Чумдыручы Яхъя төрмәдә утыра. Аны анда Гайсә б. э. 30 елының Пасах бәйрәменә барганнан соң берникадәр вакыт үткәч утыртканнар иде. Ул үз шәкертләренең Мәсихкә иярүләрен теләгән, әмма аларның кайберләре ул төрмәдә утырган айлар дәвамында Гайсәнең шәкерте булып китмәгән.

Хәзер инде б. э. 31 елының Пасах бәйрәме якынлаша. Яхъяның кайбер шәкертләре, Гайсә янына килеп, аңардан: «Ни өчен без һәм фарисейлар ураза тотабыз, ә синең шәкертләрең ураза тотмый?» — дип сорый (Маттай 9:14). Фарисейлар өчен ураза — дини йола. Соңрак Гайсә хәтта үзенең бер мисалында үз-үзе белән канәгать бер фарисейның: «Йа Аллаһы, сиңа үз рәхмәтләремне белдерәм, чөнки мин башкалар кебек... түгел. Атнага ике тапкыр ураза тотам»,— дип дога кылганы турында сөйли (Лүк 18:11, 12). Яхъяның шәкертләре дә, бәлки, йола буенча ураза тотадыр, я алар моны Яхъяның төрмәдә утырганына кайгырып эшлидер. Шуңа күрә алар Гайсә шәкертләренең шулай ук, бәлки, Яхъя белән булган хәл аркасында үзләре белән бергә кайгырып, ураза тотмаганнарына да аптырый.

Гайсә аларга мисал кулланып җавап бирә: «Ни өчен кияү дуслары, кияү алар белән бергә булганда, кайгырсын? Әмма килер көннәр, һәм алардан кияүне алырлар, шунда алар ураза тотар» (Маттай 9:15).

Яхъя үзе Гайсәне кияү дип атаган иде (Яхъя 3:28, 29). Гайсә үз шәкертләре белән бергә булганга, алар ураза тотмый. Соңрак, Гайсә үлгәч, аның шәкертләре кайгырыр, һәм аларның ашарга теләкләре булмас. Ләкин ул терелтелгәч, хәл бөтенләй үзгәрер! Шунда кайгырып ураза тотар өчен сәбәп калмас.

Аннары Гайсә мондый ике мисал китерә: «Беркем дә иске киемгә утырмаган тукымадан ямаулык салмый, югыйсә ямаулык, утыргач, киемне ертыр, һәм тишек тагын да зуррак булыр. Яңа шәрабны да иске турсыкка салмыйлар, югыйсә турсык ертылыр, һәм шәраб агып чыгар, ә турсык әрәм булыр. Яңа шәрабны яңа турсыкка салалар» (Маттай 9:16, 17). Гайсәнең нәрсә әйтәсе килә?

Гайсәнең шәкертләре яһүд динендәге иске йолаларны үтәргә, мәсәлән, ураза тотарга, тиеш түгел; Гайсә Чумдыручы Яхъяның шәкертләренә нәкъ шуны җиткерергә тели дә. Ул иске, таушалган һәм гамәлдән чыгарылырга торган гыйбадәт кылу төзелешенә «ямаулык» салырга һәм аның гомерен озынайтырга дип килмәгән. Гайсә күздә тоткан гыйбадәтне ул көннәрдәге яһүд диненә һәм аның кеше уйлап чыгарган гореф-гадәтләренә җайлаштырырга кирәк түгел. Әйе, Гайсә иске киемгә яңа ямаулык салырга я кибеп беткән иске турсыкка яңа шәраб тутырырга тырышмый.