ISOMO 01

Baibuli n’Esobora Eta Kukukonyera?

TEKAHO

Haihi buli muntu wena ayekaguza ebikaguzo ebirukukwata ha bwomeezi, okubonabona, okufa, hamu n’obusumi obw’omu maiso. Kandi tukwatwaho n’ensonga eza buli kiro nk’omulingo tusobora kutunga sente ezirukumara, kutunga ebyetaago byaitu, rundi omulingo tusobora kutunga eka ey’erumu okusemererwa. Abantu baingi bakizoire ngu Baibuli tegarukira ha kugarukamu ebikaguzo ebikuru ebitwekaguza, baitu eha n’amagezi agasobora kutukonyera omu bwomeezi bwaitu obwa buli kiro. Notekereza Baibuli esobora kukonyera abantu?

1. Bikaguzo ki ebimu Baibuli eby’egarukamu?

Baibuli egarukamu ebikaguzo binu ebikuru: Obwomeezi bukatandika buta? Obwomeezi bwine kigendererwa ki? Habwaki abantu abataine musango babonabona? Omuntu obw’afa agenda nkaha? Buli muntu wena obwaraaba n’agonza obusinge, habwaki ensi ijwiremu obulemu? Kiki ekirukwija kuhikaho ensi omu kasumi ak’omu maiso? Baibuli n’etutererra kuserra eby’okugarukamu eby’ebikaguzo ebi, kandi obukaikuru n’obukaikuru bw’abantu bakyetegeriize ngu omulingo egarukamu ebikaguzo ebi, nigunanura.

2. Baibuli n’esobora eta kutukonyera kwegondeza omu bwomeezi obwa buli kiro?

Baibuli etuha obuhabuzi oburungi. Ekyokurorraho, eyegesaho omulingo amaka gasobora kutungamu okusemererwa. Etugambira eky’okukora obutuba twetuntwire hamu n’omulingo tusobora kwegondeza omu mirimo yaitu. Noija kumanya kiki Baibuli eky’eyegesa h’amasomo ganu hamu n’ebindi bingi obworaaba n’oyega ekitabu kinu. Obundi naiwe oraikiriza ngu “Ebihandikirwe byona [buli kimu kyona ekiri omu Baibuli] . . . nibigasa.”—2 Timoseo 3:16.

Ekitabu kinu tikirukugaruka omu kiikaro kya Baibuli. Oihireho nikikwekambisa kugyekebiija. Nahabweki, nitukusaba kusoma ebyahandiikirwe ebyolekerwe omu masomo ganu, kandi obirengesanize n’ebyorukwega.

YEGA EBIRUKUKIRAHO

Wetegereze omulingo Baibuli ekonyiremu abantu, omulingo osobora kwegondeza omu kugisoma, n’ensonga habwaki kirungi kutunga obukonyezi kusobora kugyetegereza.

3. Baibuli n’esobora kutuhabura

Baibuli n’esisana n’ekyererezi eky’amaani. N’esobora kutukonyera kukora encwamu enungi, kandi n’okumanya ebiraabaho omu kasumi ak’omu maiso.

Musome Zabuli 119:105, hanyuma mubazeeho ebikaguzo binu:

Omuhandiiki wa Zabuli enu akaba n’arora ata Baibuli?
Iwe Baibuli n’ogitekerezaaho ki?

4. Baibuli n’esobora kugarukamu ebikaguzo byaitu

Baibuli ekakonyera omukazi omu kutunga eby’okugarukamu eby’ebikaguzo eby’akaba ayekagwize kumara emyaka nyingi. Mutekeho VIDIYO, hanyuma mugarukemu ebikaguzo ebirukuhonderaho.

VIDIYO: Otalireka Kwikara Nonihira! (1:48)

Kusigikirra ha vidiyo, omukazi onu akaba aine bikaguzo ki?
Kwega Baibuli kikamukonyera kita?

Baibuli etwekambisa kukaguza ebikaguzo. Musome Matayo 7:7, kandi hanyuma mubazeeho ekikaguzo kinu:

Bikaguzo ki eby’oine Baibuli eby’esobora kugarukamu?

5. Nosobora kwegondeza omu kusoma Baibuli

Abantu baingi nibegondeza omu kusoma Baibuli kandi nibagasirwa muno. Mutekeho VIDIYO, hanyuma mugarukemu ebikaguzo ebirukuhonderaho.

VIDIYO: Kusoma Baibuli (2:05)

Kusigikirra ha vidiyo ensinganto behurra bata ha kusoma?
N’obukiraaba ngu tibagonza kusoma habwaki bagonza kusoma Baibuli?

Baibuli n’egamba ngu n’esobora kutuha obuhabuzi obusobora kutuhuumuza kandi n’okutuha okunihira. Musome Abarumi 15:4, hanyuma mubazeeho ekikaguzo kinu:

Wakugondeze kumanya ebirukukiraho ha murago ogurukuha okuhuumuza n’okunihira oguli omu rukarra runu?

6. Abandi nibasobora kutukonyera kwetegereza Baibuli

Kwongerra ha kwesomera Baibuli, abantu baingi bakizoire ngu kugibazaaho n’abantu abandi kibakonyire. Musome Engeso Ezabakwenda 8:26-31, hanyuma mubazeeho ekikaguzo kinu:

Nitusobora tuta kwetegereza Baibuli?—Rora orukarra 30 na 31.

Omusaija Omunyaisiyopiya akaba nayetaaga obukonyezi kwetegereza Ebyahandiikirwe. Abantu baingi bakizoire ngu kubazaaho Baibuli n’abantu abandi kibakonyire

ABANTU ABAMU BAGAMBA: “Kwega Baibuli, kusiisa obwire kwonka.”