EBYONGIIRWEHO
Okujangurra Obutetegerezangana omu Nsonga z’eby’Obusubuzi
Nk’oku kyolekerwe omu 1 Abakolinso 6:1-8, omukwenda Paulo akabazaaho ensonga y’okucwa emisango hagati y’abaheereza ba Ruhanga. Akoleka okusalirwa kwe habw’abamu abakaba nibatwara Abakristaayo bagenzi babo omu mbuga z’ebiragiro kucwerwa omusango abantu abatarukuhereza Yahwe. (Orukarra 1) Paulo akaha ensonga z’amaani habwaki Abakristaayo basemeriire kumarra ensonga omu kitebe hatali kutwara bagenzi babo omu mbuga z’ebiragiro. Leka turole ezimu ha nsonga habwaki yaragiire Abakristaayo kukora bati kandi hanyuma nitwija kubazaaho nambere obuhabuzi bunu butarukusobora kukora.
Kakuba tuba n’obutetegerezangana n’Omukristaayo mugenzi waitu, ekintu eky’okubanza eki twakugondeze kukora nukwo kumara ensonga nk’oku Yahwe arukugonza hatali nk’oku turukugonza. (Enfumo 14:12) Nk’oku Yesu yayolekere, kirungi kumara ensonga bwangu zitakarugiremu ekizibu ky’amaani. (Matayo 5:23-26) Baitu eky’enaku, Abakristaayo abamu bakwatwa ekiniga ky’amaani nibacwamu kutwara ensonga omu mbuga z’ebiragiro. Paulo akagamba: “Kiba nikyoleka ngu mulemerwe obu mutwarangana omu mbuga z’ebiragiro.” Habwaki? Ensonga enkuru eri ngu ekikorwa eky’omulingo gunu nikisobora kusiisa ibara erirungi ery’ekitebe n’ibara lya Ruhanga ou turamya. Nahabweki kirungi kucumitiriza ha kikaguzo kya Paulo: “Habwaki otaikiriza gukakusinga?”
Paulo akongera yagamba ngu Ruhanga ataireho omu kitebe entekaniza enungi ez’okumara ensonga nyingi. Abagurusi b’ekitebe bali basaija Bakristaayo abatungire amagezi kuruga omu kumanya Ebyahandiikirwe, kandi Paulo n’agamba ngu nibasobora kucwa omusango hagati y’ab’oruganda obu businge bunu. (Enkarra 3-5) Yesu akoleka ngu ensonga ez’amaani nk’ebisuba, obugobya, zisemeriire kumarwa kuraba omu madaara asatu: ery’okubanza, abakozerengana kubi balengaho kumara ensonga hagati yabo; ekyakabiri, kakuba idaara ly’okubanza liremwa, batunge kaiso omu rundi babiri; eryakasatu, kakuba amadaara abiri galema, ensonga baitwale omu bagurusi ab’ekitebe.
Baitu twijuke ngu, abagurusi ab’ekitebe tibali bahi b’ebiragiro rundi bahi b’amagezi ha by’obusubuzi, kandi tikirukubetagisa kulengaho kuha amagezi ab’oruganda ha mulingo basemeriire kutwaramu eby’obusubuzi. Oihireho, balengaho kukonyera abanyakwine obutetegerezangana kuteka omu nkora Ebyahandiikirwe eki birukugamba n’okwikirraniza omu mulingo gw’obusinge okumaraho ensonga. Ha nsonga ezigumire muno, nibasobora kwehanuzaho omuroleerezi w’ekicweka, rundi itaagi ery’Abakaiso ba Yahwe. Baitu haroho ensonga ezindi ezitolekerwe omu buhabuzi bwa Paulo. Nsonga ki?
Obwire obumu, kugenda omu mbuga z’ebiragiro nigusobora kuba mulingo gw’okumaraho ensonga omu businge. Nk’ekyokurorraho kugenda omu mbuga z’ebiragiro nigusobora kuba nugwo omulingo gwonka ogw’okukozesa okugaiturura, okuta omwana hansi y’obusobozi bw’omuzaire omu, okutunga sente z’obukonyezi hanyuma y’okwahukana, kusasura insurance, kubanja banka enyakugwire, kugumya ekiraamo omu butongole. Kandi obwire obumu, ow’oruganda nikisobora kumwetagisa kugenda omu mbuga y’ebiragiro kwetonganaho hanyuma y’ondi kumunyegerra. *
Kakuba emisango enu etaba y’empaka, n’eba etarukucwa ekigendererwa ky’obuhabuzi Paulo yahandikisize. * Ekintu Omukristaayo asemeriire kufaaho muno nukwo kuhaisa ibara lya Yahwe ekitiinisa n’okulinda obusinge n’obumu obw’ekitebe. Abegeswa ba Yesu ekintu eki bakira kubamanyirraho nukwo okugonza, kandi “okugonza . . . tikuse’ra ebyakwo kwonka.”
^ kac. 2 N’obu kiraaba kitakira kubaho, Omukristaayo n’asobora kukora omugenzi we ekibi ky’amaani nk’okumuhamba, okumuteera, okumwita, rundi okumwiba ekintu ky’amaani. Tikiri kibi kakuba Omukristaayo wa mulingo gunu bamunyegerra omu balemi, n’obukyakuba ngu kinu nikisobora kumurugirramu kutwarwa omu mbuga z’ebiragiro okucwerwa omusango.
^ kac. 3 Kumanya ebirukukiraho, nitukusaba orole omu Watchtower, ya Maaci 15, 1997, rupapura 17-22, hamu n’eya Okitobba 15, 1991, rupapura 25-28.
