Obunabbi Nikyo Kiki?

Eky’okugarukamu kuruga omu Baibuli

Obunabbi buli butumwa obuterekereziibwe omwoyo gwa Ruhanga ogurukwera, rundi okwolekwa kuruga hali Ruhanga. Baibuli egamba ngu banabbi “bagambaga ebyarugire hali Ruhanga baterekereziibwe Omwoyo Ogurukwera.” (2 Petero 1:20, 21) Nahabweki nabbi nuwe omuntu ow’atunga obutumwa kuruga hali Ruhanga kandi abugambira abandi.—Engeso Ezabakwenda 3:18.

Banabbi baatungaga bata obutumwa kuruga hali Ruhanga?

Ruhanga yakozesaaga emiringo nyingi kuhikyaho banabbi be ebiteekerezo bye:

● Kuhandiika. Ruhanga akakozesa omulingo gunu omurundi gumu kuraba omu kuha Musa Ebiragiro Ikumi ebyahandiikirwe ha bibbali by’amabaale.—Okuruga 31:18.

● Kubaza nakozesa bamalaika. Ekyokurorraho, Ruhanga akakozesa malaika kugambira Musa ha butumwa obwakaba aine kugambira Faraho owa Misiri. (Okuruga 3:2-4, 10) Ruhanga obuyabaga nagonza abantu bamanye ebigambo bye byonyini kandi ebikuru, yaragiraga bamalaika kubibagambira omu mulingo gwonyini, nk’ekyokurorraho obuyagambiire Musa ati: ‘Ohandike ebigambo binu: baitu nkebigambo binu okubiri nukwo ndagaine ekiragano hamu naiwe na Isareri.’—Okuruga 34:27. a

● Okwolekwa. Obwire obumu okwolekwa kwaheebwaga nabbi obuyabaga narora kandi nayetegereza kurungi. (Isaya 1:1; Habakuki 1:1) Obwire obumu okwolekwa kwabaga kwonyini kuhika ha rulengo ngu abarukukutunga nabo bakwejumbiramuga. (Luka 9:28-36; Okusuku’rwa 1:10-17) Obwire obundi, okwolekwa kwabahoga hali abantu obubaga nibasisana nk’abarukuroota. (Engeso Ezabakwenda 10:10, 11; 22:17-21) Ekindi, Ruhanga yahikyahoga abantu obutumwa bwe kuraba omu birooto banabbi ebibarootaga obubabaga babyamire.—Danieri 7:1; Engeso Ezabakwenda 16:9, 10.

● Kuterekereza enteekereza. Ruhanga akaterekereza enteekereza za banabbi be kuhikyaho abantu be obutumwa bwe. Egi niyo ensonga habwaki Baibuli egamba eti: “Ebyahandikirwe byona ebiterekerezebwa omwoyo ogurukwera.” Ebigambo “ebiterekerezebwa omwoyo ogurukwera” nibisobora nokumanyisa “Ruhanga-akaikya.” (2 Timothy 3:16.) Ruhanga akakozesa omwoyo gwe ogurukwera rundi amaani ge “kwikya” enteekereza ze omu biteekerezo by’abaheereza be. Obutumwa bwabaga bwa Ruhanga, baitu nabbi nuwe yakomamuga ebigambo eby’okukozesa.—2 Samuiri 23:1, 2.

Obunabbi bukira kutwarramu kurangirra ebiraabaho omu maiso kyonka?

Nangwa, obunabbi bwa Baibuli tibugarukira ha kurangirra ebiraabaho omu maiso kyonka. Baitu obutumwa bwa Ruhanga oburukukira obwingi bukwataho akasumi ak’omu maiso, n’obukiraaba ngu buba omu mulingo ogutanguhire kwetegereza. Ekyokurorraho, banabbi ba Ruhanga bakahabura abaisaleri abaakara emirundi nyingi ha bikorwa byabo ebibi. Okuhabura oku kukabazaaho emigisa abantu eibakutungire omu kasumi k’omu maiso abantu obubaakuhuliriize okuhabura kwe, otwaliiremu n’akabi akakubahikireho obubakwangire kumuhuliriza. (Yeremiya 25:4-6) Ebyakurugiremu byakusigikiriire ha mulingo Abaisaleri baakwetwaizeemu.—Ekyebiragiro 30:19, 20.

Ebyokurorraho eby’obunaabi bwa Baibuli ebitarumu okutebereza

● Kiro kimu Abaisaleri obubaasabire Ruhanga obukonyezi, akasindika nabbi kubasoborra ngu habwokuba bakaba bangire kworobera ebiragiro bya Ruhanga, niyo ensonga habwaki atarabakonyiire.—Ekyabacwi 6:6-10.

● Yesu obuyabalize n’omukazi Omusamaliya, akamugambira ebintu ebyakara ebikaba bimuhikireho, ekintu ekyasobokere habw’okwoleka kwa Ruhanga. Omukazi akamumanyirra nka nabbi n’obukiraaba akaba atabalizeeho ekisobora kubaho omu busumi bw’omu maiso.—Yohana 4:17-19.

● Yesu obwakaba nacwerwa omusango, abanyanzigwa be bakamusweka h’amaiso, bamuteera hanyuma bagamba ngu: “Toma, akutiire noha?” Bakaba batarugonza Yesu abagambire ebiraabaho omu kasumi k’omu maiso, baitu bakaba nibagonza akozese amaani ga Ruhanga kubagambira ow’amutiire.—Luka 22:63, 64.