ISOMO 15

Yesu Nuwe Oha?

TEKAHO

Yesu Nuwe Oha?

Yesu ali omu h’abantu abakyakizireyo okumanywa omu byafaayo. Abantu baingi bamanyire ibara lya Yesu, baitu tibarukumanya ebirukumukwataho. Kandi baingi baine entekereza ezirukwahukana ezirukukwata hali Yesu. Baibuli eyegesa ki hali Yesu?

1. Yesu nuwe oha?

Yesu ali kihangirwe eky’omwoyo eky’amaani kandi naikara omu iguru. Yahwe akamuhanga atakahangire ebintu ebindi byona. Enu niyo ensonga habwaki ayetwa, “omuzigaijo omuli ebihangirwe byona.” (Abakolosai 1:15) Baibuli eyeta Yesu Omwana wa Ruhanga “ayazairwe omu wenka” habwokuba nuwe wenka Yahwe ouyayehangiire. (Yohana 3:16) Yesu akakorra hamu na Ise Yahwe, yamukonyera omu kuhanga ebintu ebindi byona. (Soma Enfumo 8:30.) Yesu nakyagumizaamu kuba n’enkoragana enungi na Yahwe. N’obwesigwa, naheereza nka kagambigambi rundi “Kigambo,” n’atwara obutumwa hamu n’oburagirizi bwa Ruhanga.—Yohana 1:14.

2. Habwaki Yesu yaizire omu nsi?

Nk’emyaka 2,000 enyuma, omu mulingo ogw’ekyamahano Yahwe akakozesa omwoyo ogurukwera yafurra obwomeezi bwa Yesu yabwiha omu iguru y’abuta omunda y’omukazi arukwetwa Malyamu ow’akaba atakabyamahoga n’omusaija. Omu mulingo gunu Yesu akazaarwa nk’omuntu. (Soma Luka 1:34, 35.) Yahwe akatuma Yesu omu nsi kuba Masiya ow’akaba araganiziibwe, rundi Kristo, n’okujuna abantu. a Akahikiriza obunabbi bwona oburukukwata hali Masiya, kinu kikakonyera abantu kumanya ngu Yesu nuwe “Kristo, Omwana wa Ruhanga omwomezi.”—Matayo 16:16.

3. Yesu ali nkaha kasumi kanu?

Hanyuma ya Yesu kufa, Ruhanga akamuhumbuura nka malaika kandi yagaruka omu iguru. Oku, nuho “Ruhanga yamunyumize haiguru muno.” (Abafiripi 2:9) Hati Yesu aine obusobozi bwingi kandi Yahwe wenka nuwe arukumukira obusobozi.

YEGA EBIRUKUKIRAHO

Manya amananu gonyini agarukukwata hali Yesu kandi n’ensonga habwaki kikuru muno kumwegaho.

4. Yesu tali Ruhanga Ow’obusobozi bwona

Nobukiraaba ngu Yesu malaika ow’amaani omu iguru, Baibuli eyegesa ngu nauwe ayorobera Yahwe Ruhanga we, kandi Ise. Habwaki nitugamba tuti? Mutekeho VIDIYO kurora Baibuli ekyeyegesa ha mulingo Yesu arukwahukana na Ruhanga Ow’obusobozi bwona.

VIDIYO: Yesu Kristo Ruhanga? (3:22)

Ebyahandiikirwe ebyolekerwe hansi nibitukonyera kwetegereza embaganiza enyakuli hagati ya Yahwe na Yesu. Musome buli kyahandiikirwe, hanyuma mubazeeho ebikaguzo ebirahonderaho.

Musome Luka 1:30-32.

Malaika akasoborra ata akakwate akali hagati ya Yesu na Yahwe Ruhanga, “anyakuli haiguru muno”?

Musome Matayo 3:16, 17.

Ha kubatizibwa kwa Yesu, iraka kuruga omu iguru likagamba ki?
Notekereza eri likaba iraka ly’oha?

Musome Yohana 14:28.

Nooha arukukira emyaka hamu n’obusobozi? Omwana rundi ise?
Yesu akaba namanyisa ki obuyayesere Yahwe Ise?

Musome Yohana 12:49.

Yesu n’atekereza ngu uwe na Ise muntu omu? Iwe notekereza ki?

5. Kiki ekyayolekere ngu Yesu akaba ali Masiya

Baibuli erumu obunabbi bwingi obwali nibwija kukonyera abantu kumanyirra Masiya—Ruhanga ouyakomere kujuna abantu. Mutekeho VIDIYO kumanya obumu ha bunabbi Yesu obuyahikiriize obuyaizire omu nsi.

VIDIYO: Yesu Ahikiriza Obunabbi (3:03)

Musome obunabbi bunu kuruga omu Baibuli, hanyuma mugarukemu ebikaguzo ebirukuhonderaho:

Musome Mika 5:2 kumanya nambere Masiya akaba nagenda kuzaalirwa. b

Okuzaarwa kwa Yesu kukahikiriza obunabbi bunu?—Matayo 2:1.

Musome Zabuli 34:20 na Zakaliya 12:10 kumanya Baibuli ebiyarangire ha kufa kwa Masiya.

Obunabbi bunu bukahikirizibwa?—Yohana 19:33-37.
Notekereza Yesu nuwe yaletiire obunabbi obu kuhikirra?
Eki nikikuletera kugumya ki hali Yesu?

6. Tugasirwa obutwega hali Yesu

Baibuli n’eyoleka ngu kikuru muno kwega hali Yesu n’omulimo Ruhanga yamuhaire. Musome Yohana 14:6 na 17:3, hanyuma mubazeeho ekikaguzo kinu:

Habwaki kikuru kwegaho Yesu?

Yesu akatukingurraho omuhanda ogw’okufooka banywani ba Ruhanga. Akegesa amananu agarukukwata hali Yahwe, kandi kurabira omuli uwe nitusobora kutunga obwomeezi obutahwaho

ABANTU ABAMU BAGAMBA: “Abakaiso ba Yahwe tibaikiririza omuli Yesu.”