Mupostolo Pawulo a byele bandla la Tesalonika a ku: “Loko munhu a yala ku yingisa leswi hi nga mi tsalela ka karta leli, mu markareni”. (2 Tes. 3:14) A khale a hi vula swaku loko ku ni munhu lweyi a yalaka ku yingisa leswi Yehovha a hi byelaka swona hi ku tirhisa nhlengeletanu ya yena, madoda a ma fanele ma bula na yena ma mu pfuna leswaku a ta kota ku txintxa. Kambe loko a nga pfumeli, madoda a ma fanele ma yendla dixkursu leswaku ma basopisa bandla leswaku li nga titlhanganisi ni munhu yelweyo hambileswi a kalaka a nga susiwanga bandleni. Se vamakwerhu abandleni a va nga fanelanga va tolovelana na yena kumbe va va vanghanu va yena. A va ta va na yena ntsena loko va li mintlhanganwini ni loko va li nsin’wini.

Kambe swoswi swi lave hi txintxa matwisiselo ka mhaka leyi; hikusa nkama Pawulo a nga tsalela bandla marito lawa, a a vulavula hi leswi mun’wani ni mun’wani ka bandla leliyani a a fanele a swi yendla. Se a swa ha laveki leswaku madoda ma yendlela bandla dixkursu ma li basopisa hi munhu lweyi a kalaka a nga yingisi. Hi mhaka muni hi vula leswo? A hi voneni leswi nga yendla Pawulo a tsala marito lawa.

Mupostolo Pawulo a vule swaku ka bandla la Tesalonika a ku ni vanhu lava a va “nga tikhomi hi ndlela yayinene”. Phela yena a a tirhise Matsalwa leswaku a va pfuna Vakreste va bandla leliyani, kambe van’wani va vona a va nga lavi ku twa nchumu. Hi xikombiso, nkama lowu a nga va yendzela a va byele swaku “loko munhu a nga lavi ku tirha ni ku dla a nga dli.” Kambe van’wani va vona a va tama va yala ku tirha leswaku va tihlayisa naswona van’wani ka vona, a va rhandza ku tipeta ka timhaka ta van’wani. Se Vakreste a va fanele va va vonisa ku yini vanhu volavo? — 2 Tes. 3:6, 10-12.

Pawulo a te loko ku ni makwerhu lweyi a kalaka a nga yingisi abandleni “mu markareni”. Hi Xigriki, ku markara munhu swi vula swaku u fanele u tivonela ka yena u tlhela u nga titlhanganisi na yena. Se Pawulo a a nga byeli madoda ntsena, kambe a a byela vamakwerhu hinkwavu abandleni leswaku va tivonela. (2 Tes. 1:1; 3:6) Hi mhaka leyo, loko ku ni makwerhu lweyi a kalaka a nga rhandzi ku yingisa abandleni, mun’wani ni mun’wani a fanele a tivonela swaku a nga tolovelani ni makwerhu yelweyo kumbe a va munghanu wa yena.

Indjhe leswo swi lava ku vula swaku hi fanele hi vona makwerhu yelweyo ku fana ni munhu lweyi a nga susiwa bandleni? Ihim, a swi vuli swona hikusa Pawulo a te: “Tamani mi mu tsundzuxa hikusa i makwenu.” Makwerhu yelweyo hi ta tama hi va na yena amintlhanganwini ni ka ntirho wa ku chumayela. Kambe swi nga va swinene leswaku hi tivonela kuva hi nga mu rhambi ka swifextana kumbe ku mu rhamba swaku hi ta hungata na yena. Hi mhaka muni hi vula leswo? Hikusa Bibele li vula leswaku a hi fanelanga hi “titlhanganisa na yena leswaku a ta dana.” Leswi nge, ku yendla leswo swi nga pfuna makwerhu yelweyo ku vona swaku swilo leswi a swi yendlaka a hi swinene a tlhela a txintxa mahanyelo ya yena. — 2 Tes. 3:14, 15.

Hi nga mu vonisa ku yini munhu lweyi hi faneleke hi mu markara leswaku hi nga tipatsi na yena? Ku sungula, hi fanele hi tiyiseka swaku mahanyelo ya munhu yelweyo ma kombisa swaku a nga yingisi hilani Pawulo a nga vula hi kona. Phela munhu lweyi a kalaka a nga yingisi a ku vuliwi munhu lweyi a nga ni mavonelo ya ku hambana ni ya hina ka timhaka leti yelanaka ni lipfalu, naswona a ku vuliwi munhu lweyi a nga hi kwatisa kumbe a nga yendla nchumu lexi hi kalaka hi nga xi rhandzanga. Kambe Pawulo a a vulavula hi vanhu lava va yalaka ku yingisa leswi nhlengeletanu ya Yehovha yi hi byelaka swona.

Loko ku li swaku abandleni ku ni makwerhu lweyi hi vonaka swaku a nga yingisi, a hi nga ha tiyendlela xiboho xa ku kala hi nga tipatsi na yena, kumbe hi nga mu rhambi ka mafexta kumbe ku mu rhamba leswaku hi ta hungata na yena. Kambe a hi fanelanga hi byeletela vanhu xiboho lexi hi nga xi yendla. Hi fanele hi byela ndjangu wa hina ntsena. Kambe loko hi kumana na yena makwerhu yelweyo amintlhanganwini ni le ka ntirho wa ku chumayela, hi fanele hi mu losa hi tlhela hi bula na yena. Funtshi hi ku famba ka nkama loko hi vona swaku se a txintxile mahanyelo ya yena, hi fanele hi yendla minzamu ya ku tlhela hi tolovelana na yena, hi va vanghanu va yena.