ISOMO 19

Abakaiso ba Yahwe Nubo Abakristaayo Abahikire?

TEKAHO

Nk’Abakaiso ba Yahwe, twikiriza ngu tuli Bakristaayo abahikire. Habwaki? Tekerezaaho nambere enyikiriza zaitu zisigikirra, ibara eritubaganiza h’abantu abandi, hamu n’okugonza okutwolekangana.

1. Abakaiso ba Yahwe enyikiriza zaabo zisigikirra nkaha?

Yesu akagamba ati: “Ekigambo kya [Ruhanga] nigo mananu.” (Yohana 17:17) Kusisanaho na Yesu, enyikiriza z’Abakaiso ba Yahwe zisigikirra ha Kigambo kya Ruhanga. Wetegereze ebyafaayo byaitu omu kasumi kanu. Nk’omu mwaka 1870, guruupu y’abeegi ba Baibuli bakatandika kwesomesa Baibuli nukwo bamanye kiki kyonyini eky’eyegesa. Enyikiriza zaabo zikaba nizisigikirra ha Baibuli, n’obukiraaba ngu zikaba nizahukana n’enyegesa z’ekanisa hamu n’ekeleziya. Hanyuma, bakatandika kugambiraho abandi amananu ganu kuruga omu Baibuli. a

2. Habwaki tweyeta Abakaiso ba Yahwe?

Yahwe ayeta abaheereza be abakaiso be habwokuba bagambira abandi amananu agarukumukwataho. (Abaheburaniya 11:4–12:1) Ekyokurorraho, omu busumi bwa kara, Ruhanga akagambira abantu be ati: “Inywe muli bakaiso bange.” (Soma Isaya 43:10.) Yesu ayetwa “kaiso wokwesiga.” (Okusuku’rwa 1:5) Nahabweki omu, 1931 tukacwamu kwetwa Abakaiso ba Yahwe. Tukyesiimisa muno kwetwa ibara eri.

3. Abakaiso ba Yahwe bahondera bata ekyokurorraho kya Yesu eky’okwoleka okugonza?

Yesu yagonzaaga muno abegeswa be kuhika ha rulengo ngu bakaba nibasisana nk’ab’eka ye. (Soma Marako 3:35.) Omu mulingo nugwo gumu, Abakaiso ba Yahwe baine obumu, bali ka emu ey’omu nsi yoona. Enu niyo ensonga habwaki twetangana ab’oruganda na banyaanya itwe. (Firemoni 1, 2) Ekindi, tworobera ekiragiro ekirukugamba ngu: “Mugonze bene banyu.” (1 Petero 2:17) Abakaiso ba Yahwe booleka okugonza kunu omu miringo nyingi. Ekyokurorraho, tukonyera Abakristaayo bagenzi baitu omu nsi yoona ababa bali omu bwetaago.

YEGA EBIRUKUKIRAHO

Wekebiije n’obwegendereza ebyafaayo by’Abakaiso ba Yahwe, kandi orole obwakaiso obundi oburukugumya ngu tuli Abakristaayo abahikire.

Enyikiriza z’Abakristaayo abahikire zoona zisigikirra ha Baibuli kandi bazigambiraho abandi

4. Enyikiriza zaitu zisigikirra ha Baibuli

Yahwe akaranga ngu tulyeyongera kwetegereza kurungi amananu ag’omu Baibuli. Musome Danieri 12:4, hanyuma mubazeeho ekikaguzo kinu:

Kiki ‘ekyakweyongiire’ omu baheereza ba Ruhanga obubakweyongiire kwekebiija Baibuli?

Manya omulingo guruupu y’Abeegi ba Baibuli, otwalireemu na Charles Russell, bayesomesamuga Ekigambo kya Ruhanga. Mutekeho VIDIYO, hanyuma mubazeeho ekikaguzo ekirukuhonderaho.

VIDIYO: Kwongera Kuzoora Amananu Agali omu Baibuli (7:45)

Omu vidiyo, Charles Russell na bagenzi be baakozesaaga mulingo ki kwesomesa Baibuli?

Obaire okimanyire?

Obwire obumu, tuhinduramu enyikiriza zaitu. Habwaki? Nk’oku ekyererezi ky’izooba erirukwimuka kiikara nikyeyongera mporampora, naitwe Ruhanga atusobozesa kwetegereza Ekigambo kye mpora mpora. (Soma Enfumo 4:18.) Nahabweki, n’obukiraaba ngu Baibuli tehinduka, tuhinduramu enyikiriza zaitu obutweyongera kugyetegereza kurungi.

5. Tutebeza amananu agarukukwata hali Yahwe

Habwaki twacwiremu kwetwa Abakaiso ba Yahwe? Mutekeho VIDIYO, hanyuma mubazeeho ekikaguzo ekirukuhonderaho.

VIDIYO : Ibara Lyaitu Lyoleka Kiki Ekituli (2:40)

Habwaki ibara Abakaiso ba Yahwe niryo litusemeriire?

Habwaki Yahwe akomere abantu kuba bakaiso be? Nukwo bamubazeeho nk’oku ali Ruhanga ow’amananu, habwokuba haroho ebisuba bingi ebimubaziibweho. Tekerezaaho ebisuba binu eby’emiringo ebiri.

Amadiini agamu gegesa abahondezi baago ngu Ruhanga n’agonza bakozese ebisisani omu kuramya kwabo. Eki kihikire? musome Ebyabalevi 26:1, hanyuma mubazeeho ebikaguzo binu:

Mananu ki agali omu kyahandiikirwe kinu? Yahwe ayehurra ata ha kukozesa ebisisani?

Abebembezi b’amadiini abamu begesa ngu Yesu ali Ruhanga. Eki kihikire? musome Yohana 20:17, hanyuma mubazeeho ebikaguzo binu:

Mananu ki agali omu kyahandiikirwe kinu? Ruhanga na Yesu muntu omu?
Noyehurra ota kukimanya ngu Yahwe asindikire Abakaiso be kutebeza amananu agarukukwata hali uwe hamu n’Omwana we?

6. Tugonzangana

Baibuli erengesaniza Abakristaayo n’ebicweka by’omubiri ebirukwahukana. Musome 1 Abakolinso 12:25, 26, hanyuma mubazeeho ebikaguzo binu:

Abakristaayo ab’amananu basemeriire kukora ki kakuba Abakristaayo abandi baba nibabonabona?
Kiki ekyorozere ha kugonza okuli omu Bakaiso ba Yahwe?

Abakaiso ba Yahwe abali omu kicweka kimu eky’ensi obubaba nibabonabona, bagenzi baabo kwetoroora ensi yoona aho naaho balengaho kubakonyera. Kusobora kurora kimu ha byokurorraho, mutekeho VIDIYO. Hanyuma mubazeeho ekikaguzo kinu.

VIDIYO: Haiti Eterwa Ihunga lya Hurricane Matthew (5:29)

Abakaiso ba Yahwe bakakonyerangana bata obuhatiire ihunga?

Abakristaayo abahikire booleka okugonza abo abali omubwetaago

ABANTU ABAMU BAGAMBA: “Abakaiso ba Yahwe diini mpyaka.”

Yahwe akatandika di kweta abaheereza be abakaiso be?

OYEGERE KI?

Abakaiso ba Yahwe Bakristaayo abamananu. Tuli eka y’abantu abarukuramiza hamu omu nsi yoona, enyikiriza zaitu zisigikirra ha Baibuli kandi tumanyisa abandi amananu agarukukwata hali Yahwe.