Baibuli ekira kweta Yesu “Mwana wa Ruhanga.” (Yohana 1:49) Ebigambo ‘Omwana wa Ruhanga’ nibyoleka ngu Ruhanga nuwe Muhangi rundi Endugirro y’obwomeezi bwona otwaliremu n’obwa Yesu. (Zabuli 36:9; Okusuku’rwa 4:11) Baibuli teyegesa ngu Ruhanga akazaara omu mulingo nugwo gumu nk’abantu okubazaara.

 Bamailaka nabo Baibuli ebeeta “abana ba Ruhanga.” (Yobu 1:6) Baibuli eyongera egamba ngu omuntu ow’okubanza Adamu akaba ali ‘mwana wa Ruhanga.’ (Luka 3:38) Baitu habwokuba Yesu ali kihangirwe eky’okubanza Ruhanga ekiyayehangiire, niyo nsonga habwaki Baibuli emweta Omwana wa Ruhanga ow’omuzigaijo.

•  Yesu akaba ali omu iguru atakazairwe omu nsi?

•  Yesu akaba n’akora ki atakaizire omu nsi?

 Ego. Yesu akaba ali kihangirwe eky’omwoyo obwakaba ali omu iguru atakazairwe nk’omuntu omu nsi. Yesu wenyini akagamba ngu akaba arugire omu iguru.—Yohana 6:38; 8:23.

 Ruhanga akabanza kuhanga Yesu atakahangire ekintu ekindi kyona. Baibuli obw’eba n’ebazaho Yesu, egamba eti:

•   “Nuwe . . . omuzigaijo omuli ebyahangirwe byona.”—Abakolosai 1:15.

•   Nuwe “okubanza okwokuhanga kwa Ruhanga.”—Okusuku’rwa 3:14.

 Yesu akahikiriza obunabbi oburukumukwataho oburukugamba ngu “okugendagendakwe kwaira, kwa kara na kara.”—Mika 5:2; Matayo 2:4-6.

 Akaba aine ekiikaro eky’amaani omu iguru. Obw’akaba n’asaba, Yesu akabazaaho ati ekiikaro ekyaba aine: “Ai isenyowe, nnyumiza nyowe . . . omu kitinisa eki ekinkabanyinakyo hamu naiwe ensi etakabaireho.”—Yohana 17:5.

 Yesu akakonyera Ise kuhanga ebintu ebindi byona. Yakoraga nauwe “nkomukoza omukuru.” (Enfumo 8:30) Baibuli n’egamba eti hali Yesu: “Baitu omwogu ebintu byona numwo byahangiirwe, omu iguru na hansi.”—Abakolosai 1:16.

 Ruhanga akahanga ebintu byona kurabira omuli Yesu. Binu nibitwarramu ebihangwa ebindi eby’omwoyo hamu n’ebiturukurora nk’ensi n’iguru. (Okusuku’rwa 5:11) Omu mulingo ogundi, nitusobora kulegesaniza omulingo Yahwe yakoramuga na Yesu nka injiniya arukukorra hamu n’omwombeki. Injiniya ateera pulaani y’enju kandi hanyuma omwombeki agyombeka.

 Yesu akakora nka Kigambo. Baibuli obw’eba n’ebazaaho obwomeezi bwa Yesu atakaizire omu nsi emweta “Kigambo.” (Yohana 1:1) Eki nikyoleka ngu Ruhanga yakozesaaga Yesu kuhikyaho ebihangwa ebindi eby’omwoyo obutumwa rundi oburagirizi.

 Ekindi, Yesu n’asobora kuba yakoraga nka kagambigambi wa Ruhanga hali abantu omu nsi. Nikisobora kuba ngu Ruhanga akabaza kurabira omu Yesu obwakaba naha Adamu na Hawa ebiragiro omu rugonjo rwa Adeni. (Okubanza 2:16, 17) Nikisobora kuba ngu Yesu nuwe malaika ayakonyiire Abaisaleri kuraba omu irungu, kandi oubali baine kuhurra.—Okuruga 23:20-23. a