Baibuli Ebazaaho Ki Ekiniga?
Baibuli Ebazaaho Ki Ekiniga?
Eky’okugarukamu kuruga omu Baibuli
Baibuli eyegesa ngu kakuba omuntu alemwa kulema ekiniga, kiba ky’akabi haluwe n’abantu abandi. (Enfumo 29:22) N’obukiraaba ngu obwire obumu tikiri kibi kukwatwa ekiniga, Baibuli egamba ngu abo abaikara baine “ekiniga” tibalitaaha omu Bukama bwa Ruhanga. (Abagaratiya 5:19-21) Omu Baibuli harumu ebyahandiikirwe ebisobora kukonyera omuntu kulema ekiniga.
Tikihikire kukwatwa ekiniga obwire obumu?
Nidi obukiba kitahikire kukwatwa ekiniga?
N’osobora ota kulema ekiniga?
Ebyahandiikirwe ebirukubazaaho ekiniga
Tikihikire kukwatwa ekiniga obwire obumu?
Nangwa. Tikiri kibi obwire obumu kukwatwa ekiniga. Ekyokurorraho, omusaija omwesigwa Nehemiya ‘akabiihirwa muno” obuyakimanyire ngu bamu h’abaheereza ba Ruhanga bagenzi be bakaba nibabonabonesebwa.—Nehemiya 5:6.
Obwire obumu, Ruhanga akwatwa ekiniga. Ekyokurorraho, abantu be abaakara obubaacwire endagaano eyakaba akozere nabo ey’okuramya we wenka kandi baatandika kuheereza baruhanga ab’ebisuba, “ekiniga kya [Yahwe]” kikabaakira. (Ekyabacwi 2:13, 14) Baitu nabwo, Yahwe Ruhanga taikara nayoleka ekiniga. Akwatwa ekiniga nambere kisemeriire kandi akirema.—Okuruga 34:6; Isaya 48:9.
Nidi obukiba kitahikire kukwatwa ekiniga?
Ekiniga kiba kibi omuntu obwakihurra hataine eky’amaani ekibaireho kandi nobwalemwa kwoleka okwetanga. Eki nikyo kikira kuhika h’abantu abatahikiriire. Ekyokurorraho:
● Kaini ‘akabiihirwa muno,’ Ruhanga obuyayangire ekihongwa kye. Kaini akalemwa kulema ekiniga kye, kyamuleetera kwita mugenzi we.—Okubanza 4:3-8.
● Ruhanga obuyayolekere abantu ba Nineve embabazi “kikabihiza Yona muno muno.” Yahwe akahabura Yona yamugambira ngu akozere kubi “okubihirwa” oihireho akaba asemeriire kukwatirwa embabazi abasiisi abakaba begarukiremu.—Yona 3:10–4:1, 4, 11. a
a Nitukigumya ngu Yona akaikiriza kuhaburwa yaleka ekiniga, habwokuba Ruhanga akamukozesa kuhandiika ekitabu kya Baibuli ekirukwetwa ibara lye.
Ebyokurorraho binu nibyoleka ngu, “ekiniga ekyomuntu [tikiretaho] okuhikirra kwa Ruhanga.”—Yakobo 1:20.
N’osobora ota kulema ekiniga?
● Manya akabi akaruga omu kuba n’ekiniga ekihinguraine. Abantu abamu batekereza ngu kwoleka ekiniga kokurorraho akooleka ngu omuntu w’amaani. Baitu amananu gali ngu omuntu owatasobora kulema ekiniga kye, aba aine obuceke bw’amaani. “Ogu atarukuigaliriza omwoyogwe, asisaine nkorubuga oruseserwe hansi, kunu tirunyina muhuruzi.” (Enfumo 25:28; 29:11) Harubaju orundi, obutwekamba kulema ekiniga, twoleka ngu tuli b’amaani kandi twine okwetegereza. (Enfumo 14:29) Baibuli egamba ngu: “Aikaraho okubihirwa akira abamani.”—Enfumo 16:32.
● Leka ekiniga kitakakuletiire kukora ekintu ekyorayeyijukya. Omu Zabuli 37:8, nihagamba ngu; “Leka okubihirwa, oruge omu kiniga: otabihirwabihirwa; tikirukugasa, rundi nukuleta obubi.” Wetegereze ngu obutukwata ekiniga, nitusobora kucwamu kuleka kubiihirwa tutakakozere ekibi. Abefeso 4:26 nihagamba ngu “mubihirwe, kunu mutalikora kubi.”
● Obukiraaba nikisoboka, obworahurra watandika kubiihirwa rugaho. Baibuli egamba ngu; “Okubanza okuhakana nukusisana okuigurra amaizi: nikyo olekera okuhakana enkungani itakahikire.” (Enfumo 17:14) N’obukiraaba ngu kirungi kumaraho obutaikiranganiza ahonaaho, obwire obumu nikisobora kwetaagisa iwe n’omuntu ondi kubanza kutekaana nukwo mubazeeho ensonga mutakaine.
● Manya kiki kyonyini ekibaireho. Enfumo 19:11 hagamba ngu; “Okwekenga okwomuntu kumuikazaho okubihirwa.” Ky’amagezi kubanza kumanya kyonyini ekibaireho otakakwasirwe ekiniga. Kakuba tubanza kuhuliiriza embaju zoona, nitwija kwetantara kubiihirwa nambere kitasemeriire.—Yakobo 1:19.
● Saba Ruhanga akuhe obusinge omu bitekerezo. Okusaba nikusobora kukukonyera kutunga ‘obusinge bwa Ruhanga oburukukira kumanywa kwona.’ (Abafiripi 4:7) Okusaba guli gumu ha miringo emikuru eitusobora kutunga omwoyo gwa Ruhanga ogurukwera ogusobora kutukonyera kuba bantu ab’obusinge, abarukugumiisiriza, kandi abarukwetanga.—Luka 11:13; Abagaratiya 5:22, 23.
● Komamu abanywani n’obwegendereza. Tukira kwetwaza nk’abanywani baitu. (Enfumo 13:20; 1 Abakolinso 15:33) Enu niyo ensonga habwaki Baibuli etutererra eti: “Otaganjana nomuntu arukwanguha okubihirwa; kunu otaligenda hamu nomuntu owekiniga.” Habwaki? Ekyahandiikirwe kigumizaamu nikigamba ngu; “Oleke okukwatwa engesoze, okuletera obwomezi bwawe omutego.”—Enfumo 22:24, 25.
Ebyahandiikirwe ebirukubazaaho ekiniga
Enfumo 16:32: “Aikaraho okubihirwa akira abamani.”
Ekirukumanyisa ngu: Kulema ekiniga kokurorraho akarukwoleka ngu oli w’amaani.
Enfumo 17:14: “Okubanza okuhakana nukusisana okuigurra amaizi: nikyo olekera okuhakana enkungani itakahikire.”
Ekirukumanyisa ngu: Kakuba ohurra watandika kukwatwa ekiniga, orugeho ogende.
Enfumo 19:11: “Okwekenga okwomuntu kumuikazaho okubihirwa.”
Ekirukumanyisa ngu: Nitusobora kwetantara kubiihirwa kakuba tubanza kwetegereza kurungi ensonga, hatali kwanguha kubiihirwa tutakamanyire kiki kyonyini ekibaireho.
Enfumo 22:24, 25: “Otaganjana nomuntu arukwanguha okubihirwa; kunu otaligenda hamu nomuntu owekiniga, oleke okukwatwa engesoze.”
Ekirukumanyisa ngu: Kakuba tuba nitumara obwire bwingi tuli n’abantu ab’ekiniga, naitwe nitumalirra tufookere nkabo.
Enfumo 29:11: “Omudomadoma ayatura ekinigakye kyona.”
Ekirukumanyisa ngu: Twoleka ngu tuli b’amagezi obutulema enyehurra zaitu hatali enyehurra kutulema.
Abagaratiya 5:22, 23, NWT: “Ebi ebiri omu kyana eky’omwoyo nibyo okugonza, okusemererwa, obusinge, okugumiisiriza, embabazi, oburungi, okwikiriza, obuculeezi, okwetanga.”
Ekirukumanyisa ngu: Omwoyo gwa Ruhanga ogurukwera nigusobora kutukonyera kukurakuraniza emiringo eratukonyera kulema ekiniga.
Abefeso 4:26: “Mubihirwe, kunu mutalikora kubi.”
Ekirukumanyisa ngu: Titusobora kwetantarra kimu kukwata ekiniga, baitu haroho ebitusobora kukora kukirema.
Yakobo 1:19: “Omuntu arahukege okuhurra, naikaraho okutagamba, naikaraho okutabihirwa.”
Ekirukumanyisa ngu: Kuhuliiriza kurungi nikisobora kutukonyera kukeehya ha kiniga kyaitu.
Nosobora Kugonza na Binu;
EBIRUKUTUKWATAHO
Saba Kubungirwa
Tunga eky’okugarukamu ky’ekikaguzo kyawe, rundi omanye ebirukukiraho ebirukukwata h’Abakaiso ba Yahwe.