ISOMO 24
Amananu Agarukukwata Hali Bamalaika Nugo Gaha?
Yahwe n’agonza twegeho eka ye ey’omu iguru. Eka egi n’etwarramu bamalaika abarukwetwa ‘abaana ba Ruhanga.’ (Yobu 38:7) Kiki Baibuli eky’ebazaaho bamalaika? Bakora ki? Kandi bamalaika boona bali kicweka ky’eka ya Ruhanga?
1. Bamalaika nubo baha?
Yahwe akahanga bamalaika atakahangira ensi. Nka Yahwe, nabo tibarukurorwa kandi baikara omu iguru. (Abaheburaniya 1:14) Haroho obukaikuru n’obukaikuru bwa bamalaika, kandi buli malaika tarukusisana n’ondi. (Okusuku’rwa 5:11) Bahikiriza ekigambo kya Yahwe, kandi borobera iraka lye. (Zabuli 103:20) Omu busumi bwa kara, haroho Yahwe obuyatumaga bamalaika kutwara obutumwa, kukonyera, n’okujuna abantu be. Kasumi kanu bamalaika bakonyera Abakristaayo kuhikaho abantu abarukugonza kwega hali Ruhanga.
2. Sitaani na badaimoni be nubo baha?
Bamalaika abamu bataikale bali besigwa hali Yahwe. Malaika ayabandize kujeema nuwe ‘arukwetwa Diabolo kandi Sitaani, arukubihabiha ensi zoona.’ (Okusuku’rwa 12:9) Sitaani akagonza kulema abandi. Nahabweki akaleetera Adamu na Hawa kandi hanyuma na bamalaika abamu kujeemera Yahwe. Bamalaika abaajemere nibetwa daimoni. Yahwe akababinga omu iguru baija omu nsi, kandi nibaija kuhwerekerezebwa.—Soma Okusuku’rwa 12:9, 12.
3. Sitaani na badaimoni balengaho bata kutuhabisa?
Sitaani na badaimoni bahabisa abantu baingi kurabira omu buraguzi, ekintu ekibi ekyokulengaho kubaza n’emyoyo emibi. Ekyokurorraho, abantu abamu bagenda hali abantu abaraguza enyunyuzi, abarogo, abarangi hamu n’abafumu. Abandi baserra obujanjabi obwine akakwate n’oburaguzi. Abantu abandi nibabiihwabiihwa ngu nibasobora kubaza n’abaafiire. Baitu Yahwe n’atutererra ati: “Mutahindukira abo ababandwa emizimu, nobuhokuba hali abarogo.” (Ebyabalevi 19:31) N’atuha obuhabuzi bunu kutulinda hali Sitaani na badaimoni. Banyanzigwa ba Ruhanga kandi nibagonza kutuhikyaho akabi.
YEGA EBIRUKUKIRAHO
Manya ebintu ebirungi bamalaika bakora, akabi akali omu buraguzi, hamu n’omulingo tusobora kwerinda Sitaani na badaimoni.
4. Bamalaika bakonyera abantu kwegaho Yahwe
Bamalaika ba Ruhanga tunubo bagenda kutebeza abantu. Oihireho nibasobora kukonyera abaheereza ba Ruhanga kuhikaho abantu abarukugonza kumwegaho. Musome Okusuku’rwa 14:6, 7, hanyuma mubazeeho ebikaguzo binu:
-
Habwaki nitwetaaga obukonyezi bw’abamalaika kusobora kutebeza?
-
Nikikugarramu amaani kukimanya ngu bamalaika nibakwebembera kukuhikya h’abantu abarukugonza kumanya ebirukukwata ha Baibuli? Habwaki?
5. Yangira kimu oburaguzi
Sitaani na badaimoni banyanzigwa ba Yahwe. Naitwe banyanzigwa baitu. Musome Luka 9:38-42, hanyuma mubazeeho ekikaguzo kinu:
-
Badaimoni bakora ki abantu?
Titurukugonza kuheereza badaimoni ekiikaro omu bwomeezi bwaitu. Musome Ekyebiragiro 18:10-12, hanyuma mubazeeho ebikaguzo binu:
-
Badaimoni balengaho bata kutukozesa n’okubaza naitwe? Migenzo ki eyekanyire omu kiikaro eky’orukwikaramu?
-
N’otekereza ngu kihikire, Yahwe kututanga ebintu ebiine akakwate n’oburaguzi? Habwaki?
Mutekeho VIDIYO, hanyuma mubazeeho ebikaguzo binu.
-
N’otekereza akakomo Palesa akayajwekere muhara we kaine akabi? Habwaki?
-
Kiki Palesa eky’akaba asemeriire kukora kwerinda badaimoni?
Abakristaayo ab’amananu baikaire nibarwanisa badaimoni. Musome Engeso Ezabakwenda 19:19 na 1 Abakolinso 10:21, hanyuma mubazeeho ekikaguzo kinu:
-
Habwaki kikuru kuhwerekereza ekintu kyona ekyoine ekiine akakwate n’oburaguzi?
6. Singura obulemu obw’okurwana na Sitaani na badaimoni be
Badaimoni nibebemberwa Sitaani. Baitu bamalaika abesigwa nibebemberwa Mikaeri malaika omukuru, kandi Mikaeri niryo ibara lya Yesu erindi. Mikaeri aine amaani agarukwingana nkaha? Musome Okusuku’rwa 12:7-9, hanyuma mubazeeho ebikaguzo binu:
-
Noha arukukira amaani? Mikaeri na bamalaika be rundi Sitaani na badaimoni be?
-
N’otekereza abahondezi ba Yesu basemeriire kutiina Sitaani na badaimoni be?
N’osobora kusingura obulemu ebw’okurwanisa Sitaani na badaimoni be. Musome Yakobo 4:7, hanyuma mubazeeho ekikaguzo kinu:
-
N’osobora ota kwerinda Sitaani na badaimoni be?
ABANTU ABAMU BAGAMBA: “Tikiri kibi kuzaana emizaano rundi kurora filimu ezirumu oburaguzi. By’okwesemeza kwonka.”
-
Habwaki entekereza egi y’akabi muno?
OYEGERE KI?
Bamalaika abesigwa batukonyera. Sitaani na badaimoni be banyanzigwa ba Yahwe kandi bakozesa oburaguzi kuhabya abantu.
Kweijukyamu
-
Bamalaika ba Yahwe nibakonyera bata abantu kumwegaho?
-
Sitaani na badaimoni be nubo baha?
-
Habwaki osemeriire kwetantarra kimu oburaguzi?
SERULIIRIZA
Rora obwakaiso oburukwoleka nk’oku Yesu nuwe Mikaeri malaika omukuru.
“Mikaeri Malaika Omukuru Nuwe Oha?” (Ekicweka kinu kiri ha mukura)
Rora obwakaiso oburukwoleka ngu Sitaani aroho kwo.
Rora omulingo omukazi yayecwireho badaimoni.
“Akazoora Ekigendererwa ky’Obwomeezi” (Watchtower, eya Julaayi 1, 1993)
Manya omulingo Sitaani akozesa oburaguzi kubiihabiiha abantu.
