Nk’Oku Yahandiikirwe Yohana 1:1-51
1 Omu kubanza hakaba haroho Kigambo, Kigambo akaba ali hamu na Ruhanga, kandi Kigambo akaba ali ruhanga.
2 Omu kubanza, onu akaba ali hamu na Ruhanga.
3 Ebintu byona bikakorwa kuraba omuli uwe, kandi busaho kintu na kimu, ekyakozerwe ekitaarabire omuli uwe.
Kuraba omuli uwe
4 obwomeezi bukabaho, kandi obwomeezi bukaba buli kyererezi hali abantu.
5 Kandi ekyererezi nikyaka omu mwirima baitu omwirima, tigukisingwire.
6 Hakaija omusaija ayatumirwe nk’omukwenda wa Ruhanga; kandi ibara lye nuwe Yohana.
7 Omusaija ogu akaija nka kaiso, nukwo ahe obwakaiso hali ekyererezi, nukwo abantu aba buli mulingo basobole kwikiriza kuraba omuli uwe.
8 Baitu akaba atali nuwe kyererezi eki, baitu akaija kuha obwakaiso oburukukwata ha kyererezi eki.
9 Ekyererezi eky’amananu ekimulikira abantu aba buli mulingo kikaba kiri haihi kwija omu nsi.
10 Akaba ali omu nsi, kandi ensi ekakorwa kuraba omuli uwe, baitu ensi etamumanye.*
11 Akaija omu ka ye, baitu abantu be bonyini batamwikirize.
12 Baitu abo boona abaamutangiriire, akabaha obusobozi obw’okufooka abaana ba Ruhanga, habwokuba bakaikiririza omu ibara lye.
13 Kandi okuzaarwa kwabo kutaruge omu sagama rundi omu kuzaarwa okw’omubiri, rundi habw’okugonza kw’abantu, baitu kukaruga hali Ruhanga.
14 Nubwo Kigambo yafooka omubiri,* kandi yaikara omuli itwe kandi twarora ekitiinisa kye, nk’ekitiinisa Omwana ayazairwe omu wenka eki atunga kuruga hali ise; kandi akaba naasiimwa muno Ruhanga kandi aijwire amananu.
15 (Yohana yamuheera obwakaiso naayamirra omu iraka erya haiguru ati: “Onu nuwe nabalizeeho nti, ‘Ogu arukunduga enyuma, naankira, habwokuba akabaho nyowe ntakabaireho.’”)
16 Kandi itwena tukatunga embabazi nyingi muno kuruga hali uwe habwokuba aijwire embabazi.
17 Habwokuba Ebiragiro bikaheebwa kuraba omuli Musa, embabazi nyingi muno n’amananu bikaija kuraba omuli Yesu Kristo.
18 Busaho muntu weena ayakaroraga Ruhanga, oihireho omwana omu wenka ayazairwe ali nka Ruhanga kandi anyakuli harubaju rwa Ise nuwe asoboroire ebirukukwata hali Ruhanga.
19 Bunu nubwo obwakaiso Yohana obu yahaire, Abayudaaya obu baamusindikiire banyakatagara n’Abalevi kuruga Yerusalemu kumukaguza bati: “Niiwe oha?”
20 Akabagambira atarukwehakana ati: “Nyowe tindi Kristo.”
21 Baayongera baamukaguza bati: “Hati niiwe oha? Niiwe Eriya?” Yabagarukamu ati: “Nangwa.” “Oli Nabbi?” Yagarukamu ati: “Nangwa.”
22 Baayongera baamukaguza bati: “Hati, niiwe oha? Tugambire nukwo tutunge eki turagambira abo abatutumire. Iwe noyebazaaho ki?”
23 Yabagarukamu ati: “Ninyowe iraka ly’ogu arukwamirra omu irungu ati: ‘Muterekereze omuhanda gwa Yahwe,’ nk’oku nabbi Isaya yagambire.”
24 Abo abakaba batumirwe bakaba nibaruga hali Abafalisaayo.
25 Nubwo baamukaguza bati: “Hati habwaki obatiza, obu oraaba otali Kristo rundi Eriya rundi Nabbi?”
26 Yohana yabagarukamu ati: “Nyowe nimbatiza omu maizi. Haroho anyakwemeriire hagati omuli inywe ou mutamanyire,
27 arukwija enyuma yange, kandi tikinsemeriire kusumurra obuguha bw’enkaito ze.”
28 Ebintu binu bikaba Besaniya, nseeri ya Yorudaani, nambere Yohana akaba naabatiriza.
29 Ekiro ekyahondiireho, yarora Yesu naija nambere ali, kandi yagamba ati: “Dora, Omwana gw’Entaama owa Ruhanga anyakwihaho ebibi by’ensi!
30 Onu nuwe ou nabalizeeho nti: ‘Haroho omuntu arukunduga enyuma, kandi hati, naankira habwokuba akabaho ntakabaireho.’
31 Na nyowe nkaba ntamumanyire, baitu ensonga habwaki naizire nimbatiza omu maizi eri ngu, nukwo asobole kumanywa omu Isaleri.”
32 Yohana akongera yamuheera obwakaiso naagamba ati: “Nkarora omwoyo nigusirimuka kuruga omu iguru nk’eriiba, kandi gwamwikaraho.
33 Na nyowe nkaba ntamumanyire, baitu Ogu ayantumire kubatiza omu maizi akangambira ati: ‘Ogu weena ow’olirora omwoyo nigumusirimukaho kandi gukamwikaraho, ogu nuwe arukubatiza n’omwoyo ogurukwera.’
34 Nkakirora kandi naha obwakaiso ngu ogu nuwe Omwana wa Ruhanga.”
35 Ekiro ekyahondiireho, Yohana akaba ayemeriire na babiri h’abegeswa be,
36 kandi obu yarozere Yesu naarabaho, yagamba ati: “Dora, Omwana gw’Entaama owa Ruhanga!”
37 Abegeswa abo babiri obu baahuliire eki, baahondera Yesu.
38 Yesu obu yahindukire, yarora nibamuhondera, yabakaguza ati: “Nimuserra ki?” Baamugarukamu bati: “Rabbi (obu kihindurwa kimanyisa, “Mwegesa”), noikara nkaha?”
39 Yabagambira ati: “Mwije muroleyo.” Baagenda, baarora nambere akaba naikara, kandi baikara na uwe ekiro eki; zikaba ziri nka saaha ikumi.
40 Andereya, mugenzi wa Simooni Petero, akaba ali omu ha babiri abaahuliire Yohana ebi yabalize kandi baahondera Yesu.
41 Andereya akabanza kuserra mugenzi we Simooni, kandi yamugambira ati: “Tuzoire Masiya”* (obu kihindurwa kimanyisa, “Kristo”),
42 yamutwara nambere Yesu akaba ali. Yesu obu yamurozere, yamugambira ati: “Niiwe Simooni, mutabani wa Yohana; orayetwaga Keefa” (obu kihindurwa kimanyisa, “Petero”).
43 Ekiro ekyahahondiireho Yesu akaba naagonza kugenda Galiraaya. Yarora Firipo kandi yamugambira ati: “Fooka muhondezi wange.”
44 Firipo akaba naikara Betesaida, orubuga nambere Andereya na Petero bakaba nibaruga.
45 Firipo yatangaana Nasaneeri, kandi yamugambira ati: “Tuzoire ogu Musa ou yahandiikireho omu Biragiro, na Banabbi ou baahandiikireho bati: Yesu, mutabani wa Yusufu, kuruga Nazaleesi.”
46 Baitu Nasaneeri yamugambira ati: “Omu Nazaleesi nihasobora kurugayo ekintu kyona ekirungi?” Firipo yamugambira ati: “Ija orole.”
47 Yesu obu yarozere Nasaneeri naija nambere ali, yamubazaaho ati: “Dora, Omunyaisaleri kaswa* ow’ataine obugobya.”
48 Nasaneeri yamukaguza ati: “Nikiija kita ngu ommanyire?” Yesu yamugarukamu ati: “Nkuboinege oikaliire hansi y’omuti omutiini, Firipo obu abaire atakakwesere.”
49 Nasaneeri yagamba ati: “Rabbi, niiwe Mwana wa Ruhanga, kandi niiwe Omukama wa Isaleri.”
50 Yesu yamugarukamu ati: “Noikiriza habwokuba nkugambiire ngu nkuboinege obu obaire oli hansi y’omuti omutiini? Noija kurora ebintu ebirukukiraho binu.”
51 Yayongera yamugambira ati: “Mananu kwo nimbagambira nti, nimwija kurora iguru nirikinguka kandi bamalaika ba Ruhanga nibatemba kandi nibasirimuka hali Omwana w’omuntu.”
Obugambo Obuli Hansi
^ Rundi, “etamumanyirre.”
^ Rundi, “omuntu.”
^ Rora, Kusoborra Ebigambo.
^ Rundi, “wenyini.”
