Фәрештәләр кемнәр алар?
Изге Язмалар нигезендә җавап
Фәрештәләр кешеләрдән көчлерәк һәм сәләтлерәк (2 Петер 2:11). Алар күктә, ягъни рухи дөньяда, Галәмнән югарырак төзелештә яши (1 Патшалар 8:27; Яхъя 6:38). Шуңа күрә алар еш кына рухлар дип атала (1 Патшалар 22:21; Зәбур 18:10).
Фәрештәләрне кем булдырган?
Гайсә Изге Язмаларда «яратылганнарның беренчесе» дип атала. Аллаһы аның ярдәмендә фәрештәләрне барлыкка китергән. Гайсәнең Аллаһы белән бергә барлыкка китерүдә катнашканы Изге Язмаларда болай итеп сурәтләнә: «Күктәге һәм җирдәге, күзгә күренгән һәм күренмәгәннәрнең һәммәсе [шул исәптән фәрештәләр дә Гайсә] аркылы яратылган» (Көләсәйлеләргә 1:13—17). Фәрештәләрнең хатыннары да, балалары да юк (Марк 12:25). «Аллаһы улларының» һәрберсен Аллаһы үзе яраткан (Әюп 1:6).
Фәрештәләр борын-борын заманда, җир әле булмаганда барлыкка китерелгән булган. Аллаһы җирне яраткач, фәрештәләр «куанып кычкыра» башлаган (Әюп 38:4—7).
Фәрештәләр саны күпме?
Изге Язмаларда конкрет сан китерелми, ләкин алар шактый күп дип әйтелә. Мәсәлән, рәсүл Яхъя күргән күренештә йөз миллионлаган фәрештәләр саны китерелә (Ачылыш 5:11).
Фәрештәләрнең шәхси исемнәре һәм үзенчәлекләре бармы?
Әйе, бар. Изге Язмаларда ике фәрештәнең исеме китерелә: берсе — Микаил, икенчесе — Җәбраил (Даниял 12:1; Лүк 1:26) a. Башка фәрештәләрнең сүзләреннән күренгәнчә, аларның да исемнәре бар, ләкин алар исемнәрен әйтми (Яратылыш 32:29; Хакимнәр 13:17, 18).
Һәр фәрештә — аерым бер шәхес. Алар бер-берсе белән аралаша ала (1 Көринтлеләргә 13:1). Алар уйлый һәм Аллаһыны данлый белә (Лүк 2:13, 14). Аларның кайберләре Аллаһыга каршы фетнә күтәргән Шайтан Иблискә кушылып гөнаһ юлына баскан, шуңа күрә мондый нәтиҗә ясау акыллы: фәрештәләрнең сайлау иреге бар (Маттай 25:41; 2 Петер 2:4).
Фәрештәләр бер үк дәрәҗәдәме?
Юк. Иң көчле һәм хаким фәрештә — Микаил, ул баш фәрештә (Маттай 25:41; 2 Петер 2:4). Серафимнар — Йәһвәнең тәхете янында урнашкан югары дәрәҗәле фәрештәләр (Ишагыя 6:2, 6). Керубимнәрнең дә югары дәрәҗәләре, алар махсус вазифалар башкара. Мәсәлән, керубимнәр, Адәм белән Хаува Гадән бакчасыннан куылгач, шул бакчага керү урынын саклап торган (Яратылыш 3:23, 24).
Фәрештәләр кешеләргә булышамы?
Әйе, Аллаһы үзенең тугры фәрештәләре аша кешеләргә бүген дә булыша.
Аллаһы Патшалыгы хакындагы яхшы хәбәрне вәгазьләү турында әйткәндә, Аллаһы үз хезмәтчеләрен фәрештәләр аша җитәкли (Ачылыш 14:6, 7). Андый җитәкчелек вәгазьләүчеләргә дә, яхшы хәбәрне кабул итүчеләргә дә файда китерә (Рәсүлләр 8:26, 27).
Фәрештәләр ярдәмендә мәсихче җыелыш явыз кешеләрнең тәэсиреннән азат (Маттай 13:49).
Фәрештәләр Аллаһыга тугры хезмәт итүчеләрне җитәкли һәм яклый (Зәбур 34:7; 91:10, 11; Еврейләргә 1:7, 14).
Тиз арада фәрештәләр Гайсә Мәсихкә кушылып явызлыкны юк итәчәк һәм шулай итеп кешеләргә азатлык китерәчәк (2 Тисалуникәлеләргә 1:6—8).
Саклаучы фәрештә һәр кешенең бармы?
Фәрештәләр Аллаһы хезмәтчеләренең рухи сәламәтлекләре турында кайгыртса да, Аллаһы һәр кеше янына берәр фәрештәсен тегесен саклап торсын өчен җибәрми b (Маттай 18:10). Фәрештәләр Аллаһы хезмәтчеләрен һәрбер вәсвәсә-сынаудан саклап тормый. Инҗилдән күренгәнчә, Аллаһы кешеләргә сынауны кичерерлек зирәклек белән көч биреп «котылу юлын» күрсәтеп торачак (1 Көринтлеләргә 10:12, 13; Ягъкуб 1:2—5).
Фәрештәләр турында ялгыш фикерләр
Ялгыш фикер: бар фәрештәләр яхшы.
Факт: Инҗилдә «явыз рухи көчләр» һәм «гөнаһ кылган фәрештәләр» телгә алына (Эфеслеләргә 6:12; 2 Петер 2:4). Бу явыз фәрештәләр — Аллаһыга каршы фетнә күтәргән Шайтан Иблискә кушылган җеннәр.
Ялгыш фикер: фәрештәләр — үлемсез рухлар.
Факт: явыз фәрештәләр, шул исәптән Шайтан Иблис, юкка чыгачак (Яһүд 6).
Ялгыш фикер: кеше үлгәч фәрештәгә әйләнә.
Факт: Аллаһы фәрештәләрне үзе барлыкка китергән, ул кешеләрне үледән терелтеп аларны фәрештәләр итми (Көләсәйлеләргә 1:16). Үледән терелгәч күктә яшәүче кешеләрне Аллаһы үлемсез тормыш биреп бүләкли (1 Көринтлеләргә 15:53, 54). Алар фәрештәләрдән өстен дәрәҗәгә ия була (1 Көринтлеләргә 6:3).
Ялгыш фикер: фәрештәләрнең яшәү максаты — кешеләргә хезмәт итү.
Факт: фәрештәләр безне түгел, ә Аллаһыны тыңлый (Зәбур 103:20, 21). Гайсә дә шул ук фикерне исбатлаган: әгәр дә ул Аллаһыга ярдәм сорап ялварса, Аллаһы ярдәмгә үз фәрештәләрен җибәрәчәк (Маттай 26:53).
Ялгыш фикер: фәрештәләргә ярдәм сорап дога кылып була.
Факт: Аллаһыга дога кылу — гыйбадәт кылуыбызның өлеше, Йәһвә Аллаһы гына моңа лаек (Ачылыш 19:10). Безгә Аллаһыга гына Гайсә исеме хакына дога кылырга кирәк (Яхъя 14:6).
a Изге Язмаларның кайбер тәрҗемәләрендә Ишагыя 14:12 дә «Люцифер» дигән исем кулланыла; кайберәүләрнең фикеренчә, Люцифер — Шайтан Иблис дип аталган фәрештәнең башка исеме. Ләкин еврей сүзе «балкып торган берәү» дигәнне аңлата. Контексттан күренгәнчә, бу сүз Шайтанга карата түгел, ә Бабылда нәселдән-нәселгә идарә итүчеләргә карата кулланыла; Аллаһы аларны горур булганга күрә басынкыландырган (Ишагыя 14:4, 13—20). «Балкып торган берәү» дигән сүзтезмә тәхетләреннән төшерелгән Бабыл идарәчеләрен түбәнсетер өчен кулланылган булган.
b Кайбер кешеләр Петернең төрмәдән азат ителүе турындагы өзекне укып, мондый нәтиҗәгә килгән: Петернең саклаучы фәрештәсе булган (Рәсүлләр 12:6—16). Әмма шәкертләр «аның [Петернең] фәрештәсе» диеп, Петерне күздә тотмаганнар, алар, бәлки, аңардан хәбәр алып килгән фәрештәне ялгыш күз алдына китергән.
Сезгә бу да ошардыр
РУХИ СОРАУЛАРГА ҖАВАП
Баш фәрештә Микаил. Кем ул?
Аны шулай ук сиңа яхшы билгеле булган исем белән атыйлар.
«КҮЗӘТҮ МАНАРАСЫ»
Сезнең сакчы фәрештәгез бармы?
Берәр фәрештә я фәрештәләрнең үзегезне яклаячагына ышана аласызмы?
