HALI ABASWERANGAINE
3: Ekitiinisa
NIKIMANYISA KI?
Abaswerangaine abarukutekamungana ekitiinisa bafaahongana n’obubatunga obutetegerezangana. Ekitabu ekirukwetwa Ten Lessons to Transform Your Marriage nikigamba kiti: “Abaswerangaine nk’abanu betantara kuba omu nyikara ezisobora kubaleetera kucwa emisingi eibarukuhondera, oihireho babazaaho obutetegerezangana bwona obubatunga. Bahuliirizangana omu mulingo ogw’ekitiinisa kandi bakora empindahinduka eziraabagasira boona.”
OMUSINGI GWA BAIBULI: “Okugonza . . . tikuserra ebyakwo kwonka.”—1 Abakolinso 13:4, 5.
“Ntekamu mukazi wange ekitiinisa obummutwara nk’ow’omuhendo, n’okutakora ekintu kyona ekisobora kumusiisa ibara kandi kikasiisa n’obuswere bwaitu.”—Micah.
HABWAKI KIKURU?
Abaswerangaine obubatatekamungana ekitiinisa, baikara nibacwerangana omusango, nibasekerezangana kandi nibajoogangana—emiringo abarukuseruliiriza eibagamba ngu niyo erugamu okugaitururwa.
“Kubazaaho kubi mukazi waawe, kumukiina, rundi kumusandaaza omu mulingo ogurukuswaza nikiija kumumaramu ekitiinisa, aleke kukwesiga kandi kisiise n’obuswere bwanyu.”—Brian.
EKY’OSOBORA KUKORA
WERENGESE
Mwekebiije ebigambo n’ebikorwa byanyu kumara wiiki. Hanyuma wekaguze:
-
‘Mirundi ingaha eimbaliize kubi oundi nauwe omu buswere, kandi mirundi ingaha eimusiimire?’
-
‘Miringo ki emu einyolekere ngu nintamu ekitiinisa oundi nauwe omu buswere?’
MUBAZEEHO HAMU ENSONGA
-
Bigambo ki n’ebikorwa ebisobora kuleetera buli omu hali inywe kwehurra ngu n’atekwamu ekitiinisa?
-
Bigambo ki n’ebikorwa ebireetera buli omu hali inywe kwehurra ngu tarukutekwamu kitiinisa?
AMAGEZI AGASOBORA KUKONYERA
-
Handiika ha kapapura emiringo esatu eiwakugondeze kuteekwamu ekitiinisa. N’owoli nauwe omu buswere akole ekintu nikyo kimu. Muhingisanize obupapura, kandi mwekambe kutekamungana ekitiinisa nimusigikirra ha nyikara ezolekerwe ha bupapura.
-
Handiika emiringo enungi ey’ogonzaaho ow’oli nauwe omu buswere. Hanyuma omugambire nk’oku emiringo ye egi enungi erukukusemeza muno.
“Nyoleka ngu nintekamu iba nyowe ekitiinisa kuraba omu kumwoleka ngu w’omuhendo hali nyowe kandi ngu ningonza abe n’okusemererwa kuraba omu bikorwa byange. Tikyetaagisa kukora ebintu eby’amaani, baitu obuntu obutaito obummukorra bwoleka ngu nimuteekamu ekitiinisa ky’amaani.”—Megan.
Kwehurra ngu torukutekwamu ekitiinisa tikiri kikuru, baitu ekikuru nikyo ow’owoli nauwe omu buswere kwehurra ngu n’atekwamu ekitiinisa.
OMUSINGI GWA BAIBULI: “Mujwale, . . . omutima ogw’embabazi, noburungi, nobuculezi, nokwebundaza, nokugumisiriza.”—Abakolosai 3:12.
