Ир белән хатынның хезмәттәшлек итүе бер самолетта очучы ике пилотның хезмәттәшлегенә охшаш. Авырлыклар туганда, аларның һәрберсе «мин» дип түгел, ә «без» дип уйлый.

ИЗГЕ ЯЗМАЛАРДАГЫ ПРИНЦИП: «Алар инде ике түгел, ә бер тән» (Маттай 19:6).

«Никах ул — бер кешенең җыры түгел, ә дуэт. Уңышлы никах ир белән хатынның тыгыз хезмәттәшлек итүеннән тора» (Кристофер).

Кыенлыклар килеп чыкканда, бер-берсе белән хезмәттәшлек итмәгән ирле-хатынлы гадәттә проблеманы чишүгә түгел, ә тормыш иптәшенең кимчелекләренә игътибарын туплый. Нәтиҗәдә, алар энәдән дөя ясый.

«Хезмәттәшлек — никахның асылы. Ирем белән бер команда булмаган булсак, без ирле-хатынлы түгел, ә бүлмәдәшләр генә — мөһим карарларга төрлечә караган күршеләр генә булыр идек» (Александра).

ҮЗ-ҮЗЕГЕЗНЕ ТИКШЕРЕГЕЗ

• Мин үзем эшләп тапкан акчаны үземнеке генә дип саныйммы?

• Ял итәр өчен, минем тормыш иптәшемнән аерым буласым киләме?

• Мин тормыш иптәшемнең туганнарыннан, ул алар белән якын аралашса да, читләшмимме?

БЕР-БЕРЕГЕЗ БЕЛӘН ФИКЕР АЛЫШЫГЫЗ

• Гаилә тормышыбызның кайсы өлкәләрендә без яхшы хезмәттәшлек итәбез?

• Без кайсы якларны яхшырта алыр идек?

• Гаиләбездә хезмәттәшлек рухын үстерер өчен, без нәрсә эшли алыр идек?

КИҢӘШЛӘР

• Теннис уенында бер-береңә каршы я команда буларак бер якта уйнап була. Уйлап карагыз: тормыш иптәшегез белән бер команда буларак эш итәр өчен, сез нинди адымнар ясый аласыз?

• «Ничек миңа җиңәргә?» дип түгел, ә «Ничек безгә җиңәргә?» дип уйларга тырышыгыз.

«Кем хаклы, кем юк икәне мөһим түгел. Иң мөһиме — арагыздагы тынычлык һәм бердәмлек» (Итан).

ИЗГЕ ЯЗМАЛАРДАГЫ ПРИНЦИП: «Үзегез турында гына түгел, ә башкалар турында да уйлап яшәгез» (Филипиялеләргә 2:3, 4).