Hilaha vito lelinge Tiyindlo ta Mfumu li vulaka ha kona, a mhaka leyi kuvulavuliwaka ngopfu hi yona ka ndhawu leyi, i Mfumu wa Xikwembu, kunga nhlokomhaka ya rungula leli Yesu aali chumayela. — Luka 8:1.

I tindhawu ta wugandzeli la ntiyiso. A Tiyindlo ta Mfumu hi lomu Timboni ta Yehovha ti lunghiselelaka kona ntirho wa kuchumayela mahungu ya kutsakisa ya Mfumu ka muganga lowu ti yakiwaka kona. (Matewu 24:14) Ta hambana hi ndlela leyi ti yakiweke hi yona ni kukula ka tona, kambe hinkwatu ati yakiwanga hi ndlela ya kuhlamalisa vanhu naswona kutala ka tona ti tirhisiwa hi mabandla ya kutlula lin’we. Ka malembe ya swoswi nyana, se hi yake Tiyindlo ta Mfumu ta kutala swinene (hi xiringaniso, hi yaka 5 wa tona hi siku) swaku hi fambisana ni kuyengeteleka ka mabandla. Swi kotekisa kuyini swoleswo? — Matewu 19:26.

Ti yakiwa hi minyikelo leyi humesiwaka swaku yi pfuneta ka kuyakiwa ka Tiyindlo ta Mfumu. A male yoleyo yi posiwa Betele swaku bandla lita kota kuva ni male ya kuyaka Tiyindlo ta Mfumu kumbe kuti lunghisa loko ti wonhekile.

Ti yakiwa hi vatirhi va kutinyikela mahala lava taka hi ka tindhawu ta ku hambanahambana. Ka matiko ya kutala, kuvumbiwe Mintlawa ya Kuyaka Tiyindlo ta Mfumu. A mintlawa ya vatirhi va kuyaka ni lava tinyiketelaka kupfunisa, va famba ka mabandla ya ku hambanahambana ya kola tikweni swaku vaya pfunisa kuyaka Tiyindlo ta Mfumu, hambi ni ka tindhawu letinga kule swinene. Ka matiko man’wana, a Timboni leti fanelekaka ta langiwa swaku ti vonelela kuyakiwa ka Tiyindlo ta Mfumu ni kupfuxetiwa ka tona ka ndhawu yokarhi. Mintirho ya kutala ya kuyaka yi yendliwa hi vayaki lavanga ni wuswikoti lavanga tinyiketela hi kuswi rhandza leswaku va pfunisa ka tiko lolelo. Kambe kutala ka lava tinyiketelaka kupfunisa i vamakwerhu va bandla la ndhawu yoleyo. A moya wa Yehovha ni minzamu leyi vanhu va Yena vayi yendlaka, swi yendla swaku hinkwaswu swi koteka. — Tipisalema 127:1; Vakolosa 3:23.

• Hi mhaka muni ndhawu leyi hi gandzelaka ka yona yi vitaniwa Yindlo ya Mfumu?

• Hiswi kotisa kuyini kuyaka Tiyindlo ta Mfumu amisaveni hinkwayu?