Leswi Vanhu Va Swi Vulaka Hi Xikhongelo
“Loko ni hamba xikhongelo, ni titwa ingaku Xikwembu xo va tlhelweni ka mina, xi ni khoma hi voko xi tlhela xi ni komba ndlela loko ni titwa na ni lahlekile.” — MARÍA.
“A nsati wa mina a hete 13 wa malembe na a vabya hi câncro, a gama a fa. Ni khumbuka swaku a ni khongela siku ni siku ka Xikwembu naswona xi ni yingisile xi tlhela xi ni rhulisa mbilu.” — RAÚL.
“Xikhongelo i nchumu xa lisima lexi Xikwembu xi nga hi nyika.” — ARNE.
Ka María na Raúl na Arne ni van’wana, xikhongelo i nchumu xa lisima hintamu. Va swi tiva swaku hi xikhongelo hi nga vulavula ni Xikwembu, hi xi khensa hi tlhela hi kombela ku pfuniwa hi xona. Va kholwa hi mbilu ya vona hinkwayu ka leswi Bibele li swi vulaka hi xikhongelo loko li ku: “Ha tshemba swaku Xikwembu xa hi twa loko hi kombela xin’wana ni xin’wana lexi fambisanaka ni ku rhandza ka xona.” — 1 Yohani 5:14.
Vanhu van’wana swa va karhatela ku kholwa ka leswi Bibele li swi vulaka hi xikhongelo. Loko Steve a tlhamusela leswi a a titwisa xiswona hi xikhongelo a te: “A nkama na ni ni 17 wa malembe, 3 wa vanghanu va mina va file. Mun’we a fi ka nghozi ya movha, kasi vambirhi va mbombomeli ka mati.” Se Steve a yentxi yini? Yena a te: “Ni khongele ka Xikwembu, ni xi vutisa swaku hi mhaka muni ku humelela swilo leswi kambe a ni kumanga nhlamulu. Se ni game ni tivutisa leswi: ‘Swi siza yini ku khongela?’” Vanhu vanyingi va vona ingi swikhongelo swa vona a swi hlamuliwi. Se leswo swi va yentxa va tivutisa swaku swa ha siza yini ku tama va khongela.
Ku ni swin’wana leswi yentxaka swaku vanhu va nga kholwi swaku xikhongelo i xa lisima. Hi xikombiso, van’wana va vula swaku leswi Xikwembu xi tivaka swikarhatu hinkwaswu leswi hi nga na swona ni swilo leswi hi swi lavaka, a swi twali ku tlhela hi xi byeletela swilo swoleswi swa swin’we.
Van’wana va vula swaku Xikwembu a xi nge swi twi swikhongelo swa vona, hi mhaka swidjoho leswi va nga tshama va swi yentxa khali. Hi xikombiso Jenny a te: “Leswi ni karhataka, i ku tivona na ni nga li wa nchumu hi mhaka swilo swa ku biha leswi ni nga tshama ni swi yentxa. Leswo swi ni yentxa ni pimisa swaku Xikwembu a xi nge ni twi.”
Wena ke, u titwisa ku yini hi xikhongelo? Loko ku li swaku u tshama u vona ingi Xikwembu a xi nge swi twi swikhongelo swa wena, u ta tiyisiwa hi leswi Bibele li swi vulaka. Leswi Bibele li swi vulaka hi xikhongelo * swa tshembeka, naswona swi nga hi pfuna ku hlamula swivutiso swa ku fana ni leswi:
-
Indje Xikwembu xa swi twa swikhongelo swa hina?
-
Hi mhaka muni xi nga swi hlamuli swikhongelo swin’wana?
-
Hi nga khongelisa ku yini swaku Xikwembu xi hi twa?
-
Ku hamba xikhongelo swi nga ku pfunisa ku yini?
^ par. 9 Ka Bibele ku ni swikhongelo swa swinyingi swa vanhu va Xikwembu, ku patsa ni swa Yesu Kreste. Matsalwa ya Xiheberu, lawa ma tlhelaka ma vitaniwa Velho Testamento, ma ni swikhongelo swa ku tlula 150 wa swona.
Ni Mhaka Leyi Yi Ta Ku Tsakisa
VAMPSHA VA VUTISA
Hi Mhaka Muni Ni Fanele Ni Khongela?
Indje xikhongelo o va nchumu lexi yentxaka hi titwa kahle kumbe ku ni swin’wana?
