NOMANYA habwaki omusaija onu nataguramu ekijwaro kye? Yahwe nukwo akaba omugambire kukora. Omusaija onu nuwe Ahiya, omurangi wa Ruhanga. Nomanya omurangi nuwe oha? Nuwe muntu Ruhanga arukugambira ebintu ebirukugenda kubaho omumaiso.

Ahiya hanu akaba nabaza na Yeroboamu. Yeroboamu akaba ali omu ha basaija Sulemani abakaba ataire ha mulimu gw’okwombeka. Ahiya obu yaitiraine Yeroboamu hanu omu muhanda, Ahiya akakora ekintu ky’okuhuniriza. Akajuramu ekijwaro kye ekihyaka yakitaguramu ebicweka 12 yagambira Yeroboamu ati: ‘Twara ebicweka 10.’ Nomanya habwaki Ahiya yahaire Yeroboamu abicweka 10?

Ahiya akasoborra Yeroboamu ngu: Yahwe akaba nagenda kwiha obukama hali Sulemani. Akagamba ngu Yahwe akaba nagenda kuha Yeroboamu enganda 10. Kinu kikaba nikimanyisa ngu mutabani wa Sulemani Rehoboamu akaba nagya kusigaza enganda ibiri zonka ez’okulema.

Sulemani obu yahulire eki Ahiya agambiire Yeroboamu, akabihirwa muno. Akalengaho n’okwita Yeroboamu. Kyonka Yeroboamu akairukira omu Misiri. Hanyuma, Sulemani akafa. Akaba alemiire emyaka 40, baitu mutabani we Rehoboamu nuwe yafookere omukama. Yeroboamu obu yahuliire ngu Sulemani akaba afiire, akagaruka omu Isareri.

Rehoboamu akaba atali mukama murungi. Akaba nalema abantu kubi muno n’okukira na ise Sulemani. Yeroboamu n’abamu h’abantu abakuru bakagendera Omukama Rehobamu kumusaba kulema abantu kurungi. Baitu Rehoboamu atabahulirize. Akafookera kimu mubi n’okukira okubanza. Abantu bakafoora Yeroboamu kuba mukama w’enganda 10, baitu abantu ab’enganda ibiri eza Benyamini na Yuda bakasigaza Rehoboamu nk’omukama wabu.

Yeroboamu akaba atarukugonza abantu be kugenda Yerusalemu okuramya Yahwe omu yekaru. Nukwo kubakorra enyana za zabbu ibiri kandi n’abantu ab’enganda 10 batandika kuziramya. Nahabwekyo ensi yoona ekaijura obucwi bw’ebiragiro n’iraro.

Hakabaho n’emitalibaine mubukama bw’enganda ibiri. Hatakahoireho emyaka etaano okuruga Rehoboamu afooka omukama, omukama wa Misiri akaramagira Yerusalemu. Yatwara ebintu byona eby’omugaso ebyabaire omulyahurro lya yekaru ya Yahwe. Yekaru ekeyongera kusisana nkoku ekaba ey’ombekerwe okumara akasumi kake.