Ekitebe kyaitu kiteera kandi kigaba Baibuli n’ebitabu ebirukuhingura omu bukaikuru buli mwaka, kitasaswize bantu sente. Kyombeka n’okurolerra ofiisi zaitu hamu n’Ebyombeko by’Obukama. Kirolerra Ababeseri, n’abaminsani baingi, kandi obu hagwaho obuzibu, twirukirra ababa nibetaaga obukonyezi. N’osobora kwekaguza, sente ezikora ebintu byoona ebyo ziruga nkaha?

Titusaba kimu ky’ikumi gonze kusoroza sente. Nobukiraaba nikyetaagisa sente nyingi kwemerezaho omulimo gwaitu ogw’okutebeza, titugenda nitusabiriza sente. Emyaka nka kikumi erabireho, akatabu ka Watchtower kakagamba, tukimanyire ngu Yahwe nuwe mukonyezi waitu, kandi kakongera kagamba “tituligenda nitusaba obukonyezi kuruga omu bantu” kandi mali tikikabahoga!—Matayo 10:8.

Omulimo gwaitu gwemereziibweho okuhayo okw’okwegondeza. Abantu abarukukira obwingi abasiima omulimo gwaitu, batusagika nibahayo begondiize. Abakaiso ba Yahwe nabo bahayo amaani gaabu, sente, n’ebintu ebindi kusobozesa omulimo gunu kukorwa omu nsi yoona. (1 Ebyomubusinge 29:9) Nambere tuso’rokanira habayo obusanduuko hali ogu weena arukugonza kusagika omulimo gunu arukusobora kuteka sente. Rundi n’osobora n’okukozesa omukura gwaitu ogwa jw.org kusagika omulimo gunu. Abarukukira obwingi hali abo abahayo, tibali baguuda baitu basisana omufakati Yesu ou yabalizeho, ayataire sente ibiri omu lyahu’ro. (Luka 21:1-4) Nahabwekyo, buli muntu asobora ‘kwahu’raga nk’oku asobora’ asobole kuhayo ‘nkoku yatekerize kara omu mutima gwe.’—1 Abakolinso 16:2; 2 Abakolinso 9:7.

Nitukigumya ngu Yahwe naija kwongera kukozesa abantu ab’emitima enungi, ab’arukugonza kumuheisa ekitiniisa n’ebintu byaabu, kusagika omulimo gw’Obukama kisobozese eby’agonza kukorwa.—Enfumo 3:9.

• Kiki ekitufoora ab’enyahukana ha madiini agandi?

• Sente ezihebwayo kusagika omulimo gwaitu zikozesebwa zita?