‘Gonza mutaahi wawe nk’oku oyegonza wenka.’—EBYABALEVI 19:18.
“Mugonzege abanyanzigwa banyu.”—MATAYO 5:44.
NIKIMANYISA KI KUGONZA ABANTU ABANDI?
Tekerezaaho omulingo Ruhanga asoborra amakuru ag’okugonza omu Kigambo kye omu 1 Abakolinso 13:4-7:
“Okugonza nukugumiisiriza, kuba nembabazi.”
Kitekerezeeho: Oyehurra ota abandi obubakugumiisiriza, bakakwoleka embabazi, kandi obubatakutabukira habw’ensobi zaawe?
“Okugonza tikuba nihali.”
Kitekerezeeho: Oyehurra ota abantu obubaikara nibakwekengera rundi nibakukwatirwa ihali?
Okugonza “tikuserra ebyakwo kwonka.”
Kitekerezeeho: Oyehurra ota abandi obubatekamu ekitiinisa entekereza yaawe kandi bataikara nibatekereza ngu entekereza yabo yonka niyo ehikire?
Okugonza tikwahura enzigu.
Kitekerezeeho: Ruhanga ayetekaniize kuganyira abantu abamusiisira obubegarukamu. “Talihana ebiro byona; kunu taliba nekiniga obusinge bwona.” (Zabuli 103:9) Kitusemeza muno omuntu outusobiize obw’atuganyira. Nahabweki naitwe tusemeriire kwikara twetekaniize kuganyira abandi obubatusobeza.—Zabuli 86:5.
Okugonza “tikusemere’rwa okutahikirra.”
Kitekerezeeho: Ekintu ekibi obukitubaho, titugonza abantu abandi basemererwe habw’okubonabona kwaitu. Nahabweki titusemeriire kusemererwa abandi obubahikwaho ebizibu, n’obukiraaba ngu bakatutwaza kubi.
Kusobora kutunga omugisa gwa Ruhanga, tusemeriire kugonza abantu abandi omu miringo egi tutarukusoroora. Omulingo gumu ogutusobora kukikora nugwo ogw’okukonyera abali omu bwetaago.
