DJONDZO 46
Hi Mhaka Muni U Fanele U Tinyiketela U Tlhela U Tsakamisiwa?
U tinyiketela ka Yehovha hi ku yentxa xikhongelo u mu tshembisa swaku u ta tirhela yena ntsena u tlhela u rhangisa ku yentxa ku rhandza ka yena ka wutomi la wena. (Tipisalema 40:8) Loko u tinyiketelile, se u nga tsakamisiwa. Kutani loko u tsakamisiwa, u komba vanhu hinkwavu swaku u tinyiketelile ka Yehovha. Lexi i xiboho xa lisima hintamu lexi u nga xi yentxaka naswona xi ta txintxa wutomi la wena. I yini lexi faneleke xi ku susumetela ku xi yentxa?
1. I yini lexi yentxaka munhu a lava ku tinyiketela ka Yehovha?
Lexi xi hi yentxaka hi tinyiketela ka Yehovha i lirhandzu. (1 Yohani 4:10, 19) Bibele li li: “Rhandza Yehovha Xikwembu xa wena hi mbilu ya wena hinkwayu, hi wutomi la wena hinkwalu, hi mimpimisu ya wena hinkwayu ni hi matimba ya wena hinkwawu.” (Marku 12:30) Hi kombisa swaku hi rhandza Xikwembu ku nga li hi leswi hi swi vulaka ntsena kambe ni leswi hi swi yentxaka. Hi xikombiso, vanhu vambirhi lava rhandzanaka va swi kombisa hi ku chada. Hi ku fanana, lirhandzu leli hi nga na lona hi Yehovha li hi yentxa hi tinyiketela ka yena hi tlhela hi tsakamisiwa.
2. Hi yini minkateko leyi Yehovha a yi nyikaka vanhu va yena lava va nga tsakamisiwa?
Loko u tsakamisiwa, u sungula ku lumba ndjangu wa Yehovha lowu tshamaka na wu tsakile. Naswona u ta sungula ku vona lirhandzu la Yehovha ka wutomi la wena hi tindlela ta tinyingi, nakambe wunghanu la wena na Yehovha li ta ya li kula hintamu. (Lerha Malakiya 3:16-18.) Yehovha a ta va Papayi wa wena, u ta tlhela u va ni vamakwerhu va xinuna ni va xisati amisaveni hinkwayu lava rhandzaka Yehovha va tlhela va ku rhandza. (Lerha Marku 10:29, 30.) I ntiyiso swaku na u nge se tsakamisiwa ku ni leswi u faneleke u swi yentxa. U fanele u djondza hi Yehovha, u mu rhandza u tlhela u va ni lipfumelo ka N’wana wa yena. Se hi kona u nga nyiketelaka wutomi la wena ka Yehovha. Loko se u yentxe leswo, kutani u tsakamisiwa, u ta va ni ntshembo wa ku hanya wutomi la ku tsakisa la ku kala li nga heli. Rito la Xikwembu li li: “Ntsakamiso . . . wa mi ponisa.” — 1 Pedru 3:21.
DJONDZA SWIN’WANA
Vona swaku hi mhaka muni swi li swa lisima ku tinyiketela ka Yehovha u tlhela u tsakamisiwa.
3. Hinkwerhu hi fanele hi langa swaku hi ta tirhela mani
Ka nkama wa Vayisrayele, a ku ni lava a va pimisa swaku va nga swi kota ku gandzela Yehovha va tlhela va gandzela Bali xikwembu xa mavunhwa. Kambe Yehovha a rhumele muprofeta wa yena Eliya kuva a va komba swaku leswo a swi nge koteki. Lerhani 1 Tihosi 18:21, mi gama mi bula hi xivutiso lexi landzelaka:
-
Hi xihi xiboho lexi Vayisrayele a va fanele va xi yentxa?
Ku fana ni Vayisrayele, na hina hi fanele hi langa lweyi hi nga ta mu gandzela. Lerhani Luka 16:13, mi gama mi bula hi swivutiso leswi landzelaka:
-
Hi mhaka muni swi nga koteki ku gandzela Yehovha hi tlhela hi gandzela munhu mun’wana kumbe nchumu xin’wana hi nkama wun’we?
-
Hi nga mu kombisa ku yini Yehovha swaku hi langa ku gandzela yena?
4. Pimisa hi leswi Yehovha a ku rhandzisaka xiswona
Yehovha a hi nyike minchumu ya yinyingi ya lisima. Se hina hi nga mu nyika yini? Sixtirani VHIDIYO.
Yehovha a swi kombisisa ku yini swaku wa ku rhandza? Lerhani Tipisalema 104:14, 15 na 1 Yohani 4:9, 10, mi gama mi bula hi swivutiso leswi landzelaka:
-
Ka minchumu leyi Yehovha a nga ku nyika, i mpsini leswi u swi khensaka hintamu?
-
Minchumu yoleyo yi ku yentxa u titwisa ku yini hi Yehovha?
Loko hi nyikiwa nchumu lexi xi hi yentxaka hi tsaka ha swi lava ku kombisa ku khensa ka munhu lweyi a nga hi nyika. Lerhani Deteronoma 16:17, mi gama mi bula hi xivutiso lexi landzelaka:
-
Loko u pimisa hi swilo hinkwaswu leswi Yehovha a nga ku yentxela swona, u navela ku mu nyika yini?
5. Ku tinyiketela ka Yehovha swi tisa minkateko ya yinyingi
Vanhu va vanyingi va kholwa swaku ku va ni ndhuma, ntirho wa wunene kumbe male ya yinyingi swi nga va yentxa va tsaka. Leswo i ntiyiso? Sixtirani VHIDIYO, mi gama mi bula hi swivutiso leswi landzelaka:
-
Hambileswi makwerhu lweyi a nga kombisiwa ka vhidiyo a a swi rhandza ku bela bola, i mpsini swi nga mu yentxa a swi tshika?
-
A lange ku tinyiketela ka Yehovha ku nga li ku bela bola. U pimisa swaku a yentxe xiboho xa xinene? Hi mhaka muni?
Mupostolo Pawulo na a nge se va Mukreste a a ni hinkwaswu swaku a va munhu wa ndhuma, a a djondzisiwe nawu wa Xiyuda hi mudjondzisi lweyi a a ni ndhuma. Kambe a tshike hinkwaswu swaku a va Mukreste. Ku nga va swaku Pawulo a game a tilaya? Lerhani Vafilipiya 3:8, mi gama mi bula hi swivutiso leswi landzelaka:
-
Hi mhaka muni Pawulo a vule swaku leswi a a swi yentxa khale na a nge se va Mukreste a swi fana ni “xidulu xa chaka”?
-
Hi yini minkateko a nga yi kuma hi leswi a nga tshika wutomi la yena la khale?
-
U pimisa swaku wutomi la wena li nga va linene loko u langa ku tirhela Yehovha? Hi mhaka muni?
Nkama Pawulo a nga va Mukreste a kume minkateko ya yinyingi ku tlula leswi a nga swi tshika
VAN’WANA VA LI: “Na swi tiva swaku lowu i ntiyiso kambe a ni se swi lunghekela ku tsakamisiwa.”
-
Hi mhaka muni u vona swaku swi nga va swinene ku tinyiketela ka Yehovha?
LESWI HI NGA SWI DJONDZA
Lirhandzu li yentxa swaku hi tinyiketela ka Yehovha ni ku tsakamisiwa.
Ku kambela leswi hi nga swi djondza
-
Hi mhaka muni swi mu fanela Yehovha kuva hi mu rhandza hi mbilu hinkwayu ni ku mu tirhela?
-
Hi yini minkateko leyi Yehovha a yi nyikaka vanhu va yena lava va nga tsakamisiwa?
-
Wa swi tsakela ku tinyiketela ka Yehovha?
LOKO U LAVA KU TIVA SWIN’WANA
Vona swaku i mpsini swi nga yentxa muyimbeleli mun’wana ni mu beli wa bola va tinyiketela ka Yehovha.
Vampsha Va Vutisa — Ni Nga Yendla Yini hi Wutomi la Mina? — Loko Ni Khumbuka Khale (6:52)
Vona minchumu yin’wana leyi nga ku yentxaka u tinyiketela ka Yehovha.
“Ha Yini U Fanele U Tinyiketela Eka Yehovha?” (Murindzi wa 15 ka Janeiro wa 2010 hi Xitsonga)
Ka vhidiyo leli, vona leswi va nga tsakisa xiswona vanhu lava va nga tinyiketela ka Yehovha.
Ka xiperiyensiya lexi nge “Ku Ringana Malembe Yo Tala A Ndzi Tivutisa Leswaku, ‘Ha Yini Hi Ri Laha?’” vona swaku i yini leswi nga yentxa wansati lweyi a vona leswi nga swa lisima ka wutomi la yena.
“Bibele Yi Hundzula Vutomi Bya Vanhu” (Murindzi wa 1 ka Novembro wa 2012 hi Xitsonga)
