ISOMO 21
Amakuru amarungi galiyo nigatebezebwa gata?
Omu kasumi akatali ka hara, Yahwe naija kukozesa Obukama bwe kumaraho ebizibu byaitu byona. Amakuru ago marungi muno kandi buli omu asemeriire kugahurra. Yesu akaba n’agonza abahondezi be bagambireho buli omu obutumwa bunu! (Matayo 28:19, 20) Abakaiso ba Yahwe nibahikiriza bata ekiragiro kya Yesu kinu?
1. Ekyahandikirwe ekiri omu Matayo 24:14 nikihikirizibwa kita kasumi kanu?
Yesu akaranga ngu: “Nenjiri enu eyobukama eritebezebwa omu nsi zona.” (Matayo 24:14) Abakaiso ba Yahwe baliyo nibakora omulimo gunu omukuru n’okusemererwa. Nitutebeza amakuru amarungi omu nsi yoona omu ndimi ezirukuhingura 1,000! Omulimo gunu omukooto nigwetaagisa kutamu amaani maingi hamu n’okuba n’entekaniza enungi. Tigusobora kukorwa hataroho obukonyezi bwa Yahwe.
2. Maani ki agatutamu kusobora kutebeza abantu?
Tutebeza hoona nambere tusanga abantu. Kusisanaho n’Abakristaayo ab’omu kyasa eky’okubanza, tutebeza abantu “omu maka gabu.” (Engeso Ezabakwenda 5: 42) Omulingo gunu ogw’okutebeza ogutekaniziibwe kurungi gutukonyera kutebeza obukaikuru n’obukaikuru bw’abantu buli mwaka. Nk’oku abantu batakira kwikara omu maka gaabo, tutebeza n’omurwijwire. Twikara nituserra omugisa gw’okugambiraho abantu abandi hali Yahwe hamu n’ebigendererwa bye.
3. Nibaha abaine obujunanizibwa obw’okutebeza amakuru amarungi?
Abakristaayo boona ab’amananu baine obujunanizibwa bw’okutebeza abantu abandi amakuru amarungi. Obujunanizibwa bwaitu tubutwara nk’ekintu ekikuru muno. Tukora kyona ekirukusoboka kutebeza habwokuba tukimanyire ngu obwomeezi bw’abantu buli omu kabi. (Soma 1 Timoseo 4:16.) Titusasurwa kukora omulimo gunu habwokuba Baibuli egamba ngu: “Mukahebwa kwonka muhege kwonka.” (Matayo 10:7, 8) Abantu abamu tibaikiriza obutumwa bwaitu. Baitu twikara nitutebeza habwokuba kutebeza kiri kicweka ky’okuramya kwaitu kandi kisemeza Yahwe.
YEGA EBIRUKUKIRAHO
Manya ebirukukiraho ha mulingo Abakaiso ba Yahwe batebeza omu nsi yoona, kandi orole omulingo Yahwe atukonyeramu.
Okutebeza omu nsi yoona: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Tukora n’amaani kuhikaho abantu boona
Abakaiso ba Yahwe batamu amaani ag’embaganiza kutebeza amakuru amarungi hali abantu boona. Mutekeho VIDIYO, hanyuma mugarukemu ekikaguzo ekirukuhonderaho.
-
Kiki ekikizire kukukwataho habw’amaani Abakaiso ba Yahwe batamu kutebeza?
Musome Matayo 22:39 na Abarumi 10:13-15, hanyuma mubazeeho ebikaguzo binu:
-
Obuheereza bwaitu nibwoleka buta ngu nitugonza bataahi baitu?
-
Yahwe ayehurra ata hali abo abatebeza amakuru amarungi? (Rora orukarra 15.)
5. Tuli bakozi hamu na Ruhanga
Haroho ebyokurorraho bingi ebirukwoleka ngu Yahwe n’ayebembera omulimo gwaitu. Ekyokurorraho, omu ihanga lya New Zealand ow’oruganda arukwetwa Paul, akaba n’atebeza enju ha nju omu bwire bwa nyamusana kandi akatangatangana omukazi. Kiro eki nyenkyakara, omukazi onu akaba asabire Ruhanga n’akozesa ibara lya Ruhanga, Yahwe, kandi yamusaba ngu habeho ayaija kumutebeza. Paulo n’agamba ati; “Hanyuma y’esaaha isatu kurabaho, nkahika ha rwigi rwe.”
Musome 1 Abakolinso 3:9, hanyuma mubazeeho ekikaguzo kinu:
-
Ekyokurorraho nk’eki eky’omu ihanga lya New Zealand nikyoleka kita ngu Yahwe n’ayebembera omulimo gw’okutebeza?
Musome Engeso Ezabakwenda 1:8, hanyuma mubazeeho ekikaguzo kinu:
-
Habwaki nitwetaaga obukonyezi bwa Yahwe kuhikiriza obuheereza bwaitu?
Obaire okimanyire?
Buli wiiki, omu rusorrokano orwa hagati omu wiiki, tutunga okutendekwa okutukonyera kutebeza. Obworaaba wabaireho ha rumu ha nsorrokano zinu, okutendekwa kunu okakutekerezaaho ki?
6. Tworobera ekiragiro kya Ruhanga eky’okutebeza
Omu kyasa eky’okubanza, abahakani bakalengaho kutanga abahondezi ba Yesu kutebeza. Abakristaayo aba kara bakarwanirra obugabe bwabo obw’okutebeza kurabira omu “kutonganira nokugumya” amakuru amarungi. (Abafiripi 1:7) Abakaiso ba Yahwe bakora ekintu nikyo kimu kasumi kanu. a
Musome Engeso Ezabakwenda 5:27-42, hanyuma mubazeeho ekikaguzo kinu:
-
Habwaki tutalireka kutebeza?—Rora orukarra 29, 38, na 39.
OMUNTU N’ASOBORA KUKAGUZA: “Habwaki Abakaiso ba Yahwe batebeza enju ha nju?”
-
N’osobora kugarukamu ota?
OYEGERE KI?
Yesu akaragira abahondezi be kutebeza amakuru amarungi omu mahanga goona. Yahwe n’akonyera abantu be kukora omulimo gunu.
Kweijukyamu
-
Amakuru amarungi galiyo nigatebezebwa gata omu nsi yoona?
-
Obuheereza bwaitu bwoleka buta ngu nitugonza bataahi baitu?
-
Notekereza ngu kutebeza nigusobora kuba omulimo ogurukuleeta okumarwa? Habwaki?
SERULIIRIZA
Rora omulingo Abakaiso ba Yahwe batebezaamu abantu omu bibuga ebikooto.
Abakaiso ba Yahwe bahikireho bata ensuhuuki?
Wehulirre omutebezi ow’akasumi koona n’asoborra omulingo kyamusemiize kumara obwomeezi bwe bwona n’atebeza.
Manya omulingo emisango eyesingirwe omu kooti esoboire kutwara omumaiso omulimo gw’okutebeza amakuru amarungi.
“Abatebezi b’Obukama Bagenda omu Mbuga z’Ebiragiro” (God’s Kingdom Rules!, Esuura 13)
a Ruhanga nuwe aturagira kutebeza. Nahabweki Abakaiso ba Yahwe tikirukubetaagisa kusaba ab’obusobozi kubaikiriza kutebeza amakuru amarungi.
