DJONDZO 44

I Maferiyadu Hinkwawu Ma Xi Tsakisaka Xikwembu?

CHAYA

Yehovha a lava swaku hi tsaka hi tlhela hi va ni nkama wa ku hungata. Kambe i maferiyadu hinkwawu ma mu tsakisaka? Hi nga swi kombisa ku yini swaku ha mu rhandza Yehovha ka mhaka leyi?

1. Hi mhaka muni maferiyadu ya manyingi ma nga mu tsakisi Yehovha?

U nga ha hlamala hi ku tiva swaku maferiyadu ya manyingi a ku vulavuliwi hi wona ka Bibele kambe ma sungule ka wuhedeni. Swi nga yentxeka maferiyadu wolawo ma fambisana ni wukhongeli la mavunhwa naswona swi nga yentxeka ma fambisana ni wudimoni kumbe ni mhaka leyi vanhu va yi kholwaka ya leswaku loko munhu a fa ku ni nchumu lexi tamaka xi hanya. Maferiyadu man’wana ma fambisana ni leswi vanhu va swi kholwaka, swa mavunhwa kumbe ku kholwa ka tindjombo. (Esaya 65:11) Yehovha a basopisa lava va mu tirhelaka a ku: “Mi tihambanisa . . . naswona tshikani ku khumba nchumu lexi kalaka xi nga basanga.” — 2 Vakorinto 6:17. a

2. Yehovha a titwisa ku yini hi maferiyadu lawa ma yentxaka swaku vanhu va hloniphiwa ku tlula mpimu?

Yehovha a hi basopisa swaku hi nga weli ka ntlhamu wa ku ‘tshemba munhu.’ (Lerha Yeremiya 17:5.) Maferiyadu man’wana ma yentxeliwe ku dzunisa tihosi ni masonchwa. Kasi man’wana ma yentxeliwe ku dzunisa minchumu ya tiko ya ku fana ni mabandera kumbe siku la nkhululeko wa tiko (independência). (1 Yohani 5:21) Kasi man’wana ma dzunisa mapartidu ya politika. Yehovha a a ta titwisa ku yini loko na hina a ho tlangela maferiyadu lawa ma dzunisaka vanhu kumbe tinhlengeletanu leti ti yentxaka minchumu ya ku kala yi nga mu tsakisi?

3. I mpsini leswi nga yentxaka maferiyadu ma nga mu tsakisi Yehovha?

Bibele li li swi bihile “ku dakwa, mafexta ya mpfilumpfilu, [ni] ku tshama mabyaleni.” (1 Pedru 4:3) Ka maferiyadu man’wana vanhu a va tikhomi naswona va yentxa minchumu ya ku kala yi nga basanga. Swaku hi tama hi va vanghanu va Yehovha hi fanele hi baleka minchumu ya ku kala yi nga basanga.

DJONDZA SWIN’WANA

Vona leswi u nga swi yentxaka swaku u tsakisa Yehovha hi ku yentxa swiboho swa swinene leswi fambisanaka ni maferiyadu.

4. Fambela kule ni maferiyadu lawa ma kalaka ma nga mu tsakisi Yehovha

Lerhani Vaefeza 5:10, mi gama mi bula hi swivutiso leswi landzelaka:

I mpsini leswi hi faneleke hi tiyiseka hi swona na hi nge se tlangela feriyadu?
Hi wani maferiyadu lawa ma nga toloveleka lomu u tshamaka kona?
U vona swaku maferiyadu wolawo ma mu tsakisa Yehovha?

Hi xikombiso, u tshama u tivutisa swaku Xikwembu xi ma vonisa ku yini mafexta ya ku tlangela masiku ya ku psaliwa? Bibele a li vuli swaku vanhu va khale lava a va tirhela Yehovha a va ma tlangela masiku ya vona ya ku psaliwa. Kambe li vulavula hi vanhu vambirhi lava a va nga mu gandzeli Yehovha va nga tlangela masiku ya vona ya ku psaliwa. Lerhani Genesa 40:20-22 na Matewu 14:6-10. Mi gama mi bula hi swivutiso leswi landzelaka:

I mpsini leswi mafexta lawa ya mambirhi ya ku tlangela masiku ya ku psaliwa ma fanaka hi swona?
Hi ku ya hi tindzimana leti, u pimisa swaku Yehovha a titwisa ku yini hi ku tlangela masiku ya ku psaliwa?

Kambe u nga ha tivutisa swaku: ‘Indje Yehovha a ni mhaka loko ni tlangela masiku ya ku psaliwa kumbe maferiyadu man’wana lawa ma kalaka ma nga fambisani ni Bibele?’ Lerhani Eksoda 32:1-8. Mi tlhela mi sixtira VHIDIYO mi gama mi bula hi swivutiso leswi landzelaka.

VHIDIYO: Mafexta ni Maferiyadu Lawa ma Kalaka ma Nga xi Tsakisi Xikwembu (5:07)

Hi mhaka muni swi li swa lisima ku tiyiseka hi leswi swi tsakisaka Yehovha?
Hi nga yentxa yini swaku hi tiyiseka hi leswi swi tsakisaka Yehovha?

Hi nga ma tivisa ku yini maferiyadu lawa ma kalaka ma nga xi tsakisi Xikwembu?

Ku nga va swaku li sukela ka tidjondzo leti kalaka ti nga fambisani ni Bibele? Lavetela ku tiva lomu feriyadu la kona li sukelaka kona.
Ku nga va swaku li dzunisa vanhu, tinhlengeletanu kumbe minchumu leyi yi nyimelaka tiko? Hina hi dzunisa Yehovha naswona hi tshemba swaku hi yena ntsena lweyi a nga ta helisa swikarhatu amisaveni.
Leswi swi yentxiwaka ka feriyadu lolelo swa lwisana ni minawu ya Bibele? Hi fanele hi va ni mahanyelo ya ku basa.

5. Pfuna van’wana swaku va hlonipha leswi u swi kholwaka

Swi nga karhata ku yala loko van’wana va ku sindzisa ku tlangela maferiyadu lawa ma kalaka ma nga mu tsakisi Yehovha. Tlhamusela xiboho xa wena hi ndlela ya yinene naswona na u nga kwatanga. Swaku u vona leswi nga yentxisiwaka xiswona, sixtirani VHIDIYO.

VHIDIYO: Tlhamusela Leswi U Swi Kholwaka Hi Wutlharhi (2:01)

Lerhani Matewu 7:12, mi gama mi bula hi swivutiso leswi landzelaka:

Hi ku ya hi ndzimana leyi, ku nga va swaku u fanele u sindzisa maxaka ya wena lawa ma kalaka ma nga tirheli Yehovha swaku ma nga tlangeli feriyadu?
U nga yentxa yini kuva u komba maxaka ya wena swaku wa ma rhandza hambileswi u kalaka u nga tlangeli na wona maferiyadu?

6. Yehovha a lava swaku hi tsaka

Yehovha a lava swaku hi va ni minkama ya ku tsakisa ni maxaka ni vanghanu va hina. Lerhani Eklesiasta 8:15, mi gama mi bula hi xivutiso lexi landzelaka:

Ndzimana leyi yi swi kombisisa ku yini swaku Yehovha a lava swaku hi tsaka?

Yehovha a lava swaku vanhu va yena va tsaka va tlhela va va ni nkama wa ku tsakisa xikan’we. Sixtirani VHIDIYO kuva u vona swaku swi yentxekisa ku yini leswo ka makongresu internacional ya hina.

VHIDIYO: Ku Kombisa Malwandla Hi Nkama Wa Makongresu Ya Xipesiyali (5:40)

Lerhani Vagalatiya 6:10, mi gama mi bula hi swivutiso leswi landzelaka:

Leswaku hi va yentxela “swa swinene” van’wana swi lava hi tlangela maferiyadu lawa vanhu va ma tlangelaka?
I mpsini leswi a swi ta ku tsakisa, i ku sindziseka ku nyika munhu prezenti hi leswi ku nga feriyadu kumbe i ku nyika munhu prezenti hi ku swi lava?
Timboni ta Yehovha ta tinyingi ti lunghiselela swifextani swaku ti nyika vana va tona maprezenti na ti nga nyimelanga siku la ku hlawuleka. Loko u ni vana, hi yini minchumu ya ku hlawuleka leyi u nga va yentxelaka yona?

VAN’WANA VA LI: “A ku na mhaka swaku maferiyadu ma sukele kwini. A xa lisima i ku tsaka ni vanghanu ni maxaka.”

A wu ta ku yini loko munhu a vula leswo?

LESWI HI NGA SWI DJONDZA

Yehovha a lava swaku hi va ni minkama ya ku tsakisa ni maxaka ni vanghanu va hina. Kambe a lava swaku hi fambela kule ni maferiyadu ya ku kala ma nga mu tsakisi.

Ku kambela leswi hi nga swi djondza

Hi swini swivutiso leswi hi nga tivutisaka swona kuva hi tiva swaku feriyadu la mu tsakisa Yehovha kumbe a li mu tsakisi?
Hi nga ma tlhamuselisa ku yini maxaka ni vanghanu va hina swaku hi mhaka muni hi nga ma tlangeli maferiyadu?
Hi swi tivisa ku yini swaku Yehovha a lava swaku hi tsaka?

Ni hete djondzo leyi hi diya:

Zama ku yentxa leswi

Tirhisa leswi u nga swi vona ka djondzo leyi swaku u kambisisa maferiyadu lawa ma tlangeliwaka lomu u tshamaka kona.

Swin’wana:

Swin’wana leswi u nga swi fikelelaka